بۇقارالىق اقپارات قۇرالدارى قىزمەتكەرلەرى كۇنىنە وراي نۇر-سۇلتان قالاسىنىڭ اكىمى التاي كولگىنوۆ «Elorda Aqparat» ۇجىمىمەن كەزدەسىپ, جۋرناليستەردى كاسىبي مەرەكەسىمەن قۇتتىقتادى.
كەزدەسۋگە اكىممەن قاتار نۇر-سۇلتان قالاسى ىشكى ساياسات باسقارماسىنىڭ باسشىسى داۋرەن بابامۇراتوۆ, قالالىق باسقارمالاردىڭ, اۋداندىق اكىمدىكتەردىڭ ءباسپاسوز حاتشىلارى قاتىستى.
«Elorda Aqparat» مەدياحولدينگىنىڭ قۇرامىنا «استانا اقشامى», «ۆەچەرنيايا استانا» گازەتتەرى مەن «Elorda.info» جەلىلىك باسىلىمى كىرەدى.
باس قالانىڭ باستى باسىلىمدارى – «استانا اقشامى» مەن «ۆەچەرنيايا استانا» گازەتتەرى 1990 جىلدان باستاپ شىعادى. «استانا اقشامى» گازەتى بۇدان بۇرىن مەملەكەت باسشىسىنىڭ العىس حاتى مەن «نۇر-سۇڭقار» سىيلىعىن يەلەنگەن بولاتىن.
التاي كولگىنوۆ مەملەكەت باسشىسىنىڭ, اكىمدىكتىڭ جۇمىسىن, قالاداعى قوعامدىق-ساياسي جانە الەۋمەتتىك-ەكونوميكالىق سالالاردا ءتۇرلى باستامالاردىڭ جۇزەگە اسىرۋ بارىسىن اقپاراتتىق قولداۋدا مەدياحولدينگتىڭ ءرولى ماڭىزدى ەكەنىن باسا ايتتى.
«باس شاھاردىڭ تىنىسىنا اينالىپ ۇلگەرگەن ۇجىم قىزمەتكەرلەرىنە جۇكتەلەتىن مىندەت قاشان دا جاۋاپتى ءارى كۇردەلى.
بارشاڭىزدى بۇگىنگى مەرەكەمەن شىن جۇرەكتەن قۇتتىقتايمىن. سىزدەر باس قالاداعى جاڭالىقتىڭ جارشىسىنا اينالدىڭىزدار. كۇنى كەشە مەملەكەت باسشىسىنىڭ العىس حاتى «ۆەچەرنيايا استانا» قوعامدىق-ساياسي گازەتىنىڭ شىعارماشىلىق ۇجىمىنا تابىستالعان بولاتىن. بۇل – سىزدەردىڭ ەڭبەكتەرىڭىزدىڭ جەمىسى. پرەزيدەنت قاسىم-
جومارت توقاەۆ ايتقانداي, قازىرگى اقپارات ايدىنىندا جالعان اقپاراتتاردى تاراتۋشىلار كوبەيىپ كەتتى. وسىنداي كۇردەلى جاعدايدا جاڭالىقتاردى وبەكتيۆتى تۇردە بەرۋدە كاسىبيلىك ماڭىزدى. اقپارات اعىنىنا ىلەسۋ وتە ۇلكەن ەڭبەكتى تالاپ ەتەدى. ءبىزدىڭ اتقارىپ جاتقان جۇمىستارىمىز ەلوردالىقتارعا سىزدەر ارقىلى جەتەدى. بۇل ۇجىم قالا تۇرعىندارى مەن اكىمدىكتىڭ اراسىن جالعاپ تۇرعان التىن كوپىرگە اينالدى» دەدى شاھار باسشىسى.
قالا باسشىسى التاي سەيدىرۇلى ارقايسىسى اپتا سايىن 15 مىڭ دانامەن وقىرمانعا جەتىپ جاتقان باسىلىمداردىڭ شەجىرەسىمەن, تىنىس-تىرشىلىگىمەن, سونداي-اق سايتتىڭ جۇمىسىمەن ءجىتى تانىسىپ شىقتى.
– رەداكتسيا جۇمىسىمەن تانىسۋ بارىسىندا Elorda.info سايتىنا جىل باسىنان بەرى كىرۋشىلەر سانى 1,16 ملن ادامعا جەتكەنىن بايقادىم. ءتىپتى, سايت جاڭالىقتارى رەسپۋبليكالىق تەلەارنالاردان دا بەرىلەدى. بۇل – جاقسى كورسەتكىش. ەڭبەكتەرىڭىز جانا بەرسىن. شىعارماشىلىق شابىت, تولاعاي تابىس تىلەيمىن, – دەدى قالا اكىمى.
مەرەكەلىك جيىن بارىسىندا ەلوردا اكىمى التاي كولگىنوۆ مەدياحولدينگ قىزمەتكەرلەرىنە جانە اكىمدىكتىڭ, قالا باسقارماسىنىڭ, اۋدان اكىمدىكتەرىنىڭ ءباسپاسوز حاتشىلارىنا قۇتتىقتاۋ حات تابىستادى.
سونىمەن قاتار كەزدەسۋدە اكىم ۇجىم قىزمەتكەرلەرىمەن اڭگىمەلەسىپ, ولاردىڭ كوكەيىندە جۇرگەن سۇراقتارعا جاۋاپ بەردى. ولاردىڭ پروبلەمالارىن, ونىڭ ىشىندە ۇجىم قىزمەتكەرلەرىنىڭ جالاقىسىن كوتەرۋ ماسەلەسىن شەشۋگە ۋادە ەتتى.
«تىلشىلەر كۇندەلىكتى جەدەل ءارى سەنىمدى اقپارات تاراتىپ, ءتۇرلى تاقىرىپتاعى ماسەلەلەردى قوزعايدى. ۇجىم قىزمەتكەرلەرى پاندەميامەن كۇرەس, قاڭتار وقيعاسى, رەفەرەندۋم كەزىندە دە قالا تۇرعىندارىن سەنىمدى جانە وزەكتى اقپاراتتان حاباردار ەتىپ, الدىڭعى شەپتە قىزمەت ەتتى» دەدى شاھار باسشىسى.
مەدياحولدينگ باسشىسى ەرلان قارابالاەۆ تا ارىپتەستەرىنە ءوز قۇتتىقتاۋىن ارناپ, جيىن سوڭىندا «ۆەچەرنيايا استانا» گازەتى باس رەداكتورىنىڭ ورىنباسارى شولپان اقبالاەۆا مەن «استانا اقشامى» باسىلىمىنىڭ شولۋشىسى امانعالي قالجانوۆقا «اقپارات سالاسىنىڭ ۇزدىگى» توسبەلگىسىن تابىستادى.
گۇلبارشىن
وكەشقىزى
