باۋىر – ادام دەنەسىندەگى ەڭ ءىرى بەز. عىلىمنىڭ دالەلدەۋىنشە, باۋىر ورگانيزمدەگى زات الماسۋ پروتسەسىنە قاتىسىپ, قورەكتەردى وڭدەيدى. ءتۇرلى ۋىتتى, بيولوگيالىق بەلسەندى زاتتار دا باۋىر ارقىلى ءسۇزىلىپ, زالالسىزداندىرىلادى ەكەن.
باۋىردىڭ قاندى رەتتەپ, ونىڭ تۇراقتى قۇرامىن ساقتاۋداعى ماڭىزى وتە زور. قورشاعان ورتامىزدىڭ بۇزىلۋى جانە تاماق ساپاسىنىڭ ناشارلاۋىنا ساي, بۇگىنگى تاڭدا باۋىر اۋرۋلارىنا شالدىققان ادامداردىڭ سانى كۇن ساناپ كوبەيىپ كەلەدى. «اۋىرىپ ەم ىزدەگەنشە, اۋىرمايتىن جول ىزدە» دەگەندەي, دەنساۋلىقتى قورعاۋعا, باۋىر قىزمەتىن جاقسى ۇستاۋعا ەرتەرەك ءمان بەرگەن دۇرىس.
مەديتسينا سالاسىنا قاتىستى دەرەكتەرىنە جۇگىنسەك, باۋىردى قورعاۋدىڭ جانە ونىڭ قىزمەتىن جاقسارتۋدىڭ, باۋىر سىرقاتتارىنىڭ الدىن الۋدىڭ ەڭ قاراپايىم جولى رەتىندە مىنا ءبىر تاسىلدەر ۇسىنىلادى.
1. ءبىر كەسە تازا سۋعا ليموننىڭ تەڭ جارتىسىن قوسىپ ءىشىڭىز. ليمون شىرىنى باۋىرداعى بارلىق زياندى ءزار, ۋىتتى شىعارۋعا كومەكتەسەدى. سونىمەن قاتار, ليمون دەنەدەگى ارتىق مايدىڭ ىدىراۋىن تەزدەتىپ, سەمىرۋدىڭ دە الدىن الادى.
2. سارىمساق پەن جۋانى ءجيى جەۋگە تىرىسىڭىز. بۇل ەكەۋىنىڭ ءيىسى سىزگە ۇناماۋى مۇمكىن. الايدا ولاردىڭ قۇرامىندا ادام اعزاسىنداعى ارتىق زاتتاردى سىرتقا شىعاراتىن پايدالى ەلەمەنتتەر بار. سونىمەن قاتار سارىمساقتىڭ باكتەريالاردى ولتىرەتىن قاسيەتى دە بار.
3. الاتىكەن وسىمدىگىن قايناعان سۋعا شىلاپ ءىشۋدى ادەتكە اينالدىرىڭىز. الاتىكەن باۋىر كلەتكالارىن ۋلى زاتتاردان قورعايدى. قازاق, تيبەت مەديتسيناسىندا الاتىكەن باۋىردىڭ ىستىعىن قايتارىپ, ەرىن كەبەرسۋ, ءىش قاتۋدىڭ الدىن الادى دەلىنگەن.
4. س دارۋمەنىنە باي ورگانيكالىق ازىقتىقتاردى كوبىرەك تۇتىنىڭىز. قۇلپىناي, ليمون, جاسىل بۇرشاق, اپەلسين, قىزاناق, بۇلدىرگەن, جالبىز, اسكوك, قىرىققابات كوكونىستەردىڭ قۇرامىندا س دارۋمەنى جانە باۋىرعا پايدالى ەلەمەنتتەر كوپ.
5. باقباق جاپىراعىن قايناعان سۋعا شىلاپ ءىشىڭىز. قىتاي مەديتسيناسىندا (شوپپەن ەمدەۋ) باقباق باۋىر قىزمەتىن جاقسارتىپ قانا قويماي, قاتەرلى ىسىكتىڭ الدىن الادى ەكەن.
6. ءدارىنى بەتالدى ىشپەڭىز. ارقانداي ءدارىنىڭ اۋرۋعا شيپا بولۋمەن قاتار, كەرى اسەرى دە بار. اسىرەسە, اۋرۋدى باساتىن دارىلەردىڭ باۋىرعا زالالى كوپ.
7. كۇنىنە ءبىر الما جەڭىز. المانىڭ قۇرامىنداعى گليۋكوزا ادام دەنەسىندەگى ەنەرگيانى تولىقتاپ عانا قالماي, باۋىر قىزمەتىن رەتتەۋگە وراسان زور پايداسىن تيگىزەدى ەكەن.
مۇنان باسقا اراق-شاراپتىڭ, ارتىق ۇيىقتاۋدىڭ, سپورتپەن اينالىسپاي, ارتىق سالماق قوسۋدىڭ دا باۋىرعا سالار سالماعى ەرەكشە. سوندىقتان, سالاۋاتتى ءومىر سالتىن ۇستانىپ, باۋىر قىزمەتىن قورعاۋعا قاشاندا ءمان بەرگەنىڭىز دۇرىس بولادى.
