ەلوردادا 2018 جىلدىڭ اقپانىنان باستاپ «مەكتەپ جاسىنا دەيىنگى بالالار مەكەمەلەرىنە جولداما بەرۋ ءۇشىن مەكتەپ جاسىنا دەيىنگى بالالاردى كەزەككە قويۋ» جونىندە جاڭا مەملەكەتتىك ستاندارت ەنگىزىلدى. سونداي-اق, كەزەككە قويۋ رەتتىلىگى مەن بالاباقشاعا جولداما بەرۋدى اۆتوماتتاندىرۋ بويىنشا ادىستەمەلىك ۇسىنىس جاسالدى.
2 ساۋىردەن باستاپ ىسكە قوسىلاتىن جاڭارتىلعان جۇيەگە سايكەس, ءاربىر اكە-شەشە ەلەكتروندى تسيفرلى قولتاڭبا الۋى ءتيىس. 
استانا قالاسى ءبىلىم باسقارماسىنىڭ باسشىسى ءانۋار جانعوزين جۇيەنىڭ ارتىقشىلىقتارىمەن ءبولىستى. ەلەكتروندى تسيفرلىق قولتاڭبانى پايدالانا وتىرىپ, بالانىڭ اكە-شەشەسى www.e.astana.kz جۇيەسىنە كىرەدى. وندا بالاعا تيەسىلى مالىمەتتەردى تولتىرىپ, ءوز تەلەفون ءنومىرى مەن ەلەكتروندى پوشتاسىن قالدىرۋى ءتيىس. ەگەر جەڭىلدىك ساناتىنا جاتاتىن بولسا, ونى دا كورسەتۋ قاجەت. مۇنىڭ ءبارى جۇيەدە پايدا بولعان ورىن تۋرالى اقپاراتتى الىپ وتىرۋ ءۇشىن مىندەتتى تۇردە كەرەك.
جەڭىلدىك يەلەرىنە «ۇشتەن ءبىر» قاعيداسى جۇرەدى
كورسەتىلگەن ەلەكتروندى پوشتاعا جانە تەلەفون نومىرىنە كەزەكتىڭ كەلگەندىگى تۋرالى حابارلاما جىبەرىلەدى. «ەگەر اتا-انا تاڭەرتەڭگى ساعات 9-دان كەشكى 8-گە دەيىن بالاباقشانى تاڭداپ, جولدامانى وسى ۋاقىت مەرزىمىندە قابىلداپ الماسا, بۇل ورىن كەزەكتە تۇرعانداردىڭ بارىنە ورتاق بولماق. الايدا بالاباقشانى تاڭداماعان ءوتىنىش بەرۋشى كەزەكتە قالا بەرەدى» دەپ ءتۇسىندىردى ءانۋار جانعوزين. باسقارماداعىلاردىڭ پىكىرىنشە, بۇل كەزەكتىڭ جىلدام جىلجۋىنا مۇمكىندىك بەرەدى. ال بۇرىن حابارلاما كەلگەننەن كەيىن بالاباقشاداعى ورىن 5 كۇنگە دەيىن ساقتالاتىن بولعان.
اتا-انا ۇناعان مەكەمەنى تاڭداعاننان كەيىن, بالاعا جولداما بەرىلەدى. بەس جۇمىس كۇنى ىشىندە سول بالاباقشاعا بارۋ كەرەكتىگى ەسكەرىلەدى. ەگەر بەلگىلى ءبىر سەبەپتەرمەن 5 جۇمىس كۇنىندە ورىندى الۋ مۇمكىن بولماسا, ونى كۇنتىزبەلىك 30 كۇنگە دەيىن ۇزارتۋعا بولادى. ال, كەرىسىنشە, اتا-انا جولداما الىپ, 5 جۇمىس كۇنى ىشىندە بالاباقشاعا كەلمەسە, جولداما اۆتوماتتى تۇردە جارامسىز بولىپ شىعادى. ەگەر ءوتىنىش بەرۋشى جولدامانىڭ بەرىلگەن كۇنىنەن ەكى مارتە كەشىكسە, بالا اۆتوماتتى تۇردە كەزەكتەن الىنادى.
