استانا قالاسى ءدىن ىستەرى جونىندەگى باسقارمانىڭ باستاماسىمەن «قازىرگى قوعامداعى بۋللينگ ماسەلەسى» تاقىرىبىندا دوڭگەلەك ۇستەل ۇيىمداستىرىلدى.
اتالعان ءىس-شاراعا استانا قالاسى اكىمدىگىنىڭ كامەلەتكە تولماعاندار ءىسى جونىندەگى جانە ولاردىڭ قۇقىعىن قورعاۋ جونىندەگى كوميسسيا مۇشەلەرى, استانا قالاسى ءدىني بىرلەستىكتەر وكىلدەرى جانە قوعامدىق بىرلەستىكتەر وكىلدەرىنىڭ قاتىسۋىمەن ءوتتى.
مەملەكەت باسشىسى قاسىم-جومارت توقاەۆ 2021 جىلعى قاڭتاردا VII سايلانعان پارلامەنتتىڭ ءبىرىنشى سەسسياسىنىڭ اشىلۋىندا بالالاردىڭ قۇقىعىن قورعاۋ, ولاردىڭ قاۋىپسىزدىگىن قامتاماسىز ەتۋ جانە بۋللينگتىڭ الدىن الۋ ماسەلەلەرىن شەشۋ ءۇشىن شارالار قابىلداۋ قاجەتتىگى تۋرالى ايتقانى بەلگىلى.
دىندەردى زەرتتەۋ ورتالىعىنىڭ تەولوگى ارمان نۇراحمەتۇلى جۇرگىزىپ وتىرعان جيىنعا استانا قالاسى ءدىن ىستەرى باسقارماسىنىڭ باس مامانى جانار مۇحامەدجان, استانا قالاسى اكىمدىگىنىڭ ادىستەمەلىك ورتالىعى پسيحولوگيالىق سۇيەمەلدەۋ ءبولىمىنىڭ ادىسكەرى تالجىبەك ساتىمبەكوۆا, «قادىر-قاسيەت» ادام قۇقىعى فوكۋسى: ايەلدەر مەن بالالار جوباسىنىڭ ۇيلەستىرۋشىسى تاڭات ەسەنعۇلوۆ, باس ءمۇفتيدىڭ كەڭەسشىسى بيجىگىت قويشيەۆ, ۋسپەن كافەدرالدى سوبورىنىڭ كليۋچارى دميتري بايدەك, «استاناداعى قاسيەتتى ءماريام ريم-كاتوليك ارحيەپارحياسى» دب وكىلى پەتر پىتلوۆانى, «استانا قالاسى «اگاپە» قاسيەتتى ەلۋلىكتىڭ حريستياندىق شىركەۋى» جدب باسشىسى يگور تساي, ۇەۇ وكىلدەرى, تاعى باسقالار قاتىستى.
دوڭگەلەك ۇستەلگە قاتىسقاندار بۇل تاقىرىپتىڭ ەرەكشە ماڭىزىن, ونىڭ قوعامداعى بىرلىك پەن يگىلىكتى ساقتاۋداعى الاتىن ەرەكشە ءرولىن اتاپ ءوتتى.
– قازىرگى قوعامداعى بۋللينگتىڭ الدىن الۋ ماسەلەسى ۇلكەن ماڭىزعا يە, ويتكەنى ونىڭ سالدارى ادامنىڭ جەكە تۇلعالىق دامۋىنا تىكەلەي تەرىس اسەر ەتۋدە. بۋللينگ – بۇل قازىرگى تاڭداعى وتە وزەكتى ماسەلەنىڭ ءبىرى. قازاقستاندا ءاربىر ءۇشىنشى ءجاسوسپىرىم بۋللينگتىڭ قۇربانىنا اينالادى. بۋللينگ فيزيكالىق كۇش كورسەتۋدەن عانا تۇرمايدى. كوبىنەسە پسيحولوگيالىق قىسىم كورسەتەدى: جامان سوزدەر ايتۋ, قورلاۋ, كەلەمەجدەۋ, وسەك پەن وتىرىك سوزدەر تاراتۋ جانە شەتتەتۋدەن تۇرادى. بالا جانىنداعى قۇرداستارىنان الشاقتاپ, ءوزىن جالعىز سەزىنىپ سۋيتسيدكە بارۋى مۇمكىن. بۋللينگ ماسەلەسىنە مەملەكەت باسشىسى ەرەكشە ءمان بەرىپ وتىرعانى ايان. سوندىقتان بۇگىنگى وتىرىسىمىز مەملەكەتىمىزدىڭ بولاشاعىنا, حالقىمىزدىڭ, بالالارىمىزدىڭ فيزيكالىق قانا ەمەس, سونىمەن قاتار, مەنتالدى دەنساۋلىعىنا باعىتتالعان, – دەدى جانار مۇحامەدجان.
دوڭگەلەك ۇستەلگە قاتىسقان سپيكەرلەر قوعامدا بەلەڭ العان بۇل پروبلەمانىڭ قاۋىپتىلىگىن جانە تەز ارادا قوعام بولىپ مۇنىڭ الدىن الۋ ارەكەتىن ءسوز ەتتى. وتىرىستىڭ قورىتىندىسى بويىنشا بالالاردىڭ قۇقىعىن قورعاۋعا تىكەلەي بايلانىستى بارلىق كورسەتىلگەن ماسەلەلەر بويىنشا ۇسىنىمدار ازىرلەندى. وعان قاتىسۋشىلار بالالاردى قورقىتىپ-ۇركىتۋگە تىيىم سالىپ, ونى ءار مەكتەپتىڭ جارعىسىندا بەكىتۋ كەرەك دەگەن ورتاق پىكىرگە كەلدى. ءبىرىنشى كەزەكتەگى مىندەت – وقۋشىلار اراسىندا قۇقىقتىق ءبىلىمدى ارتتىرۋ.
