Kids Go Free جوباسىنىڭ مۇمكىندىگىن پايدالانىپ, 300-دەن استام بالا تەگىن ۇشتى. بۇل تۋرالى مادەنيەت جانە سپورت ۆيتسە-ءمينيسترى ەرجان ەركىنباەۆ ءمالىم ەتتى.
بيىل ەلىمىزدە Kids Go Free جوباسى قاناتقاقتى رەجيمدە ىسكە قوسىلدى. اتالعان باعدارلاما 2-17 جاستاعى بالالار مەن جاسوسپىرىمدەرگە ەل ىشىندە ساياحات جاساعاندا تەگىن ۇشۋعا مۇمكىندىك بەرەدى.
– Kids Go Free بيىل قاڭتاردا ىسكە قوسىلدى. بۇگىندە كوپتەگەن تۋريستىك كومپانيا اتالعان باعدارلامامەن جۇمىس ىستەپ جاتىر. باستى شارت ءجاسوسپىرىم كامەلەت جاسىنا تولماعان بولۋى كەرەك. ياعني وتباسىلىق تۋريستىك جولداما ساتىپ العان كەزدە بالالارى تەگىن ۇشا الادى. ونىڭ اقىسىن تۋريستىك كومپانيا كوتەرەدى, – دەدى ەرجان ەركىنباەۆ.
ونىڭ ايتۋىنشا, بيىلعى جوسپارعا سايكەس, 15 مىڭ بالاعا دەيىن Kids Go Free جوباسىنىڭ مۇمكىندىگىن پايدالانا الادى.
– وسى كۇنگە دەيىن 300 بالا تەگىن ۇشتى. تاعى 700 بالا جولداما الدى, ولار ەندى ساياحاتتايدى. ءجيى سۇرانىسقا يە ايماقتار – الماتى, تۇركىستان جانە ماڭعىستاۋ. ەگەر جوبانى قولدانۋشىلار سانى ءبىزدىڭ جوسپاردان اسىپ كەتسە, وندا قوسىمشا قارجى سۇرايتىن بولامىز, – دەيدى ول.
Kids Go Free جوباسى قالاي جۇمىس ىستەيتىنى تۋرالى Kazakh Tourism اق ۇلتتىق كومپانياسىنىڭ باسقارۋشى ديرەكتورى دانيەل سەرجانۇلى تۇسىنىك جاساعان ەدى.
– Kids Go Free جوباسىنىڭ اتاۋىنا قاراپ كوبىسى شاتاستىرىپ جاتادى. ياعني اتاۋىندا «بالا» ءسوزى بولعاندىقتان, تەك قانا بالالارعا ارنالعان دەپ ويلايدى. ال نەگىزىندە Kids Go Free – وتباسىلىق ءتۋريزمدى دامىتۋعا ارنالعان باعدارلاما. اتالعان جوبا تىكەلەي بالالارعا قاتىستى. دەگەنمەن ولار ساياساتتاعاندا قاسىندا اتا-اناسى, باۋىرى نەمەسە باسقا دا جاقىن ادامدار بولادى. Kids Go Free-گە قاتىستى ەكىنشى جايت, بۇل باعدارلامانى ساياحاتتاۋ تۋرىن سالالىق فيرما نەمەسە تۋريستىك وپەراتورلاردان ساتىپ العاندا عانا قولدانۋعا بولادى. دەمەك, وتباسى وزدىگىنەن ساياحاتتاپ جۇرسە, بۇل مۇمكىندىكتى قولدانا المايدى. مىندەتتى تۇردە تۋر ساتىپ الۋى ءتيىس, – دەدى ول.
