استاناداعى №82 «دارىن» مامانداندىرىلعان ليتسەيىندە ءبىلىم كۇنىنە ارنالعان مەرەكەلىك جيىن ءوتتى. وقۋشىلاردى قۇتتىقتاۋعا استانا قالاسى اكىمىنىڭ ورىنباسارى ەرمەك امانشاەۆ كەلدى.
بالالاردى جاڭا وقۋ جىلىمەن قۇتتىقتاۋعا كەلگەن اكىم ورىنباسارى ەرمەك امانشاەۆ جىلى لەبىزىن ءبىلدىردى.
– بارلىعىڭىزدى العاشقى قوڭىراۋمەن مەكتەپ تابالدىرىعىن تۇڭعىش اتتاعان بالدىرعانداردى ءبىلىم كۇنىمەن قۇتتىقتايمىن. بيىلعى وقۋ جىلىنىڭ ءجونى بولەك. بۇگىن قالا مەكتەپتەرىندە ەلباسىمىزدىڭ «بولاشاققا باعدار: رۋحاني جاڭعىرۋ» ماقالاسى اياسىندا ءار وقۋشىنىڭ ءوز تۋعان جەرىنە, تۋعان ەلىنە دەگەن سۇيىسپەنشىلىگىن ارتتىراتىن اشىق ساباقتار وتەدى. ارينە, ءوز ولكەڭنىڭ تاريحىن ءبىلۋ وتە قاجەت. ەلوردامىز – ەلباسىمىزدىڭ ءتول پەرزەنتى. سوندىقتان ەلورداداعى ءبىلىم بەرۋ جۇيەسىنىڭ الدىنداعى ماقساتتار دا, مۇراتتار دا بيىك بولۋى كەرەك, – دەدى ول.
ال №82 «دارىن» مامانداندىرىلعان ليتسەي ديرەكتورى, قر ەڭبەك سىڭىرگەن قايراتكەرى جامال قاسىمبەك جاڭا وقۋ جىلىندا ەلباسىنىڭ «بولاشاققا باعدار: رۋحاني جاڭعىرۋ» باعدارلاماسى باسشىلىققا الىناتىنىن ايتتى.
– بۇگىن ءبىزدىڭ مەكتەبىمىزگە كىشكەنتاي جاس دوستارىمىز – ءبىرىنشى سىنىپ وقۋشىلارى العاش رەت قادام باسىپ وتىر. بيىل ءۇش ءبىرىنشى سىنىپ جاساقتالدى. ولارعا ورتامىزعا قوش كەلدىڭىزدەر دەيمىز. مەكتەبىمىز وتكەن جىلى وقۋىن تابىستى اياقتاپ, تۇلەكتەرىمىزدىڭ بارلىعى ەلىمىزدىڭ اتاۋلى ۇزدىك جوعارى وقۋ ورىندارىنا گرانتقا ءتۇستى. وقۋشىلارىمىز وقۋ جىلى بارىسىندا باسقا دا جەتىستىكتەرگە قول جەتكىزدى. بۇل – اتا-انالاردىڭ جانە ۇستازداردىڭ ەڭبەگى, – دەدى ءبىلىم ورداسىنىڭ باسشىسى.
العاشقى قوڭىراۋدا «ءبىلىم اللەياسى» كورمەسى ۇيىمداستىرىلىپ, وعان ليتسەي وقۋشىلارىنىڭ ءار ءپان بويىنشا قالالىق دەڭگەيدەگى جوبا جۇمىستارى, «زەردە» زەرتتەۋ جۇمىستارى, سونىمەن قاتار رەسپۋبليكالىق دەڭگەيدەگى روبوتوتەحنيكا وليمپياداسىنىڭ جۇلدەگەرلەرىنىڭ جۇمىستارى قويىلدى.
گۇلدانا تالعاتقىزى
