«ەكسپو-2017» حالىقارالىق مامانداندىرىلعان كورمە اياسىندا استانادا اپتاسىنا ەكى وبلىستان مادەني كۇندەرىن وتكىزۋدە. سول ارقىلى ءوڭىر باسشىلارىنىڭ مادەنيەت پەن ونەردى, سپورتتى قولداۋ جايى, ونەرپازداردىڭ ىزدەنىس دەڭگەيى ءبىلىنىپ قالىپ جاتىر.
ءوز باسىم الماتى جانە اتىراۋ وبلىستارىنىڭ كۇندەرىنە كوڭىلىم تولدى. بۇل ايماقتاردىڭ مادەني باعدارلاماسى اۋقىمدىلىعىمەن ەستە قالدى. ال وسى كۇندەرى ءوتىپ جاتقان شىعىس قازاقستان وبلىسىنىڭ كۇندەرى «اتتەگەن-اي» دەگىزىپ تۇر. «شىرايلى شىمكەنت», «شۇعىلالى شىعىس» دەگەن ءسوز تىركەستەرى قۇلاعىمىزعا ابدەن ءسىڭىستى بولدى. بىراق وسى جولى «نۇرشىعىس» دەگەن توسىن تىركەستى «فەيسبۋكتەن» كورىپ, تالايىمىز قايران قالدىق.
وتكەن جەكسەنبىدە «ەتنواۋىل» ۇلتتىق-مادەني كەشەنىندە شىعىس قازاقستان وبلىسى ونەرپازدارىنىڭ كونتسەرتى ءوتتى. كونتسەرت باعدارلاماسى قولعا ءتۇسىپ, ول دا ءبىراز كۇڭگىرت ويلارعا جەتەلەدى. مەنىڭ ۇعىمىمداعى مادەني كۇندەر سول وڭىردەن شىققان تۇعىرلى تۇلعالاردىڭ قازاق ونەرىنە قوسقان ۇلەسىن پاش ەتۋ, استانادان جىراقتا جاتسا دا, بيىك ونەرگە ادالدىق تانىتىپ كەلە جاتقان ادامدارعا ءبىر كوسىلۋگە مۇمكىندىك بەرۋ. مەن ءۇشىن شىعىستاعى سونداي ونەر يەلەرىنىڭ ءبىرى – باقىت ۇدەرباەۆا. ءانشى سول كونتسەرتكە قاتىستى, الايدا كەڭ كوسىلە المادى.
سوسىن كونتسەرت باعدارلاماسىنا مارقۇم تۇرسىنعازى ءراحيموۆتىڭ ءبىر-اق ءانى ەنگىزىلىپتى. جارىقتىق بولات سىبانوۆتىڭ اندەرى مۇلدە جوق. وسىنى ەستىپ, باعدارلاماعا كوڭىلى تولماعان ءانشى سەرىك وسپانوۆ تا «ءبىز بولات سىبانوۆتىڭ اندەرىنە تەربەلىپ وسكەن ۇرپاقپىز» دەگەن ەدى.
وسىعان قاراپ, شىعىستىقتار رەپەرتۋارمەن مۇلدە جۇمىس ىستەمەيدى دەگەن ويعا
قالىپ وتىرمىن. ەستۋىمشە, اباي اتىنداعى تەاتر ءبىر-اق سپەكتاكلمەن كەلىپتى. ونىڭ ءوزى شەتەلدىك اۆتوردىكى. بۇگىنگى كونتسەرتتىك باعدارلاماعا باۋىرجان ەسەباەۆتىڭ ەل كۇندە ەستىپ جۇرگەن «سۇيگەنىم بول», ورىسشا بىرنەشە ءان قوسىپتى. اۋ, سولاردىڭ ورنىنا تۇرسىنعازى راحيموۆ پەن بولات سىبانوۆتىڭ اندەرىن قوسسا, تاقياعا تار كەلمەس ەدى عوي…
شىنى كەرەك, وسىدان كەيىن ءوزىم تۋعان قاراعاندى وبلىسىنىڭ مادەني كۇندەرى ابىرويمەن وتسە ەكەن دەپ تىلەپ وتىرمىن. تەاتر ۇلتتىق سپەكتاكل اكەلىپ (بىرنەشە قويىلىم بولسا, ءتىپتى جاقسى), ءانشى, كۇيشىلەردىڭ رەپەرتۋارىنا قايداعى جوق شىعارمالار ەنىپ كەتپەسە ەكەن. ۇيىمداستىرۋشىلار جاعدايىن جاساپ تۇرىپ, قوراباي ەسەنوۆتى استاناعا الدىرتسا, مەنىڭ عانا ەمەس, تۇتاس جۇرتتىڭ العىسىن الار ەدى. وعان سەبەپ تە بار, «جاس قالام» ءانى وسىدان جارتى عاسىر بۇرىن وسى استانادا, سول ۋاقىتتاعى تسەلينوگرادتا تۋعان (كەلەسى جىلى اعانىڭ مەرەيتويىنا وراي ەلوردادا شىعارماشىلىق كەشى وتسە, ءتىپتى عاجاپ بولار ەدى). قىسقاسى, مادەني باعدارلاماعا اباي بولىڭدارشى, وڭىرلەر!
امانعالي
قالجانوۆ
