استانا قالالىق ءماسليحاتىنىڭ دەپۋتاتتارى ەلورداداعى الەۋمەتتىك مەكەمەلەردە بولىپ, ونداعى تىنىس-تىرشىلىكپەن تانىستى. ەڭ اۋەلى دەپۋتاتتار استانا قالاسى اكىمدىگىنىڭ مامانداندىرىلعان بالالار ۇيىندە بولدى.
مامانداندىرىلعان بالالار ءۇيىنىڭ باس دارىگەرى ساۋلە كەنجەباەۆانىڭ ايتۋىنشا, مەكەمە 100 بالاعا ارنالعان. الايدا قازىرگى تاڭدا بالالار ۇيىندە 79 بالا تاربيەلەنىپ جاتىر. بالالاردىڭ 34-ىنەن اتا-انالارى باس تارتسا, 31 تاستاندى, ال 1 جەتىم بالا بولىپ سانالادى. سونداي-اق, 13 بالانى اتا-انالارى وسى مەكەمەگە ۋاقىتشا قاراۋعا قالدىرعان. ءبىر قۋانتارلىق جاعداي, اتالعان مەكەمەدە تاربيەلەنۋشى بالالاردىڭ سانى جىل وتكەن سايىن ازايىپ كەلە جاتىر. ماسەلەن, بالالار ۇيىندە 2015 جىلى 82 بالا بولسا, وتكەن جىلى 88 بالا مەكەن ەتكەن. ويتكەنى ەلىمىزدىڭ ازاماتتارى اتالعان مەكەمەدەن بالا اسىراپ الۋعا قىزىعۋشىلىق تانىتىپ وتىر.
بۇدان كەيىن ءماسليحات دەپۋتاتتارى استانا قالاسى اكىمدىگىنىڭ بالالار ۇيىندە بولىپ, تاربيەلەنۋشىلەرمەن كەزدەستى. ديرەكتوردىڭ مىندەتىن اتقارۋشى وكسانا دزيۋبا بالالار ءۇيىنىڭ 170 بالاعا ارنالعانىن ايتادى. الايدا ءدال قازىرگى تاڭدا مەكەمەدە 116 بالا تاربيەلەنىپ جاتىر. سونداي-اق ول بالالار ۇيىندە تاربيەلەنىپ جاتقان جەتكىنشەكتەردىڭ مەملەكەتتىك تىلدە ەركىن سويلەيتىنىن ماقتانىشپەن ايتىپ ءوتتى. ءيا, ەلىمىزدە تۇراتىن دياسپورا وكىلدەرىنىڭ قازاق ءتىلىن مەڭگەرگەنى – ماقتانۋعا تۇرارلىق جايت. سەبەبى مەملەكەت باسشىسى نۇرسۇلتان نازارباەۆ «قازاقستاننىڭ بولاشاعى – قازاق تىلىندە» دەپ تەكتەن تەك ايتقان جوق.
بۇگىندە «زورلىق-زومبىلىق نەمەسە زورلىق-زومبىلىق سالدارىنان قيىن جاعدايعا تاپ بولعان ادامدارعا ارنالعان داعدارىس ورتالىعى» كوپتەگەن ادامدارعا پانا بولىپ وتىر. ايتالىق, 50 ادامعا ارنالعان ورتالىققا 18 بەن 58 جاس ارالىعىنداعى ايەلدەر كەلىپ, ۋاقىتشا كومەك الادى. مەكەمە باسشىسى عاليا ءنۋريدىڭ ايتۋىنشا, جىلدان جىلعا ورتالىققا كەلىپ كومەك العىسى كەلەتىن جانداردىڭ سانى ارتقان. ماسەلەن, 2013 جىلى 2 ايەل,
7 بالا, ياعني, بارلىعى 9 ادام ورتالىقتىڭ كومەگىنە جۇگىنگەن. سونداي-اق, 2014 جىلى ورتالىقتى 110, 2015 جىلى 148, 2016 جىلى 237 ادام پانالاعان. ال بيىلعى جىلدىڭ ءبىرىنشى توقسانىندا 134 ادام كومەك سۇراپ كەلگەن.
ءماسليحات دەپۋتاتتارى كوپشىلىك قاۋىم وسىنداي ورتالىقتىڭ بار ەكەنىن بىلمەيتىنىن, سوندىقتان دا مەكەمەنىڭ مەكەن-جايىن ءارتۇرلى جەرلەرگە جاريالاۋ كەرەك ەكەنىن ەسكەرتتى. الايدا عاليا نۋري ورتالىقتىڭ مەكەن-جايىن جاريالاساق, كەيبىر ايەلدەردىڭ كۇيەۋلەرى ىزدەپ كەلىپ, مازانى الاتىنىن العا تارتىپ وتىر.
سەرىك جولداسباي
