ەلباسى نۇرسۇلتان نازارباەۆتىڭ باستاماسىمەن كورەرمەنگە جول تارتقان «بالاپان» تەلەارناسى بۇگىن 6 جاسقا تولدى. وسىعان وراي «حانشاتىر» ويىن-ساۋىق ورتالىعىندا «الاقاي, تۋعان كۇن!» اتتى مەرەكەلىك شارا ءوتتى. مىڭداعان استانالىق ءبۇلدىرشىن تىكەلەي ەفيردەگى ءتۇسىرىلىمگە قاتىسىپ, الماتى, شىمكەنت, قىزىلوردا قالالارىمەن بايلانىسقا شىقتى.
بالالار «بالاپاننىڭ» تۋعان كۇنىن باس قالادا ەرەكشە تويلادى. «حانشاتىردا» جينالعان ەلوردالىقتار كەشكە دەيىن تەاترلاندىرىلعان كورىنىستەر مەن تانىمال شوۋ باعدارلامالاردى تاماشالادى. Led-ەكرانداعى كاراوكەدەن بۇلدىرشىندەر تەلەارنانىڭ حيت اندەرىن قوسىلا شىرقادى. ال, ساحنادا استانانىڭ شىعارماشىلىق ۇجىمدارى ونەر كورسەتىپ, ۇتىس لوتەرەيالارى ويناتىلدى. تسيركتەن ارنايى اكەلىنگەن مايمىلدىڭ ونەرى كوپشىلىكتى ءتانتى قىلدى. مەرەكەلىك تارتۋ سابىن كوپىرشىكتەرىن قىزىقتاۋمەن جالعاستى. سيقىرشىلار شوۋى دا كىشكەنتاي كورەرمەندەردى تاڭعالدىرماي قويمادى.
ەڭ قىزىعى, «حانشاتىردىڭ» اتريۋمى ناعىز شەبەرحاناعا اينالدى. ۇيىمداستىرىلعان ۇيىرمەلەردىڭ ءبىرى – «ون ساۋساق» باعدارلاماسىنىڭ سىيى ەڭ كوپ بالاقايدىڭ باسىن قوستى. قيالدارىن ورتاعا سالعان ۇل-قىزدار دايىن قۇرالداردى پايدالانا وتىرىپ قاۋىرسىندى قىلقالام, ەرەكشە بەتبەلگى, مونشاق, اشىقحات سەكىلدى ءتۇرلى قولونەر بۇيىمدارىن دايىندادى. قىزىعۋشىلىق تانىتقانداردىڭ كوپتىگى سونشا ۇيىمداستىرۋشىلار اكەلگەن زاتتار لەزدە تاۋسىلىپ جاتتى. ماسەلەن, نەبارى جارتى ساعاتتا «ون ساۋساققا» 400-گە جۋىق بالا كەلىپ ۇلگەرگەن ەكەن.
كەش بارىسىندا كىلت سوزدەر ارقىلى «بالاپاننىڭ» باعدارلامالارى مەن مۋلتفيلمدەرىن تابۋ ۆيكتوريناسى ويناتىلدى. بارلىق سۇراققا دۇرىس جاۋاپ بەرگەن ايگەرىم ەسىمدى بالاقاي ۆەلوسيپەد تىزگىندەپ, تەلەارنانى جاڭا جاسىمەن قۇتتىقتادى.
مەرەكەلىك باعدارلاما «بالاپاننىڭ» ءانۇرانىن حورمەن شىرقاۋمەن اياقتالدى.
ايتا كەتەيىك, وسكەلەڭ ۇرپاقتىڭ ءبىلىم مەن تاربيەسىنە زور ۇلەسىن قوسىپ كەلە جاتقان تەلەارنا اشىلعالى بەرى تالاي بيىكتى باعىندىردى. التى جىل ىشىندە كورەرمەن نازارىنا تەلەارنانىڭ 300-دەن اسا وزىندىك ءونىمى ۇسىنىلدى. Disney, DreamWorks, SONY, Nickelodeon, Iconic سەكىلدى الەمگە بەلگىلى كومپانيالاردىڭ ونىمدەرىن دۋبلياجداپ, العاشقىلاردىڭ ءبىرى بولىپ وتاندىق تەلەارناعا شىعاردى.
«بالاپاننىڭ» كونتەنتى دە جىل سايىن جاڭارىپ كەلەدى. مىسالى بيىل ءۇش ءتىلدى ەركىن مەڭگەرۋگە كومەكتەسەتىن «اۆس+», شىعارماشىلىقتى ناسيحاتتايتىن «بالاپان جۇلدىز» سەكىلدى جوبالار قوسىلدى. سپورتتىق-ينتەللەكتۋالدىق «شىتىرمان» باعدارلاماسىنا قاتىسۋعا ىنتالى كورەمەندەردىڭ سانى دا جىل سايىن ارتىپ كەلەدى. «كۆەست» لوگيكالىق تاپسىرمالاردى ورىنداپ, توپپەن جۇمىس ىستەۋگە بەيىمدەسە, «كىشكەنتاي ەينشتەين» تابيعات قۇبىلىستارى, جەر جانە اسپان كەڭىستىگىنىڭ قۇپيالارىمەن تانىسىپ, بالالاردى قىزىقتىراتىن سۇراقتارعا عىلىمي تۇرعىدا جاۋاپ بەرەدى.
الداعى ۋاقىتتا دا «بالاپان» ءوسىپ-جەتىلىپ, جاس ۇرپاقتىڭ مادەني تۇلعاسىن قالىپتاستىرىپ, ءبىلىم مەن عىلىمنىڭ شىڭىنا شىعار ازامات بولىپ ەرجەتۋىنە ىقپال جاسايتىنىنا سەنىمىمىز مول.
ءمادينا جاقىپ
