«بال بالا» بايقاۋى باستالدى
كەشە م.وتەمىسوۆ اتىنداعى وقۋشىلار سارايىندا «بال بالا» ءىى قالالىق بايقاۋى شىمىلدىعىن ءتۇردى. «ءان ايتۋ» جانە «كوركەمسوز وقۋ» اتالىمدارىنا بولىنگەن بايقاۋعا 4-6 جاس ارالىعىنداعى 300-دەن استام بالدىرعان قاتىسۋدا.
استانا اكىمدىگىنىڭ قولداۋىمەن قالالىق ءبىلىم باسقارماسى مەن م.وتەمىسۇلى اتىنداعى وقۋشىلار سارايى قولعا العان بۇل بايقاۋ العاش رەت وتكەن جىلدىڭ قاراشا ايىندا «بي ونەرى» اتالىمى بويىنشا ءوتتى. سول جولى ۇزدىك بيشىلەردى انىقتاعان ۇيىمداستىرۋشىلار ەندى دارىندى انشىلەر مەن كوركەمسوز وقۋشىلاردىڭ اراسىنان جۇزدەن جۇيرىك, مىڭنان تۇلپارلاردى تانىپ الماق.
مەكتەپكە دەيىنگى مەكەمەلەر تاربيەلەنۋشىلەرىنىڭ اراسىندا ءوتىپ جاتقان بايقاۋدىڭ باستى ماقساتى دا سول, ياعني, تالانتتاردى انىقتاپ, ولارعا بارىنشا قولداۋ كورسەتۋ, سونداي-اق, بالاباقشالارداعى كوركەمدىك جەتەكشىلەر مەن پەداگوگتاردىڭ ەڭبەگىن ىنتالاندىرۋ, ۇستازدىق شەبەرلىگىن ارتتىرۋعا جاعداي جاساۋ, استاناداعى مەكتەپكە دەيىنگى ءبىلىم بەرۋ مەكەمەلەرىن ءبىلىم مەن تاربيەنىڭ ورتاق كەڭىستىگىنە بىرىكتىرۋ.
ۇيىمداستىرۋشىلاردىڭ ايتۋىنشا, قازىلار القاسىنىڭ قۇرامىنا بەلگىلى مادەنيەت جانە ونەر قايراتكەرلەرى كىردى. ولار 13 ناۋرىز كۇنى بايقاۋدا وزىپ شىققانداردى انىقتايدى. وسى كۇنى ماراپاتتاۋ ءراسىمى دە وتەدى. ال بايقاۋدىڭ گالا-كونتسەرتى بالالاردى قورعاۋدىڭ حالىقارالىق كۇنى 1 ماۋسىمدا وتەدى. وعان 2 مىڭ بالا قاتىسادى دەپ جوسپارلانۋدا.
امانعالي قالجانوۆ