ەلوردانىڭ اينالاسىندا ازىق-تۇلىك بەلدەۋىن دامىتۋ – ماڭىزدى ماسەلە. استانا قالاسى اكىمىنىڭ ورىنباسارى اندرەي لۋكين, اۋىل شارۋاشىلىعى ۆيتسە-ءمينيسترى ەرمەك كوشەرباەۆ, اقمولا وبلىسى اكىمىنىڭ ءبىرىنشى ورىنباسارى قادىرحان وتاروۆ, قاراعاندى وبلىسى اكىمىنىڭ ورىنباسارى شاگۋراشيد مامالينوۆتىڭ قاتىسۋىمەن ارنايى وتكەن كونفەرەنتسيادا ازىق-تۇلىك بەلدەۋىن بەكەمدەۋ جان-جاقتى تالقىلاندى.
الدىمەن قالالىق اۋىل شارۋاشىلىعى باسقارماسىنىڭ باستىعى اسەت قۇرمانعاليەۆ «استانا قالاسى اينالاسىنداعى ازىق-تۇلىك بەلدەۋى: ناقتى جاعدايى, ماسەلەلەرى, كەلەشەگى» دەگەن تاقىرىپتا بايانداما جاسادى. ونىڭ ايتۋىنشا, قازىرگى ۋاقىتتا ەلوردا اينالاسىنداعى ازىق-تۇلىك بەلدەۋىنەن جەتكىزىلەتىن ءونىم تۇرلەرى تۇرعىندار سۇرانىسىنىڭ تەك 35 پايىزىن عانا وتەۋگە قابىلەتتى ەكەن.
– بىزدەگى بەلدەۋدە قالا جۇرتشىلىعىنىڭ سۇرانىسىن ارتىعىمەن وتەيتىن ءونىم تۇرلەرى دە جەتكىلىكتى. ەڭ ءبىرىنشى ۇن جانە نان ونىمدەرى, ماكارون, جۇمىرتقا سياقتى تاۋارلار قالا قاجەتتىلىگىن تولىعىمەن وتەپ وتىر. ءبارى دە وتاندىق ونىمدەر, سىرتتان تاسىمالدانبايدى. استانانىڭ ازىق-تۇلىك بەلدەۋىنە كىرەتىن اقمولا جانە قاراعاندى سياقتى وبلىستار الەۋمەتتىك ماڭىزى بار ازىق-تۇلىك ونىمدەرىنىڭ 28 پوزيتسياسىن تولىق وتەۋگە مۇمكىندىگى بار. وزدەرىڭىزگە بەلگىلى, الەۋمەتتىك ماڭىزدى ازىق-تۇلىك ونىمدەرى 33 پوزيتسيادان قۇرالادى. كورىپ وتىرعانىمىزداي, بۇل پوزيتسيانى 100 پايىزعا جۋىق وتەۋگە بەلدەۋدىڭ مۇمكىندىگى جەتەدى. قالالىق اكىمدىك ازىق-تۇلىك بەلدەۋىنىڭ ايماعىن 60-100 شاقىرىمعا قىسقارتۋ ارقىلى تاسىمال قاشىقتىعىن ازايتىپ, ءوندىرۋدى جانە ساقتاۋ مەن وتكىزۋدى بىرىڭعاي جۇيەگە ىقپالداستىرۋ جولىمەن «كلاستەرلىك كووپەراتسيالار» قۇرۋدى ۇسىنعان بولاتىن. بۇل وتە ءتيىمدى ۇسىنىس. ويتكەنى, بەلدەۋ ايماعىن قىسقارتۋ ناتيجەسىندە تاۋارلاردى ءارى-بەرى تاسىمالداۋ كەزىندە كەتەتىن شىعىنداردى ازايتۋعا مۇمكىندىك الامىز. سونداي-اق دەلدالداردىڭ جولى كەسىلىپ, ولاردىڭ قىزمەتىنە ۇلكەن توسقاۋىل قويىلادى. مۇنىڭ ءوزى تاۋار باعاسىنىڭ شامادان تىس ارتۋىنا جول بەرمەيتىنى بەلگىلى. ءسويتىپ, استانانىڭ ازىق-تۇلىك بەلدەۋىندە جۇمىس جاسايتىن تاۋار وندىرۋشىلەرگە ونىمدەرىن ەلورداداعى ساۋدا نۇكتەلەرىنە ەشقانداي كەدەرگىسىز جەتكىزۋگە جاعداي جاسالادى. استانادا جەرگىلىكتى ازىق-تۇلىك بەلدەۋىندە وندىرىلگەن ءونىم كولەمى ارتا تۇسەتىن بولادى, – دەدى بەلدەۋدىڭ كەلەشەگى جونىندە باسقارما باسشىسى.
كونفەرەنتسياعا «قازاگروفينانس», «قازاگروماركەتينگ», «اگرارلىق نەسيە كورپوراتسياسى», «اۋىل شارۋاشىلىعىن قارجىلاي قولداۋ قورى», «استانا» اكك ۇك» سياقتى ىرگەلى اۋىل شارۋاشىلىق قۇرىلىمدارىنىڭ وكىلدەرى قاتىسىپ, وزدەرىنىڭ جوبالارىمەن تانىستىردى.
جيىن سوڭىندا ۇسىنىلعان جوبالاردى ىسكە اسىرۋ باعىتىندا استانا قالاسى اكىمدىگى, اۋىل شارۋاشىلىعى مينيسترلىگى, اقمولا جانە قاراعاندى وبلىسىنىڭ اكىمدىكتەرى ىنتىماقتاستىقتى دامىتۋ مەموراندۋمىنا قول قويدى. وسى قۇجات اياسىندا تاۋارلاردىڭ ىشكى نارىققا ءوتۋىن وڭتايلاستىرىپ, دەلدالداردىڭ قىزمەتىنە توسقاۋىل قويۋ, تاسىمال شىعىندارىن تومەندەتىپ, شىنايى باعانى قالىپتاستىرۋ كوزدەلىپ وتىر.
م. شامۇراتوۆ, astana-akshamy.kz
