جاقىندا نۇر-سۇلتان قالاسى ءماسليحاتىنىڭ دەپۋتاتى نۇرداۋلەت ورازحانوۆتىڭ اتىنا №38 كوشەدە ورنالاسقان «BINOM School» مەكتەپ-ليتسەيى وقۋشىلارىنىڭ اتا-انالارى اتىنان زيۋار جۇمانوۆا ءوتىنىش ءتۇسىردى. وتىنىشتە بالالاردىڭ مەكتەپكە جەتۋى بويىنشا بىرنەشە ماسەلە اتاپ كورسەتىلگەن.
ماسەلە مىنادا ەكەن: ءبىراز اتا-انا بالالارىن مەكتەپكە جەكە كولىكتەرىمەن اكەلەتىنى جاسىرىن ەمەس. الايدا مەكتەپتىڭ جانى كولىكتەردىڭ ۇلكەن اعىنىنا لايىقتالماعان. سول سەبەپتەن ءبىلىم نىسانى جانىندا كەپتەلىس پەن اپاتتى جاعدايلار ورىن الىپ جاتادى. ونىڭ ۇستىنە وقۋشىلاردىڭ جولى قۇرىلىس الاڭى ارقىلى وتەدى. تاعى ءبىر ماسەلە – مەكتەپ ماڭايىندا ايالداما جوق. سول سەبەپتەن اۆتوبۋستار وتە الىس توقتايدى. وسىنىڭ ءبارى اتا-انالار بالالاردىڭ قاۋىپسىزدىگىنە الاڭداۋعا نەگىز تۋدىرىپ وتىر.
قالالىق ماسليحاتقا حات تۇسكەننەن كەيىن قۇرامىندا نۇرداۋلەت ورازحانوۆ, نازگۇل ماقجان, سەرىك ءتۇسىپوۆ بار دەپۋتاتتىق توپ اتالمىش مەكتەپتە كەزدەسۋ ۇيىمداستىردى. وعان قۇرىلىس, كولىك جانە جول-كولىك ينفراقۇرىلىمىن دامىتۋ باسقارمالارى, پوليتسيا دەپارتامەنتى, ەسىل اۋدانى اكىمدىگى, «BI GROUP» حولدينگى مەن «City Transportation Systems» جشس وكىلدەرى قاتىستى. جيىنعا قاتىسقاندار مەكتەپكە جەتۋ پروبلەمالارىمەن تانىسىپ, وقۋشىلاردىڭ ءبىلىم نىسانىنا كەلۋ جولىمەن ءجۇرىپ ءوتتى.
– ارينە, وسىنداي زاماناۋي مەكتەپتەر كەرەك. ولار بالالاردىڭ ءبىلىم ساپاسىن ارتتىرادى. الايدا وقۋشىلاردىڭ قاۋىپسىزدىگى ءبىرىنشى ورىندا بولۋى كەرەك. مەكتەپتەردى, تۇرعىن ۇيلەردى سالۋدى باستاماي تۇرىپ قوعامدىق كولىكتىڭ قاتىناۋىن, ول ۇيلەردە تۇراتىن تۇرعىنداردىڭ, مەكتەپتە وقيتىن بالالاردىڭ جايلى تۇرمىسىن قاراستىرۋ قاجەت, – دەدى قالالىق ءماسليحات دەپۋتاتى نازگۇل ماقجان.
كەزدەسۋ قورىتىندىسىندا دەپۋتاتتار جاۋاپتى مەكەمەلەرگە بارلىق پروبلەمالاردى قىسقا مەرزىمدە شەشۋدى تاپسىردى. «City Transportation Systems» جشس قوعاممەن بايلانىس قىزمەتىنىڭ جەتەكشىسى ناۋات ازانباەۆا №28 اۆتوبۋس باعدارىن سوزۋدى ويلاستىراتىندارىن جەتكىزدى. ناتيجەسىندە 19 اقپاننان باستاپ اتالمىش باعدار مارشرۋتى سوزىلىپ, مەكتەپ جانىندا توقتايتىن بولدى.
