باعا جەتپەس قۇندىلىق

نۇر-سۇلتان قالاسى بايقوڭىر اۋدانى اكىمى اپپاراتىنىڭ ۇيىمداستىرۋىمەن قازاقستان رەسپۋبليكاسى تاۋەلسىزدىگىنىڭ 30 جىلدىعىنا وراي «تاۋەلسىزدىك. ەلوردا. بايقوڭىر» اتتى عىلىمي-تاجىريبەلىك كونفەرەنتسيا ءوتتى.

القالى جيىنعا نۇر-سۇلتان قالاسى اكىمىنىڭ ورىنباسارى اسحات ورالوۆ, نۇر-سۇلتان قالالىق ءماسليحاتىنىڭ حاتشىسى ەرلان كاناليموۆ, كورنەك­تى قوعام قايراتكەرلەرى, قازاقستان حالقى اسسامبلەياسىنىڭ, عىلىمي جانە شىعارماشىلىق زيالى قاۋىم وكىلدەرى, نۇر-سۇلتان قالاسى ءماسليحاتىنىڭ دەپۋتاتتارى, بايقوڭىر اۋدانىنىڭ اقساقالدارى قاتىسىپ, ەل تاۋەلسىزدىگى تۋرالى تولعامدى ويلارىن ورتاعا سالدى.

قاتىسۋشىلار تاۋەلسىزدىك كەزەڭدەرى مەن جاڭا مەملەكەتتىڭ قۇرىلۋىنداعى وزەكتى ماسەلەلەردى, قازاقستان رەسپۋبليكاسىنىڭ تۇڭعىش پرەزيدەنتى-ەلباسى ن.ءا.نازارباەۆتىڭ تاۋەلسىز ەلىمىزدىڭ قالىپتاسۋىنداعى ستراتەگيالىق باس­تامالارىنىڭ ءرولىن, ەلدىڭ الەۋمەتتىك-­ەكونوميكالىق جانە ساياسي-قۇقىقتىق جاڭعىرۋىنىڭ پەرسپەكتيۆالارى مەن باعىتتارىن ءوزارا سارالادى.

كونفەرەنتسيا وتىرىسىن اشقان بايقوڭىر اۋدانى اكىمى نۇربول ­نۇرساعاتوۆ بيىل ەل تاريحى ءۇشىن ەرەكشە جىل ەكەنىن ايتىپ, تاۋەلسىز قازاقستاننىڭ الەمدىك ساياساتتا دەربەس, ەگەمەندى ەل رەتىندە تانىلعانىنا 30 جىل تولۋىمەن جينالعانداردى قۇتتىقتادى.

ەڭسەلى ەگەمەندىك مەرەكەسىمەن جينالعان قاۋىم قۇتتىقتاپ, جىلى لەبىزىن ارناعان نۇر-سۇلتان قالاسى اكىمىنىڭ ورىنباسارى اسحات ورالوۆ تا تاۋەلسىزدىك تۋرالى تانىمدى بايانداما جاسادى.

– تاۋەلسىزدىك – اتا-بابامىزدان قالعان اسىل امانات. ول – ۇلتىمىزدىڭ, ءتىلىمىزدىڭ, ءداستۇرىمىزدىڭ مىزعىماس تىرەگى, التىن دىڭگەگى. ءوز الدىنا ەگەمەن ۇلت بولۋ – ءبىراز جۇرتقا ارمان بولسا, ءبىز ءۇشىن باعا جەتپەس قۇندىلىق, – دەپ اتاپ ءوتتى ا.ورالوۆ.

ال نۇر-سۇلتان قالالىق ءماسليحاتىنىڭ حاتشىسى ەرلان كاناليموۆ ءوز سوزىندە تۇعىرلى تاۋەلسىزدىكتىڭ باياندى بولۋىن تىلەي وتىرىپ, ەلوردانىڭ بايقوڭىر اۋدانىنىڭ دامۋىنا قاتىستى ءوز ويىن جەتكىزدى.

– ەلباسى ءوز ماقالاسىندا تاۋەلسىزدىكتىڭ 7 تۇعىرىن اتاپ وتكەن بولاتىن. بۇگىنگى كونفەرەنتسيا – سول جەتى تۇعىردى تالقىلاۋ. سونىمەن قوسا, بايقوڭىر اۋدانىنىڭ جەتىستىكتەرى تۋرالى دا ايتىپ وتكىم كەلەدى. اۋداننىڭ بۇگىنگى كەلبەتى ءبارىمىزدى قۋانتادى. اۋدان ءۇش جىلدىڭ ىشىندە ايتارلىقتاي وركەندەپ, كوركەيىپ شىقتى. اتقارىلىپ جاتقان ىستەر, ەڭ باستىسى, حالىقتىڭ كوڭىلىنەن شىعىپ جاتىر, – دەدى ە.كاناليموۆ.

ەل تاۋەلسىزدىگىن ۇلىقتاۋعا ارنالعان جيىنعا ارنايى قاتىسقان بەلگىلى قوعام قايراتكەرى, ءتىل جاناشىرى اسىلى وسمان بۇگىنگى كونفەرەنتسيانىڭ ماڭىزدىلىعى تۋرالى ايتتى.

– بۇگىنگى شارانىڭ تاقىرىبىنىڭ ءوزى, تۇسىنگەن ادامعا ءمانى زور. ەل تاۋەل­سىزدىگىنە ارنالعان مۇنداي شارالار كوپتەپ وتكىزىلىپ, ناسيحاتتالۋ كەرەك. تاۋەلسىزدىگىمىز باياندى, ءتىلىمىز تۇعىرلى بولىپ, ەلباسىمىز ايتقانداي, الدىڭعى 30 دامىعان مەملەكەتتىڭ بىرىنە اينالايىق, – دەدى ا.وسمان.

كونفەرەنتسيا سوڭىندا قاتىسۋشىلار ەلورداداعى قالامگەرلەر اللەياسىنداعى «الاش ارىستارى» ەسكەرتكىشىنە گۇل شوقتارىن قويىپ, «Qitap qala» اشىق اسپان استىنداعى كىتاپحاناعا باردى.

https://youtu.be/x0Rv2dUCceo