استانالىق ونەر وشاقتارى جاڭا جىل قارساڭىندا كىشكەنتاي كورەرمەندەرگە ءتۇرلى قىزىقتى قويىلىمداردى ۇسىنۋدى باستادى. ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى ە.شۆارتستىڭ «كۇلشە قىز», ال جاستار تەاترى ۆ.ورلوۆتىڭ «التىن بالاپان» شىعارماسىنىڭ جەلىسىمەن «مەيىرىمدى جۇرەك» ەرتەگىلەرىنىڭ پرەمەراسىن وتكىزدى. بۇل ەرتەگىلەردى بالدىرعاندار 30 جەلتوقسانعا دەيىن تاماشالاي الادى.
قاللەكي تەاترىندا قويىلعان «كۇلشە قىزدى» رەجيسسەر جۇلدىزبەك جۇمانباي ساحنالادى. ەرتەگىنىڭ قويۋشى سۋرەتشىسى – شىنار ەلەمباەۆا.
ەرتەگىنىڭ جەلىسى بارىمىزگە بالا كەزدەن تانىس. كۇلشە قىز – وگەي شەشەسى مەن ونىڭ ەكى قىزىنان تەپەرىش كورىپ, ءوز ۇيىندە ءوزى كۇڭ بولعان مەيىرىمدى دە سۇلۋ قىز. كۇندەردىڭ كۇنى پاتشا سارايىندا جاس بيكەشتەرگە ارنالعان ساۋىق كەشى وتەدى. كۇلشە قىز دا سول كەشكە بارعىسى كەلەدى. بىراق جەتىمدىك پەن جوقشىلىق اياعىنا تۇساۋ بولادى. سوڭىندا قايىرىمدى پەرى ۇستىنە ادەمى كويلەك, جالتىراعان شىنى كەبىس كيگىزىپ, سيقىرلى كۇيمەمەن ساۋىق كەشىنە جىبەرەدى. ول جەردە ول ءوزىنىڭ حانزاداسىن جولىقتىرادى. ءبىر كەبىسىن جوعالتقان ونى حانزاداسى سول ارقىلى اقىرى تاۋىپ الادى.
كۇلشە قىز بەينەسىندە دارىندى جاس اكتريسا اقمارال تاناباەۆا, ال حانزادانىڭ رولىندە نۇرسۇلتان ەسەن كورىنەتىنىن ايتا كەتەيىك.
«مەيىرىمدى جۇرەك» ەرتەگىسىنىڭ قويۋشى رەجيسسەرى – بەيبىت قۇسانباەۆ. وندا بالاپان مەن قاسقىردىڭ دوستىعى تۋرالى باياندالادى. دۇرىسىن ايتساق, بالاپاننىڭ مەيىرىمدى جۇرەگىنە كوكجال ءتانتى بولىپ, ونى باۋىرىنا باسادى. بۇل ەرتەگىدە وسى ەكى كەيىپكەرگە قوسا, تۇلكى مەن باقالار بەينەسى بار. مەيىرىمدىلىك پەن تاتۋلىقتى تۋ ەتكەن قويىلىم بالالاردى ءسوزسىز قىزىقتىرادى. ەرتەگىنىڭ العاشقى كورەرمەندەرى دە بۇل قويىلىمنان جاقسى اسەر العانىن ايتادى.
«مەيىرىمدى جۇرەككە» كەلىپ, بالنۇر مەن رايانا ەسىمدى ءسۇپ-سۇيكىمدى پەرىشتەلەرمەن بىرگە ەرتەگىلەر ەلىنە ساپار شەگىپ قايتتىق. ساياحاتىمىز ۇناعان سەكىلدى: بالالار ءماز, ولارعا قاراپ, ءبىز دە شات-شادىمان. وسىنداي ءايبات سەزىمدى باستان كەشۋگە سەبەپكەر بولعان قويىلىم رەجيسسەرى – بەيبىت قۇسانباەۆ پەن تەاتردىڭ بارشا قىز-جىگىتتەرىنە تاۋداي العىس» دەيدى نازەركە جۇماباي اتتى تەاتر كورەرمەنى.
«مەيىرىمدى جۇرەك» ەرتەگىسىن 30 جەلتوقسانعا دەيىن وقۋشىلار سارايى ساحناسىنان كۇندەلىكتى ساعات: 10.00, 13.00 جانە 16.00-دە تاماشالاۋعا بولادى.
امانعالي قالجانوۆ
