مادەنيەت جانە سپورت مينيسترلىگى ءتىل ساياساتى كوميتەتىنىڭ تاپسىرماسىمەن ش.شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعى وزگە ۇلت وكىلدەرى اراسىندا «مەن قازاقشا سويلەيمىن!» شاراسىن جاريالاعان ەدى. بايقاۋدىڭ شارتى بويىنشا ۇمىتكەر قازاقتىڭ «باتىرلار جىرىنان» بىرەۋىن جاتقا مانەرلەپ وقىپ بەرۋگە ءتيىس بولاتىن.
«ءتىل-قازىنا» ورتالىعىنىڭ باس ديرەكتورى, جازۋشى الىبەك اسقاردىڭ سوزىنە زەر سالساق, بايگەگە ەلىمىزدىڭ ون ءتورت ءوڭىرى مەن ءۇش قالاسىنان ەڭبەكتەگەن سابيدەن ەڭكەيگەن كارىگە دەيىن 20 ەتنوس وكىلىنەن قۇرالعان 243 ۇمىتكەر قاتىسىپتى. «قوبىلاندى باتىر» جىرى بايقاۋ بارىسىندا 76 رەت تولعانسا, ودان كەيىن «الپامىس باتىر» ەپوسى تۇر.
قاتىسۋشىلاردىڭ جاس ەرەكشەلىگىنە كوز جۇگىرتسەك, ەڭ جاسى نۇر-سۇلتان قالاسى «بايتەرەك» بالاباقشاسىنىڭ تاربيەلەنۋشىسى 5 جاسار ماريا بولسا, ۇلكەنى شىمكەنت قالاسىنىڭ تۇرعىنى, زەينەتكەر ناسيما فاتكۋلبايانوۆا ەكەن. سونىمەن بايقاۋدىڭ قورىتىندىسىنا توقتالساق, «باتىرلار جىرىنان» ءۇزىندىنى مانەرلەپ جاتقا وقىپ, ەڭ كوپ «ۇنايدى» بەلگىسىن جيناپ, قازاق ءتىلىن بارىنشا ناسيحاتتاعان پاۆلودار وبلىسى ەكىباستۇز قالاسى №25 قازاق قىزدار گيمنازياسىنىڭ 11-سىنىپ وقۋشىسى ينەسسا لەگكايا, اقتوبە وبلىسى العا اۋدانى بالالار مەن جاسوسپىرىمدەر سپورت مەكتەبىنىڭ جاتتىقتىرۋشى-وقىتۋشىسى يلونا كاراساەۆا, تۇركىستان وبلىسى سوزاق اۋدانىنىڭ تۇرعىنى سيتارا اشيرمەت, تاراز قالاسى «حابار-24» تەلەارناسىنىڭ ءتىلشىسى ۆيكتوريا ترەگۋبوۆا, تۇركىستان وبلىسى سارىاعاش اۋدانى, ارىستانباپ جوعارى كوللەدجىنىڭ 2-كۋرس ستۋدەنتى ينديرا راۆان-ناحچيۆاني جۇلدەگەر بولىپ تانىلدى. بۇدان باسقا دا مانەرلەپ وقىپ, شەبەرلىك كورسەتكەن تاعى ون ۇزدىك قاتىسۋشى قر مادەنيەت جانە سپورت مينيسترلىگى ءتىل ساياساتى كوميتەتىنىڭ ديپلومىمەن ماراپاتتالدى.
