بالالارعا ارنالعان جاڭا جىلدىق شىرشا شاراسى جالعاسىن تاۋىپ جاتىر. بۇل جولى ماحامبەت وتەمىسۇلى اتىنداعى وقۋشىلار سارايىندا استانا قالالىق قازاقستان حالقى اسسامبلەياسى بالالارعا ارنالعان جاڭا جىلدىق شىرشا وتكىزدى.
«مەيىرىمدى قالا» قايىرىمدىلىق اكتسياسى اياسىندا ۇيىمداستىرىلعان شاراعا از قامتىلعان جانە كوپ بالالى وتباسىلاردىڭ بالالارى قاتىستى. ءبىر جارىم ساعاتتىق «ەرتەگىلەر جارمەڭكەسى» ينتەراكتيۆتى شوۋى اياسىندا بالالارعا قىزىقتى ويىندار ۇسىنىلدى. اتالعان قايىرىمدىلىق اكتسيا استانالىق قازاقستان حالقى اسسامبلەياسىنىڭ مۇشەسى, قر پارلامەنتى ءماجىلىسىنىڭ دەپۋتاتى شاكىر حاحازوۆتىڭ قولداۋىمەن ۇيىمداستىرىلدى.
– قالالىق اسسامبلەيا وسىنداي قايىرىمدىلىق اكتسيالارىن ۇنەمى وتكىزىپ وتىرادى. ماسەلەن, ءبىز وسى جىلدىڭ باسىنان بەرى «قايىرىمدىلىق كەرۋەنىنە» قاتىسىپ, بىرنەشە بالانى قامقورلىققا الدىق. سونداي-اق, «مەكتەپكە جول» اكتسياسى اياسىندا ەتنومادەني ورتالىققا تىركەلگەن وتباسىلاردىڭ بالالارىن كيىم-كەشەكپەن قامتاماسىز ەتتىك, – دەيدى استانا قالالىق قحا حاتشىلىعىنىڭ وكىلى گالينا كوبزەۆا.
بالالار تەك قانا جاڭا جىلدىق شىرشا ويىندارىنا قاتىسىپ قويماي, مەرەكەگە وراي ءتاتتى سىيلىقتار الدى.
سەرىك قۇدايبەرگەنۇلى
