«مەديكەر» كومپانياسى ەلىمىزدىڭ دەنساۋلىق ساقتاۋ سالاسىندا جەمىستى قىزمەت كورسەتىپ جۇرگەن ۇيىمداردىڭ ءبىرى سانالادى. كەشە ايتۋلى كومپانيا باسشىلىعى ەكسپو-2017 حالىقارالىق كورمەسىنە ارنالعان «ءومىر ەنەرگياسى «مەديكەرمەن» بىرگە» اتتى شىعارماشىلىق بايقاۋدىڭ جۇلدەگەرلەرىن ماراپاتتادى.
قازاقستان جۋرناليستەر وداعىنىڭ قولداۋىمەن وتكىزىلگەن بايقاۋدىڭ جەڭىمپازى بولىپ كوپ جىلدار بويى سالاۋاتتى ءومىر سالتىن ناسيحاتتاپ كەلە جاتقان «استانا اقشامى» گازەتى باس رەداكتورىنىڭ ورىنباسارى عالىم قوجابەكوۆ تانىلدى. ەكىنشى جۇلدەلى ورىننان «ۆەچەرنيايا استانا» گازەتىنىڭ ءتىلشىسى ەۆگەنيا سەماشكينا كورىنسە, ءۇشىنشى ورىنعا دا استانالىق گازەتتىڭ ءتىلشىسى سەرىك جولداسباي يە بولدى. جۇلدەگەرلەرگە كومپانيا قۇرامىنداعى «مەيىرىم» كوپسالالى مەديتسينالىق ورتالىقتىڭ قارجىلاي سەرتيفيكاتى تابىستالدى. سونداي-اق بۇگىندە ەكسپو-2017 حالىقارالىق كورمەسىنە سەرىكتەس بولىپ وتىرعان «مەديكەر» كومپانياسى باسقارما باسشىسىنىڭ مىندەتىن اتقارۋشى ايگۇل سەگىزباەۆانىڭ اتىنان بىرقاتار جۋرناليستەر مەن بلوگەرلەرگە دە ارنايى سىيلىقتار بەرىلدى. بايقاۋعا قاتىسۋشىلاردى قازاقستان جۋرناليستەر وداعىنىڭ استانا قالالىق فيليالىنىڭ توراعاسى ماعجان سادىحانوۆ قۇتتىقتاپ, كومپانيا قىزمەتىنە تابىس, ارىپتەستەرىنە شىعارماشىلىق شابىت تىلەدى.
