وتان قورعاۋشىلار جانە ۇلى جەڭىس كۇنىنە وراي ەلورداداعى №28 «جۇلدىز» ساناتوريالىق بالاباقشا بۇلدىرشىندەرى مەرەكەلىك ەرتەڭگىلىك وتكىزدى.
شارادا بالاقايلار مايدان تاقىرىبىنا ارنالعان ولەڭ شۋماقتارىن وقىپ, بي بيلەدى. سوعىسقا اتتانعان اسكەرگە, ولاردى شىعارىپ سالىپ, اسىعا كۇتكەن انالارعا ارناپ ءان شىرقادى.
بالاباقشانىڭ مەڭگەرۋشىسى كەنجەتاي ساعىندىققىزى جاماليەۆا ءسوز سويلەپ, جينالعان قاۋىمدى مەرەكەمەن قۇتتىقتادى.
– 9 مامىر – جەڭىس كۇنىمەن بارلىقتارىڭىزدى شىن جۇرەكتەن قۇتتىقتايمىن! بۇل كۇن تاريح پاراقتارىندا ۇلكەن ارىپتەرمەن جازىلعان. ءوز جانىن اياماي ەلىمىزدى قورعاعان, بەيبىت كۇنگە جەتكىزگەن ەرلەرىمىزگە باسىمىزدى يەمىز, – دەدى ول.بالاباقشاداعى بۇلدىرشىندەر – سوعىستى كورمەك تۇگىل, ەستىمەي وسكەن بەيبىت كۇننىڭ بالالارى. سول سەبەپتى مەرەكەلىك كونتسەرت اياسىندا جۇرگىزۋشىلەر بالالارعا سۇراپىل سوعىستىڭ جىلدارى تۋرالى اقپارات بەرىپ, قۇلاقتاندىرىپ وتىردى.بالالار قويعان ساحنالىق كورىنىس سول جىلداردىڭ كارتيناسىن كوز الدىعا ەلەستەتتى. بۇلدىرشىندەر تاقپاق وقىعاندا, وتىرعاندار كوزدەرىنە ەرىكسىز جاس الدى. قورىتا ايتقاندا, قاتىسۋشىلار ايانىپ قالماي, بار ونەرلەرىن ورتاعا سالدى. كەش بالاقايلاردىڭ ورىنداۋىنداعى «ارقاشان كۇن سونبەسىن» انىمەن اياقتالدى. كونتسەرتتە كورەرمەن بولعان اتا-انالار بالالاردى جاستايىنان وتانسۇيگىشتىك پەن ۇلتجاندىلىققا باۋلىپ, تاماشا كەش ۇيىمداستىرعان بالاباقشا باسشىلىعىنا العىس ءبىلدىردى.
