باعانى تۇراقتاندىرۋ ماقساتىندا استانا قالاسىنىڭ اكىمدىگى كۇن سايىن ازىق-تۇلىك تاۋارلارى باعاسىن قاداعالاپ وتىرادى. اسىرەسە, كۇندەلىكتى ءىشىپ-جەيتىن ۇن-نان, ماكارون ونىمدەرى, ەت-ءسۇت پەن كوكونىستەردىڭ باعاسى ەرەكشە نازاردا.
ەلوردانىڭ ءىرى ساۋدا ورتالىقتارىنداعى اتالعان ونىمدەردىڭ ساتىلۋ باعاسىن ساراپتاي كەلە كوپشىلىككە قولجەتىمدى قۇنىن شىعارىپ وتىرمىز. مىسالى, ءبىرىنشى سۇرىپتى بيداي ۇنىن «شاپاعات» بازارىندا 87-95 تەڭگە ارالىعىندا ساتىپ الۋعا بولادى. وسى ۇننىڭ باعاسى «ماگنۋمدا» 145 تەڭگە, «استىقجان» ساۋدا ورتالىعىندا 159 تەڭگە تۇرادى. ءدال وسى سۇرىپتاعى ۇننان جاسالعان ناننىڭ كەلىسى «شاپاعاتتا» 50-80 تەڭگە, «ماگنۋمدا» 75 تەڭگە بولسا «استىقجاندا» 80 تەڭگەدەن ساتىپ وتىر. ماكارون ءونىمىنىڭ ورتاشا باعاسى 160 تەڭگە, ال «شاپاعاتتان» 10 تەڭگەگە تومەن باعامەن الاسىز. قانتتىڭ كەلىسى 260 تەڭگەنى ۇستاپ تۇر. «ماگنۋمدا» كۇنباعىس مايى 315 تەڭگە تۇرادى.
كوكونىستەردىڭ دە باعاسى ەداۋىر ءتۇستى. كارتوپتىڭ باعاسى «شاپاعاتتا» 135 تەڭگە بولسا, بيىلعى جىلدىڭ جاس ءسابىزىنىڭ باعاسى 220 تەڭگەدەن باستالادى. ءبىرىنشى ساناتتاعى تاۋىق جۇمىرتقاسىنىڭ ون داناسىن 150 تەڭگەدەن «شاپاعاتتان» ساتىپ الۋعا بولادى. سيىر ەتىن 1500-دەن تاڭداپ ءجۇرىپ تاباسىز. تاۋىق ەتىن قالاساڭىز, 500-600 تەڭگەنىڭ اينالىسىندا. اعارعاننىڭ ارزانىن ىزدەسەڭىز, وندا ءسۇتتىڭ ءليترى 150 تەڭگەدەن باستالادى. سوڭعى اتالعان ساۋدا ورتالىقتارىندا 225 تەڭگەگە دەيىن جەتەدى.
اپتانىڭ سوڭىندا 22-23 شىلدەدە ادەتتەگىدەي اتىراۋ, اقتوبە جانە وڭتۇستىك قازاقستان وبلىستارىنىڭ تاۋار وندىرۋشىلەرىنىڭ كەزەكتى جارمەڭكەسى وتەتىنىن ەستەرىڭىزگە سالا كەتەلىك. جارمەڭكەگە ۇزىن-ىرعاسى 735 توننا اۋىلشارۋاشىلىق ونىمدەرى شىعارىلادى. ونىڭ ىشىندە 206 توننا ەت, 53,5 توننا ءسۇت ونىمدەرى, 200 توننادان استام كارتوپ, كوكونىس پەن جەمىستەر, 76 توننا باقشا ونىمدەرى, 15 تونناعا جۋىق بالىق, 26 مىڭ جۇمىرتقا جانە تاعى باسقا كوپتەگەن ازىق-تۇلىك ساتىلادى.
ەلوردالىقتارعا جاقسى تانىس 50-دەن استام وتاندىق كاسىپورىندارى قاتىسپاق. ونىڭ ىشىندە «ايس» جشس, «روكوس» جشس, «امانگەلدى» جشس, «مولوچنىە يستوري» جشس, «گرينحاۋس كازاحستان» جشس سياقتى ازىق-تۇلىك تاۋارلارىن وندىرۋشىلەرى بار.
ايگۇل ۋايسوۆا
