باس قالادا اسكەري كوللەدجدە ەلىمىزدىڭ ءبىرىنشى قورعانىس ءمينيسترى, كەڭەس وداعىنىڭ باتىرى, حالىق قاھارمانى, ارميا گەنەرالى ساعادات نۇرماعامبەتوۆتىڭ ەسكەرتكىشىنە گۇل شوقتارىن قويۋ ءراسىمى ءوتتى.
سالتاناتتى راسىمگە گەنەرالدار, وفيتسەرلەر, سەرجانتتار, كادەتتەر, ۇلاندار, سونداي-اق ارداگەرلەر مەن باسقا دا قوناقتار قاتىستى. 1945 جىلى داڭقى جەر جارىپ, اتى اڭىزعا اينالعان گەنەرال ءبيۋستىنىڭ جانىنا ونىڭ ەسىمى بەرىلگەن اسكەري كوللەدجدىڭ بۇكىل جەكە قۇرامى ساپ تۇزەدى. باتىردى قۇرمەتتەۋگە كەلگەندەر ەسكەرتكىشكە گۇل شوقتارىن قويدى.
ءبىر مينۋت ۇنسىزدىكتەن كەيىن قورعانىس ءمينيسترىنىڭ ورىنباسارى, گەنەرال-لەيتەنانت سۇلتان كامالەتدينوۆ ءسوز سويلەدى. ول قازاقستاننىڭ ءبىرىنشى قورعانىس ءمينيسترىنىڭ جاۋىنگەرلىك جولى اڭىزعا تولى ەكەنىن, قازاق حالقىنىڭ باتىر ۇلى مەملەكەتكە جانە بولاشاق ۇرپاققا قىزمەت ەتۋدىڭ, ەرلىك پەن جاۋىنگەر ابىرويىنىڭ, ار-نامىس پەن ادامگەرشىلىكتىڭ ۇلگىسى بولعانىن اتاپ ءوتتى.
«ساعادات نۇرماعامبەتوۆ قارۋلى كۇشتەردى قۇرۋعا, ونى قالىپتاستىرۋعا جانە دامىتۋعا باعا جەتپەس ۇلەس قوستى, اسكەردى جاڭا جەتىستىكتەرگە جەتكىزدى. حالىق قاھارمانىنىڭ ءومىر جولى, ەرلىگى مەن تاباندىلىعى قازاقستاندىق وتان قورعاۋشىلار ءۇشىن عيبرات الارلىق دۇنيە. باتىردىڭ ەسىمى حالىق جادىندا ماڭگى ساقتالادى. ارميا گەنەرالى ساعادات نۇرماعامبەتوۆ سالعان داڭقتى جاۋىنگەرلىك ءداستۇر جالعاسادى دەپ سەنەمىن» دەدى س.كامالەتدينوۆ.
