سەيسەنبى كۇنى ۇكىمەت وتىرىسىندا 2018-2022 جىلدارعا ارنالعان استانانىڭ ازىق-تۇلىك بەلدەۋىن قالىپتاستىرۋ جونىندەگى جاڭارتىلعان جول كارتاسىنىڭ جوباسى تالقىلاندى. وندا ازىق-تۇلىك بەلدەۋى ايماعىنداعى وندىرىستەردى دامىتۋعا باعىتتالعان ءىس-شارالار قاراستىرىلعان. جۇمىس نەگىزگى ءتورت باعىتتا جۇرگىزىلەدى. جول كارتاسىنىڭ جوباسىن اۋىل شارۋاشىلىعى ءمينيسترىنىڭ ءبىرىنشى ورىنباسارى ارمان ەۆنيەۆ تانىستىردى.
بىرىنشىدەن, 2018-2019 جىلدارى استانادا (اقمولا وبلىسىندا) جەتىسپەيتىن ەت ونىمدەرىنىڭ كولەمىن ءوندىرۋ ءۇشىن قۋاتتىلىعى جىلىنا 5 مىڭ توننا ەت وڭدەيتىن كەشەن سالۋ جوسپارلانعان. 2020-2021 جىلدارى ءسۇت وڭدەۋ كاسىپورىندارىنىڭ جۇكتەمەسىن ارتتىرۋ ماقساتىندا 16 تاۋارلىق ءسۇت فەرمالارىن (اقمولا وبلىسىندا – 5 جانە قاراعاندى وبلىسىندا – 11) ىسكە قوسۋ ۇيعارىلىپ وتىر. سونداي-اق, 2019-2020 جىلدارى كوكونىستىڭ جەتىسپەيتىن كولەمىن ءوسىرۋ ءۇشىن سۋارمالى جەرلەر قالپىنا كەلتىرىلەدى.
ەكىنشىدەن, ازىق-تۇلىك بەلدەۋى ايماعىندا وندىرۋگە قولايسىز ازىق-تۇلىك تاۋارلارىنىڭ وزگە وڭىرلەردەن تۇراقتى جەتكىزىلۋىنە جاعداي جاساۋ كوزدەلۋدە. ول ءۇشىن «ەلوردانىڭ ازىق-تۇلىك بەلدەۋىنە قاتىسۋشى» مارتەبەسىن بەرۋ تەتىكتەرىن ەنگىزۋ جوسپارلانىپ وتىر. مۇنداي قادام, ءوز كەزەگىندە, شارۋالارعا كوممۋنالدىق نارىقتاردى قوسا العاندا, قالانىڭ تۇتىنۋ نارىقتارىنا شىعۋعا مۇمكىندىك بەرەدى.
ۇشىنشىدەن, ساۋدا-لوگيستيكالىق ينفراقۇرىلىمدى دامىتۋ ماقساتىندا استانا قالاسىندا كوتەرمە-بولگىش ورتالىق سالىنادى. مۇنداي ورتالىق اۋىل شارۋاشىلىعى ونىمدەرىن وندىرۋشىلەرگە كوتەرمە باعامەن ساتىپ الۋشىلار نارىعىنا شىعىپ قانا قويماي, سونىمەن قاتار ءونىمنىڭ ساقتالۋىنا كەتەتىن شىعىنداردى ازايتىپ, تاۋار اينالىمىن ۇلعايتا تۇسەدى.
تورتىنشىدەن, نارىقتى ساپاسىز ونىمدەردەن قورعاۋ شارالارىن جانداندىرۋ قاراستىرىلعان. جاۋاپتى مينيسترلىك اتالعان جوبانى رەسپۋبليكالىق جانە جەرگىلىكتى بيۋدجەتتىڭ, سونىمەن بىرگە شارۋاشىلىق سۋبەكتىلەرىنىڭ ءوزىنىڭ جانە نەسيەگە العان قاراجاتىنىڭ ەسەبىنەن جۇزەگە اسىرۋدى ۇسىندى.
