ەلىمىز بويىنشا بالالارعا 2021 جىلدىڭ 8 ايىندا مىندەتتى الەۋمەتتىك مەديتسينالىق ساقتاندىرۋ قاراجاتى ەسەبىنەن 2,4 ملرد تەڭگە سوماسىنا 582 جوعارى تەحنولوگيالىق وتا جاسالدى. مۇنداي ءبىر وتانىڭ ورتاشا قۇنى 4 ملن تەڭگەدەن اسادى. سونىڭ ىشىندە ەلورداداعى بالالارعا 278 جوعارى تەحنولوگيالىق وتا جاسالعان.
الەۋمەتتىك مەديتسينالىق ساقتاندىرۋ قورى ەلوردا فيليالى ءباسپاسوز قىزمەتىنىڭ دەرەگى بويىنشا جوعارى تەحنولوگيالىق مەديتسينالىق قىزمەتتەر دياگنوستيكا مەن ەمدەۋدىڭ يننوۆاتسيالىق, بىرەگەي ادىستەرىنىڭ كومەگىمەن جۇرگىزىلەدى. مۇنداي قىزمەتتەر كورسەتىلەتىن بالالاردا ءجيى كەزدەسەتىن دياگنوزدار – قان اينالىمى جۇيەسىنىڭ, گەنيتۋرارلى جۇيەنىڭ, اس قورىتۋ جۇيەسىنىڭ, ەندوكريندىك جۇيەنىڭ اۋرۋلارى جانە تۋا بىتكەن اقاۋلار. جىل باسىنان بەرى 198 بالا كوحلەارلىق ەستۋ اپپاراتتارىن يمپلانتاتسيالاۋدىڭ ارقاسىندا ەستۋ مۇمكىندىگىنە يە بولدى, 172 پاتسيەنت جۇرەك قىزمەتىن قالپىنا كەلتىردى, 67 بالانىڭ نەسەپ-جىنىس جۇيەسى ورگاندارىنا وتا جاسالدى. قازاقستاندىق ماماندار قان مەن سۇيەك كەمىگىنىڭ ونكولوگيالىق اۋرۋلارىن ەمدەۋ كەزىندە 22 اللوگەندىك جانە 5 اۋتولوگيالىق سۇيەك كەمىگىن ترانسپلانتاتسيالادى.
الەۋمەتتىك مەديتسينالىق ساقتاندىرۋ قورى قازاقستاندىق دارىگەرلەردىڭ وقۋىنا جانە بىلىكتىلىگىن ارتتىرۋىنا اقى تولەيدى. شەتەلدىك مامانداردى تارتا وتىرىپ شەبەرلىك كلاستار وتكىزۋ, بەيىندى وتاندىق دارىگەرلەردىڭ, ياعني ونكولوگتار, گەماتولوگتار, وفتالمولوگتار, انگيوحيرۋرگتەر قازاقستاندىق اۋرۋحانالار مەن عزي-دا ەنگىزىلەتىن جاڭا تەحنولوگيالاردى مەڭگەرۋىنە, ولاردى ۇيرەتۋگە مۇمكىندىك بەرەدى. بيىل شەبەرلىك كلاسس اياسىندا 8 بالاعا ينتراوكۋليارلى رەتينوبلاستومامەن سەلەكتيۆتى ارتەريالىق حيميوتەراپيا جۇرگىزىلدى, بۇل قاتەرلى ىسىكتەردى ەمدەۋگە كومەكتەستى. 5 بالاعا كومەي جانە كەڭىردەك ستەنوزىمەن ءتۇرلى رەكونسترۋكتيۆتى وپەراتسيالار جاسالدى, 1 بالاعا حالىقارالىق تىركەلىمنەن باعانالىق جاسۋشالاردى جەتكىزۋ ارقىلى تۋىس ەمەس دونوردان گەموپوەزدىك ءدىڭ جاسۋشالارىن اللوگەندى ترانسپلانتتاۋ جۇرگىزىلدى.