– ءبىزدىڭ پايىمداۋىمىزشا, كوپ جاعدايدا كەزەك ازايۋى ىقتيمال. دەگەنمەن كوبەيۋى دە عاجاپ ەمەس. بۇل جەڭىلدىك ساناتتاعى بالالار كەزەگىن ورنالاستىرۋعا بايلانىستى, – دەگەن باسقارما باسشىسى جەڭىلدىك جۇيەسىنە كىمدەر جاتاتىنىن ايتىپ بەردى.
ءبىرىنشى, كەزەكتەن تىس جولداما الاتىندار – اسكەري قىزمەتكەرلەردىڭ بالالارى. مەكتەپكە دەيىنگى ءبىلىم بەرۋ مەكەمەسىندە ورىن بولسا, بۇل كاتەگورياداعىلار كەزەكتەن تىس جولداما الادى. كەلەسى بولىپ ءبىرىنشى كەزەكتەگىلەر – مۇگەدەك بالالار, اتا-انا قاراۋىنسىز قالعاندار, جەتىمدەر, كوپ بالالى وتباسىنان شىققان بالالار, ەرەكشە كۇتىم مەن ءبىلىمدى قاجەت ەتەتىندەر. بۇل ساناتتاعىلار جولدامانى «ۇشتەن ءبىر» قاعيداسى بويىنشا الادى. ياعني جەڭىلدىك ساناتتاعى ءوتىنىش بەرۋشى جانە جالپى نەگىزدەگى ءۇش ءوتىنىش بەرۋشىگە قاتارىنان بەرىلەدى.
جەتى جاسقا تولعاندار كەزەكتەن شىعارىلادى
جاڭا جۇيە جەتى جاسقا تولعان بارلىق بالالاردى كەزەكتەن شىعارىپ تاستادى. سونىمەن قاتار, اتا-انا جىل بويى بالاباقشاعا ورىن الۋعا قىزىعۋشىلىق تانىتپاسا, كەزەكتەن شىعارىلادى. وعان جول بەرمەس ءۇشىن www.e.astana.kz جۇيەسىنە كىرىپ, ءوز ءوتىنىشىڭىزدى قاداعالاپ وتىرساڭىز بولعانى.
ەسكەرۋ كەرەك, ۇسىنىلعان دەرەكتەردىڭ زاڭدىلىعى تۋرالى سۇراق تۋىنداسا, جۇيە ءوتىنىش قابىلداۋدان باس تارتۋى مۇمكىن. 2017 جىلدىڭ قاڭتارىندا بالاباقشاداعى ورىنداردى ءبولۋدىڭ اشىقتىعىن قامتاماسىز ەتۋ ءۇشىن ەلورداداعى مەكتەپكە دەيىنگى ۇيىمدارعا, ونىڭ ىشىندە مەملەكەتتىك تاپسىرىسى بار جەكەمەنشىك بالاباقشالارعا اۆتوماتتى تۇردە جولداما بەرۋ جۇيەسى ىسكە قوسىلدى.
بۇگىنگى تاڭدا بۇل قىزمەت اتا-انالارعا www.e.astana.kz ءجۇيەسىندە ەلەكتروندى تسيفرلىق قولتاڭبانى پايدالانۋ ارقىلى قولجەتىمدى. وسى كۇنگە دەيىن جۇيە ارقىلى 25 مىڭنان استام جولداما بەرىلدى.
جاڭا جۇيە جان-جاقتى تۇسىندىرىلەدى
جىلدىڭ قورىتىندىسى بويىنشا تالداۋ جاسالىپ, جۇيەدە مەملەكەتتىك قىزمەت كورسەتۋدىڭ جاڭا ستاندارتىنا سايكەس فۋنكتسيونال كەڭەيتىلدى.
بالاباقشاعا جولداما الۋ كەزەگى اتا-انالاردىڭ وتىنىشىندە كورسەتىلگەندەي, بالانىڭ تۋعان جىلىنا سايكەس بىرىڭعاي قالالىق كەزەك بويىنشا جۇزەگە اسىپ, ناقتى ءبىر بالاباقشا كەزەگى بولمايدى. كەزەككە قويۋ رەتى ءوتىنىش بەرىلگەن كۇننەن باستالادى.
