ازىق-تۇلىك باعاسى باقىلاۋدا
ەلوردادا قالا اكىمىنىڭ ورىنباسارى اسقار ءامريننىڭ توراعالىعىمەن ازىق-تۇلىك تاۋارلارىنا باعا بەلگىلەۋدىڭ بارلىق تىزبەگى بويىنشا دەلدالدىق سحەمالاردى تەكسەرۋ جونىندەگى كوميسسيانىڭ وتىرىسى ءوتتى.
كوميسسيا قۇرامىندا مونوپولياعا قارسى ورگاننىڭ, ەكونوميكالىق تەرگەۋ دەپارتامەنتىنىڭ, نۇر-سۇلتان قالاسى تۇتىنۋشىلاردىڭ قۇقىقتارىن قورعاۋ دەپارتامەنتىنىڭ جانە ت.ب. وكىلدەرى بولدى.
ەلوردالىق مونوپولياعا قارسى ورگان نۇر-سۇلتان قالاسى بويىنشا ەكونوميكالىق تەرگەۋ دەپارتامەنتىمەن بىرلەسىپ ازىق-تۇلىك ريتەيلى نارىعىنداعى باسەكەلەستىكتىڭ جاي-كۇيىنە جۇرگىزىلگەن تالداۋ تۋرالى باياندادى.
ساۋدا وبەكتىلەرىنىڭ, اتاپ ايتقاندا, كوكونىس بازارلارىنىڭ, ءۇي جانىنداعى دۇكەندەردىڭ جانە نۇر-سۇلتان قالاسىنىڭ باسقا دا ساۋدا وبەكتىلەرىنىڭ قىزمەتىندە تۇتىنۋشىلاردىڭ زاڭدى قۇقىقتارىنا قىسىم جاساۋ بەلگىلەرىن بەلگىلەۋ بويىنشا ءىس-شارالار وتكىزىلدى. وسى تالداۋعا جاتاتىندار قاتارىندا METRO, Galmart, Small, فەرماگ, ازات, گۇلجان جەلىلەرى بار.
انىقتالعان بۇزۋشىلىقتار كوميسسيانىڭ قاراۋىنا شىعارىلادى. كاسىپكەرلەردىڭ ءىس-ارەكەتتەرىندە ساۋدا قىزمەتى سالاسىنداعى زاڭنامانى بۇزۋشىلىق بەلگىلەرى انىقتالعان كەزدە ءتيىستى شارالار قابىلدانادى. ەلوردادا الەۋمەتتىك ماڭىزى بار ازىق-تۇلىك تاۋارلارىنىڭ باعاسىن قالىپتاستىرۋدىڭ بارلىق كەزەڭدەرىنە تالداۋ جۇرگىزىلەدى. ازىق-تۇلىك باعاسىن تۇراقتاندىرۋ بويىنشا كوميسسيا وتىرىسى اپتا سايىن وتكىزىلەدى.