«باۋىرساق بىرىكتىرەدى»

بۇگىن 1 مامىر – قازاقستان حالقىنىڭ بىرلىگى كۇنى مەرەكەسىنە وراي ەلوردالىقتارعا باۋىرساق پەن ءتاتتى تاراتىلدى, دەپ حابارلايدى astana-akshamy.kz

استانا قالاسى جاستار ساياساتى ماسەلەلەرى باسقارماسى «استانا جاستارى» جاستار رەسۋرستىق ورتالىعىمەن بىرلەسىپ, بىرلىك پەن تاتۋلىقتىڭ مەرەكەسىندە «باۋىرساق بىرىكتىرەدى» اتتى اكتسيانى ۇيىمداستىردى.

«بۇگىنگى شۋاقتى كۇنى ۆولونتەرلەر استانالىقتار مەن قالا تۇرعىندارىن وسىناۋ مەرەكەمەن قۇتتىقتاپ, قازاقتىڭ ەجەلگى سالتىنىڭ نەگىزىندە ءدام اۋىز تيگىزدى. ءسويتىپ, كوپشىلىك كوپ شوعىرلاناتىن جەرلەر مەن ايالدامالاردا ەلوردالىقتارعا 10 كەلىدەي باۋىرساق پەن ءتاتتى تاراتىلدى», – دەدى استانا قالاسى جاستار ساياساتى ماسەلەلەرى باسقارماسىنىڭ قىزمەتكەرى دامير ايتىموۆ.

ۆولونتەرلەردىڭ ءبىرى داۆيد شاريپوۆ ۇنەمى يگى ءىستىڭ باسى-قاسىندا جۇرەدى. ول بۇل ءىس-شارادا دا بەلسەندىلىك تانىتتى.

«قازاقستاندىقتاردى وسى ەتنوسارالىق بىرلىك پەن كەلىسىم مەرەكەسىمەن قۇتتىقتايمىن. ءبىز بۇگىن ۇلتتىق تاعامىمىز – باۋىرساق تاراتۋ ارقىلى حالقىمىزدى بىرتۇتاستىققا شاقىرىپ, وتانعا دەگەن سۇيىسپەنشىلىك سەزىمىن نىعايتپاقپىز», – دەدى ۆولونتەر.

ەلوردالىقتار دا مەرەكەلىك تارتۋعا ريزاشىلىقتارىن ءبىلدىرىپ, وزدەرىنىڭ اقجارما اق تىلەكتەرىن ايتتى.

ەستەرىڭىزگە سالا كەتەيىك, ەلوردادا «يگى ىستەر مارافونى» اكتسياسى ءوتىپ جاتىر. اكتسيانىڭ باستى ماقساتى – ەرىكتىلەر مەن تۇرعىندارعا حالىقتىڭ الەۋمەتتىك قورعالماعان ساناتتارىنا, قارت ادامدارعا, مۇقتاج زەينەتكەرلەرگە بارىنشا كومەك كورسەتۋگە مۇمكىندىك جاساۋ.