بالالار شىعارماشىلىعىنىڭ باستاۋى
ەلوردادا وتكىزىلىپ جاتقان شارالاردىڭ كوبىسىن «EXPO-2017» حالىقارالىق كورمەسىمەن بايلانىستىرىپ جاتاتىنىمىز جاسىرىن ەمەس. بەيبىتشىلىك جانە كەلىسىم سارايىندا بالالار مەن جاسوسپىرىمدەر اراسىندا وتكەن «شاتتىق-2017» شىعارماشىلىق بايقاۋىنىڭ گالا-كونتسەرتى دە بۇل ۇردىستەن قالىس قالمادى.
وسىمەن 11-رەت بايقاۋ تالانتتى جاستارعا ەسىگىن ايقارا اشتى. فەستيۆال ەلوردامىزدىڭ جاقسى داستۇرىنە اينالدى. ءدال وسى بايقاۋ ارقىلى جاس ونەرپازدار بويىنداعى دارىنىن جالپاق جۇرتقا جاريا ەتىپ, ۇلكەن ساحناعا جولداما الىپ جاتىر.
مەرەكەلىك كەشتە «نۇر وتان» پارتياسىنىڭ استانا قالالىق فيليالى توراعاسىنىڭ ورىنباسارى ەدىل مامىتبەكوۆ قالا اكىمى اسەت يسەكەشەۆتىڭ قۇتتىقتاۋ ءسوزىن جەتكىزدى.
– فەستيۆالدە جەڭىمپاز اتانعان جاستاردى شىن جۇرەكتەن قۇتتىقتايمىن. بۇل جەڭىس, ەڭ الدىمەن, وقۋشىلار مەن ولاردىڭ اكە-شەشەلەرىنىڭ, ۇستازدارىنىڭ ەڭبەگى. كونكۋرس الداعى EXPO كورمەسىنىڭ اياسىندا وتكىزىلىپ جاتقانى – ءبىز ءۇشىن ەرەكشە ءمارتەبە. ءبىزدىڭ مىندەت – 25 جىلدا جەتكەن جەتىستىكتەرىمىزدى پاش
ەتۋ, قازاقي قوناقجايلىق تانىتىپ, ۇلتىمىزعا ءتان قاسيەتتەرمەن ءبولىسۋ. بۇگىنگى شاراعا قاتىسىپ وتىرعان جاس دارىندارىمىز بولاشاقتا ەلىمىزدىڭ تۋىن بيىككە كوتەرەتىن ازاماتتار بولاتىنىنا سەنەمىن, – دەدى ول.
ءيا, راسىمەن دە, «شەتەلدىك قوناقتاردى نەمەن تاڭقالدىرامىز؟» دەپ دال بولۋدىڭ قاجەتى جوق. «شاتتىق» فەستيۆالىنىڭ ماڭايىندا ەلوردامىزدىڭ ەڭ تالانتتى ونەرپازدارى شوعىرلانعان. ۇلتتىق ءان, ۇلتتىق كيىم, مىڭ بۇرالعان بيشىلەر مەن دومبىرانىڭ قۇلاعىندا وينايتىن قىز-جىگىتتەر – وسىنىڭ ءبارى – ۇلتتىق كولوريت, ۇلتتىق برەند. سوزىمە دالەل بولسىن, 2015 جىلى ميلاندا وتكەن EXPO كورمەسىندە قازاقستاندىق پاۆيلونعا كەلۋشىلەردىڭ قاتارى كوپ بولدى.
ونى شەتەلدە جۇرگەن قانداستارىمىز دا, ەل نامىسىن قورعاپ, كورمەگە اتسالىسقاندار دا ايتقان ەدى.
كونتسەرتتىك باعدارلامادا كورەرمەن دۇنيەجۇزىلىك كورمەنىڭ تاريحىمەن تانىستى. ونەرپازدار EXPO كورمەسى العاش ۇيىمداستىرىلعان ۇلىبريتانياعا, ونىڭ ءىزىن جالعاعان فرانتسيا, اقش, گەرمانيا جانە باسقا ەلدەرگە ساپار شەگىپ, تەاترلاندىرىلعان مۋزىكالىق قويىلىم قويدى.
فەستيۆالدىڭ بيىلعى ءبىر ەرەكشەلىگى ونىڭ قازاق, ورىس جانە اعىلشىن تىلدەرىندە ءجۇرگىزىلۋى بولدى.
11 جىل ىشىندە «شاتتىق» شىعارماشىلىق قالالىق بايقاۋى استانالىق ءبىلىم بەرۋ ۇيىمدارىنىڭ اراسىندا باستى جوباعا اينالدى. بيىل بايقاۋعا 6000-نان استام ءوتىنىم كەلىپ ءتۇستى, ونىڭ 4000-عا جۋىعى نەگىزگى اينالىمعا جولداما الدى. بالالار مەن ءجاسوسپىرىمدەر مۋزىكا, حورەوگرافيا, فوتوسۋرەت, تەاتر, بەينەلەۋ ونەرى, حور, ۆوكال, سونى جانرلارى جانە كيىم ديزاينى بويىنشا ءوزارا باسەكەلەستى.
بايقاۋ قورىتىندىسى بويىنشا جەڭىمپازدارعا 32 التىن, 55 كۇمىس جانە 79 قولا ستاتۋەتكالارى سالتاناتتى تۇردە تابىس ەتىلدى.
گۇلدانا تالعاتقىزى