جۇيەنىڭ ارتىقشىلىعى ونىڭ تاۋلىك بويى جۇمىس ىستەيتىندىگى جانە پروتسەستى ۇزدىكسىز جۇرگىزىپ, ۇمىتكەرلەر اراسىندا بوس ورىنداردى بولۋگە مۇمكىندىك بەرۋىندە. مەكتەپكە دەيىنگى ۇيىمداردىڭ باسشىلارى تاراپىنان بوس ورىندار بويىنشا اقپارات جۇيەگە جىبەرىلىپ, سوعان سايكەس بوس ورىندار ءتىزىمى جاڭارتىلادى.
ازاماتتارعا كومەك رەتىندە قولداۋ قىزمەتىنىڭ جۇمىسى قاراستىرىلعان (تەلەفون: 46-67-56, akimat.itfactory@gmail.com), سونداي-اق باسقارما قىزمەتكەرلەرىنەن دە كومەك سۇراۋعا بولادى.
جاڭا جۇيەنى بۇگە-شۇگەسىنە دەيىن حالىققا ءتۇسىندىرۋ جۇمىستارىن جۇرگىزۋ ماقساتىندا 31 ناۋرىز, 7 جانە 14 ءساۋىر كۇندەرى قالالىق ەكى وقۋشىلار سارايىندا جانە №61 مەكتەپتە اشىق ەسىك كۇندەرى وتپەك.
قازىرگى تاڭدا ەلوردادا كەزەكتە تۇرعان بۇلدىرشىندەر سانى 26 مىڭعا جەتكەن. بالالاردى مەكتەپكە دەيىنگى بىلىممەن قامتاماسىز ەتۋ كورسەتكىشى 80 پايىزدى قۇرايدى.
اقىلى قىزمەت تە كورسەتىلەدى
بيىل ەلورداداعى مەملەكەتتىك جانە جەكەمەنشىك بالاباقشالارعا 24 مىڭ ادامعا دەيىن قابىلداۋ جوسپارلانۋدا.
تاعى ءبىر جاڭالىق, 2 ساۋىردەن باستاپ مەملەكەتتىك مەكتەپكە دەيىنگى مەكەمەلەرىنە اقىلى قىزمەت كورسەتۋگە رۇقسات ەتىلمەك. بۇدان بۇرىن وعان تىيىم سالىنعان بولاتىن. بالاباقشالاردا ستاندارت بويىنشا تەگىن نەگىزىندە كورسەتىلەتىن مىندەتتى قىزمەتتەر ءتىزىمى وزگەرىسسىز قالادى. اقىلى قىزمەتتەر تەك اتا-انالاردىڭ ءوتىنىشى بويىنشا شارتتىق نەگىزدە ۇسىنىلادى. ەلوردالىق بالاباقشالارىندا اقىلى ۇيىرمەلەردىڭ باعاسى شامامەن 1500-4500 تەڭگە ارالىعىندا بولماق. باسقارما باسشىسى ءانۋار جانعوزين بۇل باعا كوپشىلىككە قولجەتىمدى دەگەن ويدا. «ماسەلەن, حورەوگرافيا ساباقتارىنا ايىنا – 1500 تەڭگە, شەت تىلدەرى 2500 تەڭگە شاماسىندا تولەيسىز. ال سپورتتىق ۇيىرمەلەردىڭ باعاسى ودان قىمباتتىراق بولادى. سەبەبى ول ءۇشىن سىرتتان جاتتىقتىرۋشىلاردى تارتىپ, قاجەتتى قۇرال-جابدىقتاردى ساتىپ الۋ كەرەكپىز. بالالاردىڭ اكە-شەشەلەرى بالاباقشا مەڭگەرۋشىسىمەن كەلىسە وتىرىپ, بۇلدىرشىندەرگە قاجەتتى دەپ تاپقان ۇيىرمەنى ەنگىزۋگە ۇسىنىس جاسايدى» دەدى ول.
مامانداردى سىرتتان دا, مەكەمە ىشىنەن دە تابۋعا بولاتىنىن ايتقان ءانۋار جانعوزين بۇل باستاما بالاباقشا ماماندارىنىڭ كوڭىلگە قونىمسىز جالاقىسىنا ۇستەماقى رەتىندە قوسىمشا قارجى تابۋعا مۇمكىندىك بەرەتىنىنە سەنەدى.
گۇلدانا تالعاتقىزى
