استاناداعى Has Sanat ونەر گالەرەياسىندا «جۋسان ءيىسى» اتتى كورمە ءوتىپ جاتىر. كورمەگە Adyr-Aspan ارت توبىنا مۇشە سۋرەتشىلەردىڭ تۋىندىلارى قويىلدى.
كارتينالاردىڭ اۆتورلارى بەيبىت اسەمقۇل, گۇلمارال تاتىباەۆا, جەڭىس مولدابەكوۆ, ءاليا قانىبەكوۆا جانە ناتاليا ليگاي جۇرت نازارىنا بارلىعى 50-دەن استام جۇمىستارىن ۇسىندى. ولاردىڭ تۋىندىلارى اللەگوريالارعا, قيالدان تۋعان بەينەلەرگە نەگىزدەلگەن.
ماسەلەن, سۋرەتشى-گرافيك, كەسكىندەمەشى, ينستاللياتسيا شەبەرى بەيبىت اسەمقۇلدىڭ «باسىپ كىرۋ» اتالاتىن كارتيناسى اۆتوردىڭ ايتۋىنشا, پاندەميا ۋاقىتىندا سالىندى. بۇل تۋىندى ءومىردىڭ جاڭا كەزەڭى, ادام رۋحىنىڭ مىقتىلىعى, ونىڭ الدىنان كەزدەسكەن ءتۇرلى قيىندىقتارعا توتەپ بەرۋى, ومىرگە قۇشتارلىق جايىندا سىر شەرتەدى.
گۇلمارال تاتىباەۆا – ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ تۇلەگى, قازاقستان سۋرەتشىلەر وداعى مەن ەۋرازيا ديزاينەرلەر وداعىنىڭ جانە ەۋرازيا شىعارماشىلىق گيلدياسىنىڭ مۇشەسى. اۆتوردىڭ جۇمىستارى قازاقستان, تۇركيا, گوللانديا, كورەيا, لاتۆيا, رەسەي, يوردانيا, ۇلىبريتانيا, قىتاي جانە باسقا ەلدەردىڭ مۋزەيلەرى مەن جەكە كوللەكتسيالارىندا ساقتاۋلى. شىعارماشىلىق جولىنىڭ باسىندا سۋرەتشى تۇپنۇسقا گرافيكا تەحنيكاسىندا جۇمىس ىستەگەن. ونىڭ شىعارماشىلىعىنىڭ جەكە باعىتىن قالىپتاستىرعان العاشقى تاقىرىپتاردىڭ ءبىرى – «اسكەري كوممۋنيزم» ساياساتى, ۇجىمداستىرۋ سالدارىنان بولعان 1919-1922 جانە 1930-1932 جىلدارداعى جاپپاي اشارشىلىقتىڭ قاسىرەتتى كەزەڭى. كەيىننەن گۇلمارال حالقىمىزدىڭ تاريحىنا, مادەنيەتى مەن رۋحاني قۇندىلىقتارىنا, انا مەن بالا الەمىنە, وتباسى ينستيتۋتىنا تۋىندىلارىن ارنادى.
سۋرەتشى, ونەرتانۋشى دينارا نۋگەردىڭ پىكىرىنشە, جەڭىس مولدابەكوۆ – كەڭىستىگى كەڭ تالانتتى سۋرەتشى. ونىڭ تۋىندىلارى ءبىلىم جانە مادەنيەت مەكەمەلەرىندە ونەردى قولدانۋ ماسەلەسىن قوزعايدى. ال ءاليا قانىبەكوۆا ءوز شىعارماشىلىعىندا كلاسسيكالىق بەينەلەۋ ونەرىنىڭ داستۇرلەرى مەن ەسكى تەحنيكالاردى قولدانسا دا, كارتينالارىندا جاڭاشىلدىقتىڭ لەبى ەسەدى. ناتاليا ليگاي بولسا, سۋرەتشى عانا ەمەس, ديزاينەر. ول جۇمىستارىندا ءارتۇرلى مادەنيەتتەردى توعىستىرادى.
كورمە اياسىندا اۆتورلارمەن كەزدەسۋلەر, ولاردىڭ شەبەرلىك ساباقتارى ۇيىمداستىرىلىپ, Adyr-Aspan ارت توبىنداعى سۋرەتشىلەر تۋرالى تۇسىرىلگەن دەرەكتى ءفيلمنىڭ تۇساۋى كەسىلدى. وندا ادىراسپان ءشوبىنىڭ قازاق ومىرىندەگى ءمانى تۋرالى اڭگىمە ايتىلىپ, بەس سۋرەتشىنىڭ شىعارماشىلىعى تانىستىرىلادى.
اتالمىش كورمەنى 9 تامىزعا دەيىن تاماشالاۋعا بولادى.
