باس قالانىڭ برەندى انىقتالاتىن ۇزدىك نوباي-جوبالارعا اشىق كونكۋرس جاريالاندى
استانا قالاسىنىڭ تۋريستىك سيمۆولى بەلگىلەنبەك وسىعان بايلانىستى ۇزدىك نوباي-جوبالارعا رەسپۋبليكالىق اشىق كونكۋرس جاريالاندى. بايقاۋ كەلەر جىلدىڭ 25 قاڭتارىنا دەيىن جالعاسادى. بۇل تۋرالى ەلوردا اكىمدىگىنىڭ باسپاسوز ورتالىعىندا وتكەن جيىندا استانا قالاسى ىشكى ساياسات باسقارماسىنىڭ باسشىسى ەرلان قاناليموۆ مالىمدەدى.
ەلوردانىڭ برەندىن ايشىقتاۋعا ارنالعان كونكۋرستىڭ جاي-جاپسارىن ءتۇسىندىرۋ ماقساتىندا ۇيىمداستىرىلعان ءباسپاسوز ماجىلىسىنە قازاقستان رەسپۋبليكاسى مەملەكەتتىك ەلتاڭباسىنىڭ اۆتورى, عالىم, ءساۋلەتشى جانداربەك مالىبەكوۆ پەن «سانار» جوبالىق-وندىرىستىك كومپانياسىنىڭ ديرەكتورى ساعىندىق جانبولاتوۆ قاتىستى.
قالالىق ىشكى ساياسات باسقارماسى باسشىسى ەرلان قاناليموۆ مەملەكەت باسشىسى نۇرسۇلتان نازارباەۆتىڭ 2014 جىلعى 25 ءساۋىردەگى حاتتامالىق تاپسىرماسىنا سايكەس, 2016 جىلدىڭ 1 قاراشاسىندا استانا قالاسى اكىمىنىڭ وكىمىمەن استانا قالاسىنىڭ تۋريستىك ءرامىزىن ازىرلەۋ جونىندەگى جۇمىس توبى قۇرىلعانىن ايتتى.
– استانا – ءححى عاسىرداعى قازاقتىڭ قاراشاڭىراعى, ەلىمىزدىڭ باس بوساعاسى. سونداي-اق, بۇل قالانى ۇلى دالا ەلى مادەنيەتىنىڭ ءتورى دەپ سيپاتتاۋعا بولادى. سيمۆولىن بەلگىلەگەن كەزدە وسىلاردى ەسكەرە وتىرىپ, ماعىناسىنان تەرەڭدىك, تەكتىلىك ءبىلىنىپ تۇرۋى كەرەك. نىشاننان ءوركەندەگەن ءوڭىردىڭ ءوڭى اڭعارىلعانى دۇرىس. بايقاۋعا قاتىسۋشىلار جۇمىس جاساعاندا بەلگىلى ءبىر مەكەمەلەردىڭ لوگوتيپتەرىندە جۇرەتىن ەلەمەنتتەردەن اۋلاق بولعانى ءجون, – دەيدى جانداربەك مالىبەكوۆ.
باس قالانىڭ برەندىن بەينەلەۋگە نيەت بىلدىرۋشىلەر كونتسەپتۋالدىق, ديزاينەرلىك شەشىمدەر تاۋىپ, سيمۆول شاھاردىڭ مارتەبەسىن, ونىڭ تۋريستىك تارتىمدىلىعىن, كورىكتى جەرلەرىن, لاندشافتىنىڭ ەرەكشەلىكتەرى جانە تاريحىن جەتكىزۋگە ءتيىس. سونىمەن قاتار, قاتىسۋشىلارعا قويىلاتىن ءبىر تالاپ ءتۇس گامماسىندا قازاقتاردىڭ دەكوراتيۆتى ونەرىندەگى ءتۇس پەن كومپوزيتسيالىق داستۇرلەرى ۇندەسكەنى ابزال.
ساۋلەتشىلەر مەن ديزاينەرلەر اراسىندا وتەتىن بايقاۋ ءبىر ايعا جالعاسادى. قاتىسۋ ءۇشىن وتىنىشتەر جەكە جانە زاڭدى تۇلعالاردان قابىلدانادى. جۇمىس توبى مۇشەلەرى كونكۋرستى قورىتىندىلاردا 5-6 نوبايدى تاڭداپ, ءموبيلدى قوسىمشالار, ياعني, ينتەرنەت ارقىلى اشىق داۋىس بەرۋگە ۇسىنادى. بۇدان 1-ورىن العاندارعا 2 ميلليون تەڭگە جۇلدە بەلگىلەنگەن. ال 2-ورىنعا – 1 ميلليون, 3-ورىنعا 500 مىڭ تەڭگە تابىستالادى.
ورىنبەك وتەمۇرات
