كەشە «استانا پوشتا» مەكەمەسىندە «باسپاسوزگە جازىلۋشىلار كۇنى» مەرەكەسى ءوتتى.
قازاقستان پوشتا قىزمەتىنىڭ 30 جىلدىعى اياسىندا ۇيىمداستىرىلعان مەرەكەلىك ءىس-شارادا جۋرناليستەر مەن وقىرماندار جۇزدەسىپ, بۇگىنگى تاڭداعى ءباسپاسوزدىڭ تىنىس-تىرشىلىگى جايىندا سۇحباتتاستى. «ەگەمەن قازاقستان», «كازاحستانسكايا پراۆدا», «استانا اقشامى», «ۆەچەرنيايا استانا», «ايقىن», «ليتەر», «تۇركىستان» جانە باسقا دا گازەت-جۋرنال جەتەكشىلەرى وقىرماندار مەن پوشتا مەكەمەسى قىزمەتكەرلەرىنە العىستارىن ءبىلدىردى. ءوز كەزەگىندە «قازپوچتا» اق استانالىق فيليالىنىڭ ديرەكتورى باحىتجان ماليكوۆا دا ءباسپاسوز رەداكتسيالارىمەن تىعىز ىسكەرلىك قارىم-قاتىناستا بولىپ, مەرزىمدى باسىلىمداردى تاراتۋ بويىنشا جۇيەلى جۇمىستار جالعاسا بەرەتىنىن جەتكىزدى.
«باسپاسوزگە جازۋشىلار كۇنى» مەرەكەسىنە ارنايى كەلىپ, 2024 جىلعا «استانا اقشامى» گازەتىنە ءبىرىنشى بولىپ جازىلعان كورنەكتى جازۋشى قۋانىش جيەنباي بولدى.
«ءباسپاسوز دەگەن, بۇل – قوعامنىڭ ايناسى. ادامنىڭ رۋحاني باي ءارى ساۋاتتى بولۋى ءۇشىن مەرزىمدى گازەت-جۋرنالدى وقۋدىڭ پايداسى وراسان. مىنە, باسپاسوزگە جازىلۋ ناۋقانى باستالىپ وتىر, سوندىقتان مەن قالا تۇرعىندارىن استانالىق گازەتتەرگە جازىلۋعا شاقىرامىن. ەكى-ءۇش رەت اسحاناعا باراتىن اقشاعا ءبىر جىل بويىنا گازەتكە جازىلۋعا بولادى, ياعني ءبىر جىل بويى رۋحاني ازىق الىپ تۇراسىز دەگىم كەلەدى. ءوزىمىزدىڭ انا تىلىمىزدە شىعاتىن گازەتتەردىڭ وقىرمانى كوپ بولسا ەكەن دەپ تىلەيمىن» دەدى بەلگىلى قالامگار.
«ۆەچەرنيايا استانا» گازەتىنە ءبىرىنشى بولىپ جازىلعان ەۆگەنيا نايمۋشينا دا استانالىق گازەتتەردىڭ تۇراقتى وقىرمانى بولىپ جۇرگەنىن ايتتى. «مەن ءۇشىن «ۆەچەرنيايا استانا» گازەتى قالامىزدىڭ ەنتسيكلوپەدياسى سياقتى. بۇكىل اقپاراتتى استانالىق گازەتتەردەن الامىن» دەيدى ەۆگەنيا فەليكسوۆنا.
مەرەكەلىك شارا بارىسىندا «ەlorda Aqparat» مەدياسەرىكتەستىگى («استانا اقشامى», «ۆەچەرنيايا استانا», Elorda.info جەلىلىك باسىلىمى) اتىنان استانالىق ۇزدىك پوشتا تاسۋشى نينا ساۆيتسكاياعا, سونداي-اق ەلوردالىق گازەتتەردىڭ العاشقى جازىلۋشىلارىنا دا العىس حات پەن ەستەلىك سىيلىقتار تابىس ەتىلدى.
