مۇگەدەك بالالاردىڭ باسپانا كەزەگى كامەلەتكە تولعاننان كەيىن دە ساقتالادى. بۇل تۋرالى قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرلان اۋكەنوۆ مالىمدەدى.
«قر كەيبىر زاڭنامالىق اكتىلەرىنە ازاماتتاردىڭ جەكەلەگەن ساناتتارىن الەۋمەتتىك قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ قابىلدانعانعا دەيىن ەگەر بالا 18 جاسقا تولعانشا تۇرعىن ءۇي الماسا, وندا ەرەسەك مۇگەدەكتىگى بار ادام رەتىندە كەزەككە قايتا تۇرۋعا ءماجبۇر.
«مۇگەدەكتىگى بار بالالاردى تاربيەلەپ وتىرعان وتباسىلاردىڭ بالالارى كامەلەتكە تولعاننان كەيىن دە تۇرعىن ءۇي كەزەگىندە تۇرۋ قۇقىعى ساقتالادى. ءالى كۇنگە دەيىن مۇگەدەك بالالارى بار وتباسىلار تۇرعىن ءۇي كەزەگىندە 10 جىلعا دەيىن تۇرادى. ونىڭ ۇستىنە ءبىرىنشى نەمەسە ەكىنشى توپتاعى مۇگەدەكتىگىن العان جاعدايدا عانا كەزەككە قايتادان قويىلادى. ءۇشىنشى توپتاعى مۇگەدەكتىك بەرىلگەن كەزدە ولار باسپانا الۋ قۇقىعىنان ايىرىلادى. ەندىگى ۋاقىتتا ولار كامەلەتكە تولعاننان كەيىن دە تۇرعىن ءۇي الۋ كەزەگىن ساقتاۋ قۇقىعىنا يە بولادى. بۇل نورما 20 مىڭنان استام وتباسىنا تۇرعىن ءۇي كەزەگىن ساقتاۋعا مۇمكىندىك بەرەدى دەپ بولجانۋدا» دەدى قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرلان اۋكەنوۆ.
