ەلوردا ستۋدەنتتەرى مەن پەداگوگتارى اراسىندا قالالىق «ەكى جۇلدىز» مۋزىكالىق بايقاۋى ءوتتى. نۇر-سۇلتان قالاسى مادەنيەت جانە ءبىلىم باسقارمالارىنىڭ قولداۋىمەن وتكەن شارانى «Astana Polytechnic» جوعارى كوللەدجى ۇيىمداستىردى.
بايقاۋدىڭ نەگىزگى ماقساتى – ەلوردا جاستارى اراسىنداعى دارىندى وقۋشىلاردى قولداۋ, رۋحاني قۇندىلىق الماسۋ. ءان دوداسىنا جوعارى وقۋ ورىندارى مەن تەحنيكالىق جانە كاسىپتىك ءبىلىم بەرۋ ۇيىمدارىنان 16 جۇپ قاتىستى. قاتىسۋشىلار بالالار جىلىنا وراي جاندى داۋىستا تاقىرىپتىق اندەردى ءۇش تىلدە شىرقادى. كورەرمەن نازارىنا حالىق اندەرى مەن وتاندىق, شەتەلدىك اۆتورلاردىڭ شىعارمالارىنىڭ رەپەرتۋارى ۇسىنىلدى. بايقاۋ بارىسىندا جۇپتار ءان ايتىپ قانا قويماي, تەاترلاندىرىلعان كورىنىس پەن حورەوگرافيالىق قويىلىم كورسەتتى.
قازىلار القاسى ارنايى شاقىرىلعان بىلىكتىلىگى جوعارى, ونەر سالاسىنىڭ مايتالماندارىنان قۇرالعان. ناقتىراق ايتساق, قر كومپوزيتورلار وداعىنىڭ توراعاسى سەرىكجان ءابدىنۇروۆ, ە.راحماديەۆ اتىنداعى مەملەكەتتىك اكادەميالىق فيلارمونياسى ەسترادالىق جانە كلاسسيكالىق ۆوكال ءبولىمىنىڭ كوركەمدىك جەتەكشىسى ارايلىم راقىمقىزى, قر «ۇلتتىق ۇلان» ءانسامبلىنىڭ كوركەمدىك جەتەكشىسى دارحان راحىمعاليەۆ, بەيبىتشىلىك جانە كەلىسىم سارايىنىڭ ديرەكتورى ناريما مۇحامبەتالينا جانە ە.راحماديەۆ اتىنداعى مەملەكەتتىك اكادەميالىق فيلارمونيانىڭ ءانشىسى, رەسپۋبليكالىق جانە حالىقارالىق بايقاۋ جۇلدەگەرى ايدىن جۇماباەۆ تورەلىك ەتتى. قازىلار القاسى قاتىسۋشىلاردىڭ ءاندى ورىنداۋ شەبەرلىگىن, ورىندالاتىن ءاننىڭ تاقىرىپتىق مازمۇنىنا سايكەستىگىن, ورىنداۋشىلاردىڭ ساحنالىق مادەنيەتىن باعالادى.
قاتىسۋشىلاردىڭ ىشىندە «شيپاگەر» مەديتسينالىق كوللەدجى ورىنداعان «ءسابي باقىتى» ءانى كەلۋشىلەردى تولقىتتى. قازتۇتىنۋوداعىنىڭ جوعارى ساۋدا ەكونوميكالىق كوللەدجى ورىنداعان «سەن ءۇشىن» ءانىنىڭ كوركەمدىك سيۋجەتى كورەرمەن تاراپىنان ىستىق ىقىلاسقا بولەندى. ءاربىر ستۋدەنت ءوز وقۋ ورىندارىنا بەلسەندى جانكۇيەر بولدى. ءان بايقاۋىن استانا حالىقارالىق ۋنيۆەرسيتەتىنىڭ پەداگوگيكالىق كوللەدجى «قازاق ەلى وسىنداي» انىمەن اياقتادى. بايقاۋ ناتيجەسىندە ءى ورىنعا «Astana Polytechnic» جوعارى كوللەدجى, ءىى ورىنعا «شيپاگەر» مەديتسينالىق كوللەدجى, ءىىى ورىنعا استانا حالىقارالىق ۋنيۆەرسيتەتىنىڭ پەداگوگيكالىق كوللەدجى يە بولدى. جەڭىمپازدارعا قارجىلاي سىيلىق تابىس ەتىلدى. اتاپ ايتقاندا, ءى ورىنعا 150 مىڭ تەڭگە, ءىى ورىنعا 100 مىڭ تەڭگە, ءىىى ورىنعا 70 مىڭ تەڭگە بەرىلدى.
بايان اسىلبەكوۆا