باسقوسۋدا ەلوردانى ازىق-تۇلىك تاۋارلارىمەن قامتاماسىز ەتۋ باعىتىندا جۇرگىزىلىپ جاتقان جۇمىستار تۋرالى اقمولا وبلىسىنىڭ اكىمى مالىك مىرزالين, قاراعاندى وبلىسى اكىمىنىڭ ورىنباسارى سەرىك شايداروۆ باياندادى. استانا اكىمى باقىت سۇلتانوۆ ءوز كەزەگىندە استانا تۇرعىندارىنىڭ قاجەتتىلىكتەرىن ازىق-تۇلىك تاۋارلارىنىڭ نەگىزگى تۇرلەرىمەن قامتاماسىز ەتۋ بويىنشا شارالار تۋرالى بايانداپ بەردى.
وتىرىستى قورىتىندىلاعان پرەمەر-مينيستر باقىتجان ساعىنتاەۆ ەلوردا حالقىنىڭ جىل سايىن تەز ءوسىپ كەلە جاتقانىن, قالا تۇرعىندارى مەن قوناقتارىن ازىق-تۇلىكپەن قامتاماسىز ەتۋ ماسەلەسى اسا وزەكتى ەكەنىن قاداپ ايتتى. ول جاڭارتىلعان جول كارتاسىن ىسكە اسىرۋعا قاتىستى مينيسترلەر مەن اكىمدەرگە بىرقاتار مىندەتتەر قويىپ, ناقتى تاپسىرمالار بەردى. «جول كارتاسىنىڭ جوباسىندا ازىق-تۇلىك تاۋارلارىنىڭ ناقتى قولجەتىمدىلىگىنە باسا كوڭىل بولىنگەن. دەگەنمەن بۇل ونىمدەردىڭ تۇپكى تۇتىنۋشىعا قانداي باعامەن جەتكىزىلەتىنىن دە ۇمىتپاۋ كەرەك. ۇلتتىق ەكونوميكا مينيسترلىگىنە اۋىل شارۋاشىلىعى مينيسترلىگىمەن, اقمولا, قاراعاندى وبلىستارىنىڭ جانە استانانىڭ اكىمدىكتەرىمەن بىرلەسىپ, ازىق-تۇلىك بەلدەۋىنە قاتىسۋشىلار جەتكىزەتىن ازىق-تۇلىك تاۋارلارىنىڭ باعاسىن ەرەكشە باقىلاۋدا ۇستاۋدى تاپسىرامىن» دەپ مالىمدەدى ۇكىمەت باسشىسى.
باقىتجان ءابدىرۇلى جول كارتاسىندا ەلوردانى ازىق-تۇلىك ونىمدەرىنىڭ نەگىزگى تۇرلەرىمەن قامتۋ بويىنشا 20-دان اسا ءىس-شارا قاراستىرىلعانىنا, بىراق ونىڭ ورىندالۋىن باعالاۋعا مۇمكىندىك بەرەتىن ينديكاتورلاردىڭ جوقتىعىنا نازار اۋداردى. وسىعان وراي, ماقساتتى ينديكاتورلاردى ايقىنداپ, ءاربىر مينيسترلىكپەن جانە اكىمدىكپەن جەكە-جەكە مەموراندۋمدار جاساۋعا تاپسىرما بەردى.
اۋىل شارۋاشىلىعى مينيسترلىگىنىڭ مالىمەتى بويىنشا 2018 جىلدىڭ 9 ايىندا قالا كاسىپورىندارى 138806 توننا ءونىم وندىرگەن. بيىلعى ماۋسىم ايىنان بەرى استانادا 17 جارمەڭكە وتكىزىلىپ, وندا قۇنى 2 ملرد تەڭگەدەن اساتىن 7286 توننا تاۋار ساتىلعان.
