استانا ماڭىنداعى ەلدى مەكەن تۇرعىندارى ازىن-اۋلاق مال ۇستاپ, ەتى مەن ءسۇتىن قالا نارىعىندا ساۋدالاپ كەلەدى.
قوياندى اۋىلى مەن وعان ىرگەلەس پاراسات ساياجايى, قوسشى مەن اقمول باعىتىنداعى اۋىلداردىڭ كەيبىر تۇرعىندارى مالىن باقتاشىعا تابىستاۋدىڭ ورنىنا, ەرتەمەن قورانىڭ ەسىگىنەن شىعارا سالىپ ادەتتەنگەن. باعۋسىز مال ەلدى مەكەننىڭ ءىشىن ارالاپ, جول بويىن جاعالاپ جايىلادى. بۇل زاڭ تالابىنا قايشى. قاراۋسىز مال وزگەنىڭ باۋ-باقشاسىن, باسقا دا جەكەمەنشىك نەمەسە قوعامدىق مۇلىكتى ءبۇلدىرۋى, اسىرەسە, جول اپاتىنا سەبەپكەر بولۋى مۇمكىن. ءتورت اياقتى جانۋاردىڭ ورىسكە جەتۋى ءۇشىن كوپ جاعدايدا جولدى كەسىپ ءوتۋى كەرەك. باعۋشىسى جوق مال ءتيىستى وتكەلدەن ءوتۋدىڭ ورنىنا, تاس جولدىڭ كەز كەلگەن تۇسىنان كولدەنەڭ شىعۋى مۇمكىن. مۇنداي قاراۋسىز مالدى جايۋ فاكتىسى انىقتالسا, جەرگىلىكتى پوليتسيا قىزمەتى, قازاقستان رەسپۋبليكاسى اۋىل شارۋاشىلىعى مينيسترلىگىنىڭ نۇر-سۇلتان قالاسى بويىنشا ۆەتەريناريالىق باقىلاۋ جانە قاداعالاۋ كوميتەتى اۋماقتىق ينسپەكتسياسى جانە استانانىڭ اۋداندىق اكىمدىكتەرى بىرلەسىپ, جانۋارلاردىڭ مەنشىك يەسىن اكىمشىلىك قۇقىق بۇزۋشىلىق تۋرالى قازاقستان رەسپۋبليكاسى كودەكسىنىڭ 406, 408-باپتارى بويىنشا جاۋاپكەرشىلىككە تارتۋ جونىندە كوميسسيالىق شەشىم قابىلدايدى.
يەسى انىقتالعانعا دەيىن قاراۋسىز قالعان اۋىل شارۋاشىلىعى جانۋارلارى نۇر-سۇلتان قالاسى, الاش تاس جولى, 72 مەكەنجايىنداعى ارنايى قوراعا قامالادى. يەسiنە مالى قايتارىلعان سوڭ باعىپ, كۇتىپ ۇستاۋعا جۇمسالعان شىعىندارى وتەۋ مىندەتتەلەدى. بۇل شارالار جانۋارلاردىڭ قاراۋسىز جايىلۋى سالدارىنان بولاتىن جول-كولىك وقيعالارىن, سونداي-اق مال ۇرلىعى مەن زاڭسىز مال ەتى ساۋداسىنىڭ الدىن الۋعا مۇمكىندىك بەرەدى. قالا تۇرعىندارى قاراۋسىز مال ماسەلەسى بويىنشا مىنا تەلەفوندارعا حابارلاسا الادى: 8 (7172) 55-68-96, 8 (7172)28-59-70.
