قالالىق الەۋمەتتىك قىزمەت كورسەتۋ ورتالىعى 2016 جىلدىڭ ساۋىرىندە قۇرىلعان. ورتالىق مۇمكىندىگى شەكتەۋلى جاندارعا, سونىمەن قاتار جالعىزباستى قاريالارعا ارنايى قىزمەت كورسەتەدى. حالىقارالىق بالالار كۇنى مەرەكەسى قارساڭىندا ورتالىق ماماندارىنىڭ مۇرىندىق بولۋىمەن «پاراسات» مەيرامحاناسىندا «بالالار كۇلكىسى – الەمنىڭ نۇرى» اتتى مۇمكىندىگى شەكتەۋلى بالالارعا ارنالعان قايىرىمدىلىق شاراسى ءوتتى.
شارا بارىسىندا «سامۇرىق-قازىنا» ءال-اۋقات قورى, «قاسيەتتى جول» وڭالتۋ ورتالىعى جانە «كراۋنددەنت» ءتىس ەمحاناسىنىڭ قىزمەتكەرلەرى بالالاردى ءتول مەيرامدارىمەن قۇتتىقتادى. بالالار مەن اتا-انالارعا ارنايى داستارحان جايىلىپ, ويىن-ساۋىق باعدارلاماسىنا قۇرىلعان ەرتەڭگىلىكتە قازاق ەستراداسىنىڭ جۇلدىزدارى ونەر كورسەتىپ, جيىلعان قاۋىمدى شاتتىققا بولەدى.
كونتسەرتتىك باعدارلامادان وزگە كەش بارىسىندا استانا قالاسى جۇمىسپەن قامتۋ, ەڭبەك جانە الەۋمەتتىك قورعاۋ باسقارمالارى اتىنان ورتالىق ۇيىمداستىرعان بارشا ءىس-شارالارعا جانە بالالارىنىڭ ومىرىنە بەي-جاي قاراماي ءاردايىم بەلسەندىلىك تانىتقان اتا-انالار العىس حاتتارمەن ماراپاتتالدى. بۇدان وزگە قالالىق دەنساۋلىق ساقتاۋ باسقارماسى كاسىپوداعىنىڭ فيليالى ورتالىقتى ەدش بولمەسىنە ەڭبەكتەۋگە ارنالعان «تاسباقا» قۇرىلعىسى ءۇشىن اقشالاي سەرتيفيكات تابىستادى. «تازا نيەت-استانا» قوعامدىق قورى ورتالىققا سىيلىق رەتىندە «تەپە-تەڭدىك تاقتاسى» وڭالتۋ جابدىعىنىڭ ەكى داناسىن ساتىپ الۋ مۇمكىندىگىن بەرەتىن اقشالاي سەرتيفيكات ۇسىندى. «مۇنداي قايىرىمدىلىق شارالارىنىڭ ءجيى ءوتۋى مۇمكىندىگى شەكتەۋلى بالالاردىڭ كوڭىلىنە ءۇمىت وتىن جاعىپ, ەرتەڭگە دەگەن سەنىمدەرىن نىعايتارى حاق. ورتالىعىمىز اشىلعالى مۇنداي يگى شارالار وتە ءجيى وتەدى. مەيىرىمدى, قايىرىمدى ازاماتتارىمىز ارامىزدا وتە كوپ. بار جاقسىلىقتى بالالارعا قالاي جاساساق تا جاراسادى» دەدى ورتالىق باسشىسى رىستى بايماعامبەتوۆا.
سابينا سايلاۋباي
