جاسوسپىرىمدەر اراسىنداعى قىلمىستىڭ الدىن الۋدى جاڭارتۋ جوباسىنىڭ ءبىرىنشى كەزەڭىنە 50 مىڭنان استام مەكتەپ وقۋشىلارى مەن كوللەدج ستۋدەنتتەرى تارتىلعان.
ال جاقىندا جوبانىڭ جەتىستىكتەرى مەن كەمشىلىكتەرىن وعان قاتىسقان ۆەدومستۆو باسشىلارى مەن عالىمدار قورىتىندىلادى.
استانا قالاسىنىڭ پروكۋرورى مارات دەمباەۆ جاسوسپىرىمدەر اراسىندا قىلمىستىڭ سانىن ازايتۋ ءۇشىن ونىڭ الدىن الۋعا جاستاردىڭ ءوزىن تارتقاندارىن ايتتى. قالالىق ستاتيستيكا مالىمەتتەرىنە سەنسەك, «زاڭعا قايشى ارەكەتتەرگە كوبىنەسە تۇرمىسى ناشار وتباسىلاردىڭ بالالارى بارادى» دەگەن پىكىر شىندىققا جاناسپايدى ەكەن.
«بىلتىر استانالىق جاسوسپىرىمدەر جاساعان 206 قۇقىق بۇزۋشىلىق تىركەلگەن ەدى, بۇل 2014-2015 جىلعى كورسەتكىشپەن سالىستىرعاندا ەكى ەسە كوپ. جاستاردىڭ باسىم كوپشىلىگى ۇرلىققا بارىپ جاتادى. اكىمدىكپەن, ءبىلىم بەرۋ ورىندارىمەن جانە ىشكى ىستەر دەپارتامەنتىمەن بىرلەسكەن جۇمىستىڭ ارقاسىندا 4 ايدىڭ ىشىندە جاقسى ناتيجەگە قول جەتكىزدىك. ناقتىراق ايتساق, جاسوسپىرىمدەر قىلمىسى 36 پايىزعا, ال يۋۆەنالدى پوليتسيا ەسەبىندە تۇرعان كامەلەتكە تولماعاندار سانى 25 پايىزعا ازايدى. ءبىر قۋانتارلىعى, جوبا اياسىندا قالا مەكتەپتەرىنىڭ بىرىندە وقۋشىلاردىڭ مەكتەپكە بارۋ كورسەتكىشى 10 پايىزعا جوعارىلاعان» دەپ قالا پروكۋرورىنىڭ اعا كومەكشىسى دانا مۋلاكوۆا جوبا ناتيجەلەرىمەن ءبولىستى.
سونداي-اق, نازارباەۆ ۋنيۆەرسيتەتىنىڭ پروفەسسورى, پەداگوگيكا عىلىمدارىنىڭ كانديداتى فەدور ۆاسسەرماننىڭ ويلاپ تاپقان الەۋمەتتىك جوباسى جاسوسپىرىمدەردى تارتىپكە سالۋعا كومەكتەسكەن كورىنەدى. «بيوينفورماتيكا جانە سينەرگەتيكا» (بيس) دەپ اتالاتىن ءبىلىم بەرۋ تەحنولوگياسى وقۋشىلار ۇجىمىنداعى ءوزىن-ءوزى باسقارۋ جۇيەسى دەۋگە بولادى. جوباعا سايكەس, جاۋاپكەرشىلىكتى سەزىنگەن بالالار وزدەرىنە قاتىستى بارلىق باستامالارعا بەلسەنە اتسالىسىپ, مەكتەپتەگى ءتارتىپتى ساقتاپ, شىعارماشىلىقتارىن دامىتادى.
جوباعا قاتىسۋشىلار مەكتەپ دەمالىسى كەزىندە قۇقىق قورعاۋ ورگاندارى اكادەمياسىندا ءتالىم الدى. سونداي-اق, وقۋشىلار قالامىزدىڭ جوعارى وقۋ ورىندارى مەن جەتەكشى مەكەمەلەردە بولىپ, وزدەرىن قىزىقتىرعان ماماندىقتىڭ قىر-سىرىمەن تانىستى.
گۇلدانا تالعاتقىزى
