استانا قالاسىنىڭ بەلسەندى زەينەتكەرلەرىنەن قۇرالعان «ارقا اۋەندەرى» حالىق ءانسامبلى ەلوردانىڭ 25 جىلدىعىنا ارنالعان كونتسەرت قويدى.
«ارقا اۋەندەرى» ءانسامبلى – ەلوردا جۇرتشىلىعىنا كەڭىنەن تانىلعان ونەر ۇجىمى. باس قالامىزدا وتەتىن مەملەكەتتىك جانە ۇلتتىق مەرەكەلەرگە ارنالعان ءىس-شارالاردىڭ ورتاسىنان كورىنەدى. قۇرامىنداعى زەينەتكەرلەردىڭ ءبارى – ونەرپاز ازاماتتار. انسامبل جەتەكشىسى كەنجەتاي ەرعاليقىزى جانۇزاقوۆا ءانسامبلدىڭ رەپەرتۋارىنا ۇنەمى كوڭىل ءبولىپ, ءاربىر مۇشەسىن قولداپ-قولپاشتاپ جۇرەدى.
ءبىز جاقىندا عانا ەلوردامىزداعى «شاراپات» الەۋمەتتىك قىزمەت كورسەتۋ ورتالىعى» مەكەمەسىندە بولىپ, وسىندا تۇراتىن قاريالار مەن مۇمكىندىگى شەكتەۋلى ادامدار الدىندا كونتسەرت قويدىق. دومبىرا, بايان جانە باسقا دا ۇلت اسپاپتارىندا قازاق, ورىس, ۋكراين تىلدەرىندە ءان شىرقاپ, كۇي تارتىپ كوپشىلىكتىڭ كوڭىلىن ءبىر كوتەردىك.
مۋزىكالىق جەتەكشىمىز – تەمىرەش كەرەەۆ, انسامبل مۇشەلەرى – عاليا مەلدەبەكوۆا, بەكسۇلتان تولەگەنوۆ, ءامينا سەيتوۆا, رامازان قۇرمانباەۆتىڭ ونەرىنە زور قوشەمەت كورسەتىلدى. ءوزىم «اح, تى, دۋشەچكا» دەگەن ورىستىڭ حالىق ءانىن شىرقادىم. سونىمەن قاتار انسامبل جانىنداعى «زامانداستار» فولكلورلىق توبى, «جىگىتتەر» جانە «قىزدار» توبىنىڭ ونەرىنە دە كورەرمەن ءدان ريزا بولدى.
«زەينەتكەرلەر مەن ارداگەرلەردىڭ كونتسەرتى وتە تاماشا بولدى. كوڭىلىمىز ءبىر كوتەرىلىپ قالدى. كوپتەن بەرى مۇنداي كونتسەرت كورمەپ ەدىم. بارىڭىزگە العىسىم شەكسىز. ونەرلەرىڭىز ورلەي بەرسىن» دەپ ريزاشىلىعىن ءبىلدىردى وسى كونتسەرتتى تاماشالاعان, «شاراپات» قارتتار ءۇيىنىڭ تۇرعىنى رايسا گاشەنكو.
«ارقا اۋەندەرى» ءانسامبلى ەلوردامىزداعى ءىس-شارالارعا قاتىسۋىن جالعاستىرا بەرەدى. دايىندىق جۇمىستارىمىزدى ۇزبەيمىز.
يبراگيم الىمباەۆ,
ەڭبەك ارداگەرى,
«قازاقستاننىڭ قۇرمەتتى ازاماتى» بەلگىسىنىڭ يەگەرى
