استانا قالاسى اكىمدىگىنىڭ ۇيىمداستىرۋىمەن قۇربان ايت مەرەكەسىنە وراي دەمەۋشىلەر مەن ەرىكتىلەردىڭ كومەگىمەن الەۋمەتتىك جاعىنان از قامتىلعان وتباسىلارعا ازىق-تۇلىك سەبەتى تاپسىرىلدى. قالا اكىمدىگىنىڭ رەسمي سايتى حابارلاعانداي, قايىرىمدىلىق ءىس-شاراسىندا 1000-نان استام وتباسىعا ازىق-تۇلىك سەبەتى ۇلەستىرىلدى. ازىق-تۇلىك جيىنتىعىن تاراتۋدا ەرىكتىلەر مەن بەلسەندى ازاماتتار كومەك كورسەتتى.
قالالىق ءدىن ىستەرى جونىندەگى باسقارما باسشىسى نۇرداۋلەت المۇحانوۆتىڭ ايتۋىنشا, ەلوردادا ءار توقسان سايىن مۇقتاج جاندارعا كومەك كورسەتىلەدى.
«قالا اكىمدىگى جىل باسىندا Qazaq oil-مەن مەموراندۋمعا وتىردى. ەندى توقسان سايىن مۇقتاج جاندارعا كومەكتەسۋدى كوزدەپ وتىر. وسى جولى ازىق-تۇلىك سەبەتىنىڭ جانىنا قۇرباندىققا شالىنعان مال ەتىنىڭ ءبىر بولىگىن قوسىپ بەردىك. قۇربان ەتىنىڭ ۇشتەن ءبىر بولىگىن ەلوردا تۇرعىندارى, ونىڭ ىشىندە مۇقتاج جاندارعا تاراتۋ كوزدەلگەن. تۇرعىندار ءتىزىمى قالا جانە اۋدان اكىمدىگىنە تۇسكەن ءوتىنىش بويىنشا جاسالدى. مۇنداي ساۋاپتى ىستە كومەكتەسىپ جۇرگەن بارلىق جانعا العىس بىلدىرەمىن. قۇربان ايت مەيرامى قۇتتى بولسىن!» دەدى باسقارما باسشىسى.
ەلوردادا 180 مىڭنان اسا الەۋمەتتىك جاعىنان از قامتىلعان وتباسى بار. بيىل وسى ساناتتاعى 4 مىڭ وتباسىعا ازىق-تۇلىك سەبەتىن تاپسىرۋ جوسپارلانعان. يگى ءىستىڭ باسى-قاسىندا جۇرگەن قالا اكىمىنىڭ كەڭەسشىسى قۋانىش مولدابەك ءوز سوزىندە سوڭعى 4 جىلدا وسىنداي 30-عا جۋىق قايىرىمدىلىق ءىس-شاراسى وتكەنىن ايتتى.
«بۇگىنگى ءىس-شارا ءداستۇرلى «يگى ىستەر» مارافونى اياسىندا ءوتىپ وتىر. سەبەتتە الەۋمەتتىك ماڭىزدى ازىق-تۇلىكتەر مەن ءۇي شارۋاشىلىعىنا قاجەتتى زاتتار بار. ءبىر قوراپتىڭ سالماعى شامامەن 40 كەلىگە جۋىق. 2019 جىلدان بەرى 30-عا جۋىق وسىنداي يگى ءىس اتقارىلدى. وسى ورايدا بارلىق ەلوردا تۇرعىندارىن قايىرىمدىلىق جاساۋعا شاقىرامىن. قۇربان ايت بارشامىزعا قۇتتى بولسىن!» دەدى قالا اكىمىنىڭ كەڭەسشىسى.
ازىق-تۇلىك سەبەتى تىزىمدەگى مەكەنجايلار بويىنشا تاراتىلدى. ەلورداعا 2008 جىلى لەڭگىردەن كوشىپ كەلگەن گۇلبينا كوشەرباەۆا قايىرىمدىلىق جاساپ جۇرگەن جانداردىڭ بارىنە العىسىن ءبىلدىردى.
«بىزگە كومەك كورسەتىپ جاتقاندارىڭىزعا وتە قۋانىشتىمىز. مەنىڭ 5 بالام بار. ۇيدە جولداسىم عانا جۇمىس ىستەيدى. بۇل ازىق-تۇلىك سەبەتى – ءبىزدىڭ وتباسىمىزعا ۇلكەن كومەك. قازىر ءبىر كەلى شەكەردىڭ ءوزى 625 تەڭگە تۇرادى. قىمباتشىلىق زاماندا ازىق-تۇلىككە كوپ اقشا كەتەدى. قازىر ءۇي كەزەگىندە تۇرمىن. بىزگە كومەكتەسىپ جاتقان قالا اكىمدىگىنە, بايقوڭىر اۋدانىنىڭ اكىمدىگى مەن ەرىكتىلەرگە العىسىمدى ايتامىن!» دەدى گۇلبينا كوشەرباەۆا.
استانادا 20 جىلدان بەرى تۇرىپ جاتقان گۇلنارايىم مىرزابەكوۆا قالا اكىمدىگى ارقاشان كومەك قولىن سوزاتىنىن ايتتى. يگىلىكتى ءىس ەكى كۇنگە دەيىن جالعاسادى.
زارينا سارسەنبايقىزى
