«استانا! بىرگە جارقىرايمىز!» اتتى اۋقىمدى ەكولوگيالىق فەستيۆال ەلوردادان باستاۋ الدى. «حان شاتىر» ساۋدا-ويىن-ساۋىق ورتالىعىندا وتكەن يگى شارا ەندى شىمكەنت, اقتاۋ جانە الماتى قالالارىندا جالعاسادى.
قوعامدىق ماڭىزدى باستامالاردى دامىتۋ قورى ەكولوگيالىق فەستيۆالدى بۇۇ دامۋ باعدارلاماسى مەن استانا اكىمدىگىنىڭ قولداۋىمەن ۇيىمداستىردى. وعان 4000 مىڭعا جۋىق ەلوردالىق وقۋشىلار قاتىستى. شارا اياسىندا بالالار «مەن اقىلدى قالامدى سۇيەمىن!» ۇرانىمەن ءتۇرلى ويىندار مەن شەبەرلىك ساعاتتارىنا قاتىستى. جەتكىنشەكتەر سۋ ۇنەمدەۋدىڭ جولدارىمەن تانىسىپ, ەنەرگيانى ءتيىمدى پايدالانۋعا ۇيرەندى. قاتىسۋشىلار العاشقى مەديتسينالىق كومەك كورسەتۋدى ۇيرەنىپ, ينتەراكتيۆتى ويىن وينادى. سونداي-اق, تۇرمىستىق قالدىقتاردى ءبولىپ تاستاۋدىڭ ماڭىزدىلىعى ءتۇسىندىرىلىپ, بالالار توتەنشە جاعداي كەزىندە ساقتىق شارالاردى ۇيرەنىپ ءبىلدى.
قور توراعاسىنىڭ ورىنباسارى تاتيانا نەمتساننىڭ ايتۋىنشا, «بىرگە جارقىرايمىز!» فەستيۆالى – بۇۇ دامۋ باعدارلاماسىنىڭ حالىقارالىق باستاماسى. ول جاسىل تەحنولوگيالار مەن قالالارداعى «اقىلدى» قادامداردى دامىتۋعا باعىتتالعان. ەكولوگيالىق فەستيۆال جىل سوڭىنا دەيىن ەلىمىزدىڭ بارلىق ايماقتارىندا وتەدى دەپ جوسپارلانۋدا. ودان كەيىن ەستافەتا ارمەنياعا جونەلتىلەدى.
ال استانادا باستاۋ العان ەستافەتا الاۋىن قالا اكىمىنىڭ ورىنباسارى ەرمەك امانشاەۆ شىمكەنت قالاسىنا جەتكىزۋ ءۇشىن شىمكەنت اكىمىنىڭ ورىنباسارى تيمۋر بايمۇحانوۆقا تاپسىردى. ول ءارى قاراي ەكولوگيالىق شاراعا قاتىسۋعا نيەت بىلدىرگەن قالالارعا بەرىلىپ وتىرادى.
گۇلدانا تالعاتقىزى
