بۇرىن حابارلاعانىمىزداي, ەسىل جاعالاۋى بويىنداعى امفيتەاتردىڭ ىشىنەن اياز اتانىڭ رەزيدەنتسياسى اشىلعان ەدى. استانالىق بالالار ارمان-تىلەگىن حاتقا ءتۇسىرىپ, سونداعى جاشىككە تاستاپ كەتىپ ءجۇر.
مۇندا كەلۋشى بۇلدىرشىندەردى اياز اتا مەن اقشاقاردان بولەك, ەلف, اققالا, بوتاقان جانە قوي سەكىلدى كەيىپكەرلەر دە قارسى الادى. ولار كىشكەنتاي قوناقتارعا رەزيدەنتسيانى ارالاتىپ, اياز اتانىڭ بولمەسىن, ءزاۋلىم شىرشا قۇرىلعان ساحنانى كورسەتەدى. امفيتەاتردىڭ باس اكىمشىسى تاميلا ەرمۇحامەدوۆانىڭ ايتۋىنشا, ەگەر پوشتاعا تۇسكەن حاتتىڭ يەسى بالالار ءۇيىنىڭ تاربيەلەنۋشىسى بولسا, وندا كونۆەرتتەر قالالىق اكىمدىككە جولدانادى. ادەتتە, مۇنداي بالدىرعاندار كونكي, قۋىرشاق ۇيشىگى, ۆەلوسيپەد, شاڭعى سەكىلدى زاتتار سۇرايدى ەكەن. ال رەزيدەنتسياعا اتا-اناسىمەن نەمەسە تۋىسىمەن بىرگە كەلەتىن بالاقايلاردىڭ حاتتارى ارتىنشا جانىنداعى جاڭاعى ەرەسەك كىسىگە تاپسىرىلادى. وسىلايشا اكە-شەشەلەرى دە ۇل-قىزدارىنىڭ نەنى ارماندايتىنىنان حاباردار بولادى, بالالار دا اياز اتاعا سەنۋلەرىن جالعاستىرا بەرەدى. ورايى كەلگەندە, ءبىز تاميلادان رەزيدەنتسياعا قانداي ەرەكشە مازمۇنداعى حاتتار كەلگەنىن سۇرادىق. ونداي حاتتاردى قىزمەتكەرلەر الگى بالالاردىڭ اتا-انالارىنىڭ رۇقساتىمەن ەستەلىككە سۋرەتكە ءتۇسىرىپ الادى ەكەن. ماسەلەن, ءجانيا ەسىمدى ءبۇلدىرشىن:
«قۇرمەتتى اياز اتا! كورشى پاتەردەگى ايارۋدىڭ كىشكەنتاي سىڭلىسىندەي مەنىڭ دە ءسىڭلىم بولعانىن قالايمىن. بىراق مامام بوپە ساتىپ الۋ ءۇشىن كوپ اقشا كەرەك دەپ ايتتى. وتىنەمىن, جاڭا جىلعا ءبىزدىڭ ۇيگە كوپ اقشا اكەلىڭىزشى!» دەگەن حات جازىپتى.
ال ايسۇلتان اتتى بالاقاي اياز اتادان ءوزى ءۇشىن ەمەس, اناسى ءۇشىن تىلەك تىلەپتى:
«اياز اتا! جاڭا جىلدا ماعان سىيلىق اكەلمەسەڭىز دە بولادى. مەن ۇلكەن جىگىت بولدىم عوي. بۇرىنعىداي شوكولاد سۇراپ جىلامايمىن. ونىڭ ورنىنا انامنىڭ نەسيەسىن تولەپ بەرىڭىزشى. «نەسيەنى تولەۋ كەرەك, سول ءۇشىن جۇمىستى كوپ ىستەۋىم كەرەك» دەيدى انام. قاتتى شارشايدى. مەن وعان كومەكتەسكىم كەلەدى» دەيدى ول ءوز حاتىندا.
قازىرگى بالالار سىيلىق سۇراۋدىڭ جاڭا ءتۇرىن دە ويلاپ تاپقانعا ۇقسايدى. مىسالى, سەگىز جاسار مانسۇردىڭ مىنا حاتىنا كوز سالىڭىز:
«قىمباتتى اياز اتا! مەن جىل بويى ءتارتىپتى وقۋشى بولدىم. بيىل ماتەماتيكادان 5-كە شىقتىم. سوندىقتان ماعان كۇننەن زاريادتالاتىن ماشينا سىيلاۋىڭىزدى سۇرايمىن. ونى اليەكسپرەستەن تابا الاسىز. 7000 تەڭگە تۇرادى» دەپ, سوڭىنا الگى ويىنشىقتىڭ AliExpress سايتىنداعى سىلتەمەسىن قولمەن جازىپ قالدىرىپتى. شاماسى, بالاقايدىڭ ءۇيىندە ونلاين دۇكەننەن ساۋدا جاساۋ تاجىريبەسى ءجيى قولدانىلاتىن بولسا كەرەك.
بۇدان بولەك, اياز اتادان كەڭ پاتەر, سمارتفون, ءۇي جانۋارىن, Nike Air Max كروسسوۆكاسىن cۇراعان استانالىق بالدىرعاندار دا بولىپتى. ايتپاقشى, ولاردىڭ ارقايسىسى اياز اتانىڭ مەكەنجايىن ءارتۇرلى ەتىپ ەلەستەتەتىن سەكىلدى. ءبىرى كونۆەرتتىڭ سىرتىنا «لاپلانديا» دەپ جازسا, ەندى ءبىرى «عارىش», «بايتەرەك», ءتىپتى «اقوردا» دەپ كورسەتىپتى.
استاناداعى اياز اتانىڭ رەزيدەنتسياسى 30 جەلتوقسانعا دەيىن جۇمىس ىستەيدى.
