نۇر-سۇلتان قالالىق ينۆەستيتسيالار جانە كاسىپكەرلىكتى دامىتۋ باسقارماسىنىڭ باسشىسى ەرجان بالتاەۆ ەلوردانىڭ ساۋدا نىساندارىنىڭ وكىلدەرىمەن كەزدەستى. كەزدەسۋگە قاتىسۋشىلار الەۋمەتتىك ماڭىزى بار تاۋارلارعا شەكتى ۇستەمە باعا ماسەلەسىن تالقىلادى.
ساۋدا قىزمەتىن رەتتەۋ تۋرالى زاڭدا الەۋمەتتىك ماڭىزى بار ازىق-تۇلىك تاۋارلارىنا شەكتى ساۋدا ۇستەمە باعاسىن بەلگىلەۋ ناقتىلانعان. ول 15 پايىزدان اسپاۋى ءتيىس جانە نارىق سۋبەكتىلەرى اراسىنداعى ساتىپ الۋ-ساتۋ شارتتارىندا مىندەتتى تۇردە كورسەتىلۋى قاجەت.
الەۋمەتتىك ماڭىزى بار ازىق-تۇلىك ونىمدەرىنە باعا بەلگىلەۋ ۇدەرىسىن قاداعالاۋ ءۇشىن وسى جىلدىڭ تامىز ايىندا ازىق-تۇلىك تاۋارلارىنا باعا بەلگىلەۋدىڭ بارلىق تىزبەگى بويىنشا دەلدالدىق تىزبەلەردى تەكسەرۋ جونىندەگى ايماقتىق كوميسسيا قۇرىلدى. كوميسسيا قۇرامىنا ۇكىمەت, پروكۋراتۋرا جانە سىبايلاس جەمقورلىققا قارسى كۇرەس ورگاندارىنىڭ وكىلدەرى كىردى.
الەۋمەتتىك ماڭىزى بار ازىق-تۇلىك ونىمدەرىنە شەكتى ساۋدا ۇستەمەسىنىڭ 15 پايىزدان اسىپ كەتۋ فاكتىسى انىقتالعان جاعدايدا زاڭ بۇزۋشىلارعا اۋەلى ەسكەرتۋ جاسالادى. ءبىر جىل ىشىندە قايتادان زاڭ بۇزۋشىلىق فاكتىلەر انىقتالسا, شاعىن بيزنەس سۋبەكتىلەرىنە 10 ايلىق ەسەپتىك كورسەتكىش (اەك), ورتا بيزنەس وكىلدەرىنە 75 اەك, ءىرى بيزنەسكە 300 اەك مولشەرىندە ايىپپۇل سالىنادى.
