كەشە استانانىڭ №1 مەكتەپ-ليتسەيىندە ەرەكشە كۇن بولدى. وقۋ ورنى پارتالارىنا وقۋشىلار عانا ەمەس, ءماسليحات دەپۋتاتتارى, قالا باسقارمالارى مەن اكىمدىككە قاراستى قۇرىلىمداردىڭ باسشىلارى وتىردى. ساباق ادەتتەگى كەستە بويىنشا ساعات 08.30-دا باستالىپ, لاۋازىمدى تۇلعالار «مەنىڭ العاشقى مۇعالىمىم» تاقىرىبىنا شىعارما جازدى.
پارتاعا وتىرعانداردىڭ قاتارىندا ءبىلىم باسقارماسىنىڭ باسشىسى ءانۋار جانعوزين, قالالىق ءماسليحات دەپۋتاتى ميراس شەكەنوۆ, مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ استانا قالاسى بويىنشا دەپارتامەنتى باسشىسى جازيرا جىلقىشيەۆا, مادەنيەت جانە سپورت باسقارماسىنىڭ باسشىسى بولات ماجاعۇلوۆ, «استانا كونۆەنشن بيۋرو» جشس ديرەكتورى سانيار ايتەكەنوۆ, iKomek مونيتورينگ جانە جەدەل ارەكەت ەتۋ قالالىق ورتالىعىنىڭ باسشىسى جاننات ءدۇبىروۆا بولدى.
ساباقتى ءبىر كۇنگە مەكتەپ ديرەكتورىنا جانە مۇعالىمگە اينالعان 11-سىنىپ وقۋشىسى ايبول قۋباەۆ وتكىزدى. ساباق جاڭارتىلعان ءبىلىم بەرۋ مازمۇنى بويىنشا ۇيىمداستىرىلدى.
«استانا اكىمدىگىندەگى ارىپتەستەرىمە ۇسىنىسىمىزدى قابىل الىپ, ەلگەزەكتىك تانىتقانىنا راقمەت ايتامىن. ساباق قازىرگى ءبىلىم بەرۋ جۇيەسىندە قولدانىلاتىن جاڭاشىلدىقتار بويىنشا ءوتتى. بۇگىنگى جۇيەدە بالالار بىلىمدەرىن وزدەرى باعالايدى. سوعان سايكەس ساباققا قاتىسۋشىلار وزدەرىنە-وزدەرى باعا قويدى. ولاردىڭ جازعان شىعارمالارى مەكتەپتە ەستەلىك ءۇشىن قالادى. وسىنداي شارانى جىل سايىن ۇيىمداستىرامىز دەپ ويلايمىن» دەدى ءانۋار جانعوزين.
قاتىسۋشىلاردىڭ ءبارى وقۋشى كەزدەرىن ەسكە الىپ, ءبىر سەرپىلىپ قالدى. مەكتەپتى استانا قالاسى تسەلينوگراد بولىپ اتالعاندا وسىنداعى №11 مەكتەپتى بىتىرگەنىن ايتقان ميراس شەكەنوۆ العاشقى مۇعالىمى گالينا ساۆەلەۆا بولعانىن جەتكىزدى. جاننات ءدۇبىروۆا قوستانايداعى ماتەماتيكالىق باعىتتاعى گيمنازيادان تۇلەپ ۇشقان. قاتىسۋشىلاردىڭ ءبارى دە ۇمىتىلماس اسەر العانىن ايتىپ, ۇستازدار قاۋىمىن كاسىبي مەرەكەلەرىمەن قۇتتىقتادى.
