«استانا وپەرا» سوليستەرى, حورى جانە سيمفونيالىق وركەسترى كسرو حالىق ءارتىسى ەرمەك سەركەباەۆتىڭ 95 جىلدىعىنا ارنالعان گالا-وپەرا ۇسىندى. اڭىزعا اينالعان ءانشى ورىنداعان تۋىندىلاردان قۇرالعان باعدارلاماعا ۇلتتىق جانە الەمدىك وپەرالاردان اريالار, رومانستار مەن اسپاپتىق شىعارمالار ەندى.
ەرمەك سەركەباەۆتىڭ ەسىمى شەتەلدە دە ەرەكشە تانىمال. كەرەمەت داۋىس پەن تاماشا ارتىستىك قابىلەت يەسى «باريتوندار كورولى» دەگەن اتاققا يە. كەزىندە مۋسليم ماگوماەۆ ونى «كەڭەس وداعىنداعى ۇزدىك فيگارو» دەپ اتاعان ەدى, سەبەبى وسى پارتيامەن ەرمەك سەركەباەۆ تۇتاس كسرو مەن ەۋروپا ەلدەرىندە ونەر كورسەتىپ, ءدۇيىم جۇرتتى ءتانتى ەتكەن بولاتىن. وپەرالىق, كامەرالىق, سونىمەن قاتار ەسترادالىق رەپەرتۋارىمەن ءانشى دۇنيە ءجۇزى بويىنشا تالاي گاسترولدىك ساپارلارعا شىقتى, وتاندىق كينونىڭ التىن قورىنا ەنگەن «ءبىزدىڭ سۇيىكتى دارىگەر», «تاقيالى پەرىشتە» فيلمدەرىندە ەستە قالارلىق رولدەردى سومداپ, كينەماتوگرافتا جارقىن ءىز قالدىردى.
گالا-وپەرا ەرمەك سەركەباەۆ تۋرالى بەينەفيلم كورسەتىلىمىنەن باستالدى, كەيىن قازاقستاننىڭ ەڭبەك سىڭىرگەن قايراتكەرى ابزال ءمۇحيتديننىڭ جەتەكشىلىگىمەن «استانا وپەرا» سيمفونيالىق وركەسترى ا.سەركەباەۆتىڭ «توميريس» وپەراسىنان «قاسقىر» كۇيىن ورىندادى.
كەشتە قازاقستاننىڭ ەڭبەك سىڭىرگەن قايراتكەرلەرى تالعات مۇساباەۆ, جانات شىبىقباەۆ, مەدەت چوتاباەۆ, ازامات جىلتىركوزوۆ, مەيىر باينەش, جۇپار عابدۋللينا, بيبىگۇل جانۇزاق, مارگاريتا دۆورەتسكايا, كەرەمەت سوليستەر تاتيانا ۆيتسينسكايا, ەۆگەني چاينيكوۆ, گۇلدانا الدادوسوۆا, راسۋل جارماعامبەتوۆ, شىڭعىس راسىلحان, رامزات بالاكيشيەۆ, سايان يسين, سونداي-اق قازاقستاننىڭ ەڭبەك سىڭىرگەن قايراتكەرى ەرجان ءداۋىتوۆتىڭ جەتەكشىلىگىمەن «استانا وپەرا» حورىنىڭ ورىنداۋىنداعى ەڭ ۇزدىك وپەرالىق جانە اسپاپتىق شىعارمالار شىرقالدى.
ا.جۇبانوۆ پەن ل.ءحاميديدىڭ «اباي», ە.راحماديەۆتىڭ «قامار سۇلۋ», دج.ۆەرديدىڭ «اتتيلا», پ.چايكوۆسكيدىڭ «يولانتا», دج.ءروسسينيدىڭ «سەۆيلدىك شاشتاراز» وپەرالارىنان اريالار, دج.ۆەرديدىڭ «دون كارلوس», «ايدا» جانە گ.دونيتسەتتيدىڭ «ماحاببات سۋسىنى» وپەرالارىنان دۋەتتەر, دج.ءپۋچيننيدىڭ «توسكا» وپەراسىنان حور ءنومىرى بولدى.
مازمۇندى باعدارلاما «استانا وپەرا» تەاترىنىڭ بارلىق سوليستەرى, حورى جانە سيمفونيالىق وركەسترىنىڭ قاتىسۋىمەن «ءبىزدىڭ سۇيىكتى دارىگەر» كينوفيلمىنەن ا.زاتسەپيننىڭ «نادو منوي نەبو سينەە» تۋىندىسىمەن اياقتالدى.
