باقىلاۋ كۇشەيتىلەدى

كەشە سايلاۋالدى بەيپارتيالىق باقىلاۋ ورتالىعىندا 2021 جىلى 10 قاڭتاردا وتەتىن پارلامەنت ءماجىلىسى مەن ءماسليحات دەپۋتاتتارىنىڭ سايلاۋ الدىنداعى دايىندىق جانە ۇگىت-ناسيحات جۇمىستارىن تالقىلاۋ ماقساتىندا سايلاۋعا قاتىساتىن پارتيالاردىڭ وكىلدەرىمەن كەزدەسۋ ءوتتى.

ەلىمىزدەگى جەتەكشى پارتيا – Nur Otan پارتيا­سىمەن وتكەن كەزدەسۋگە پارتيا ورتالىق اپپارات باسشىسىنىڭ ورىنباسارى – قۇقىقتىق قامتاماسىز ەتۋ باسقارماسىنىڭ باسشىسى ارمان كاپەسوۆ, پارتيانىڭ ساياسي جۇمىس دەپارتامەنتىنىڭ ديرەكتورى ەرلان قارابالاەۆ جانە ونىڭ ورىنباسارى گۇلبيعاش وماروۆا قاتىستى.
كەزدەسۋدە الداعى سايلاۋدى زاڭداعى تالاپتار بويىنشا ءادىل ءارى تابىستى وتكىزۋدىڭ تەتىكتەرى مەن پارتيانىڭ سايلاۋعا دايىندىق ماسەلەلەرى تالقىلاندى. تالقى بارىسىندا ەرلان جاعىپپارۇلى ەلىمىزدەگى 10 مىڭنان ارتىق سايلاۋ ورنىنا Nur Otan پارتياسى اتىنان 28 مىڭ ادام بايقاۋ­شىلىق جاسايتىنىن ايتسا, سايلاۋالدى بەيپارتيالىق ورتالىق وكىلدەرى ورتالىق اتىنان 18 مىڭ بايقاۋشى قاتىساتىنىن جەتكىزدى.
– Nur Otan پارتياسى بۇل جولعى سايلاۋعا تىڭعىلىقتى دايىندىق جاسادى. ماسليحاتقا 3000-نان اسا كانديداتتى, ماجىلىسكە 126 ۇمىتكەردى ۇسىندىق. قازىرگى تاڭدا ۇگىت-ناسيحات جۇمىستارى زاڭناماعا سايكەس جۇرگىزىلىپ جاتىر. سايلاۋ كۇنى پارتيامىز ءوزىنىڭ سەنىمدى وكىلدەرىن جىبەرۋ ارقىلى سايلاۋدىڭ اشىق ءارى ءادىل ءوتۋىن قاداعالايدى. وسى تۇرعىدان العاندا, كەزدەسۋدىڭ ءمانى بولەك, – دەدى ەرلان جاعىپپارۇلى.
ايتا كەتەيىك, سايلاۋ­الدى بەيپارتيالىق باقىلاۋ ورتالىعى ازاماتتىق اليانسىنىڭ باستاماسىمەن بيىل 10 جەلتوقساندا قۇرىلعان. «ورتالىعىمىز ۇكىمەتتىك ەمەس ۇيىمداردىڭ ءبىر بىرلەستىگى رەتىندە ءارتۇرلى ۇەۇ-نىڭ كۇش-جىگەرىن شوعىرلاندىرۋعا جانە بارلىق پارتيالىق ەمەس باقىلاۋشىلارمەن ىنتىماقتاستىق ورناتۋعا كۇش سالاتىن ۇيىم رەتىندە قۇرىلدى. ورتالىعىمىز سايلاۋ ۋچاسكەلەرىن بارىنشا قامتۋ ءۇشىن ەڭ جاقسى الەمدىك ستاندارتتارعا ساي باقىلاۋشىلاردى دا­يىندايدى» دەدى ورتالىق باسشىسى بانۋ نۇرعازيەۆا.