تامىز ايىنان بەرى بىرقاتار قازاقستاندىق باق ەلدە بەنزين تاپشىلىعى بولاتىنى تۋرالى ءارتۇرلى بولجامدار جاريالاعان بولاتىن. قازىرگى ۋاقىتتا كەيبىر قالالاردا جانار-جاعارماي تاپشىلىعى, راسىمەن دە, سەزىلىپ وتىرعان سىڭايلى. سونىڭ سالدارىنان بەنزين باعاسى دا قىمباتتاي تۇسۋدە.
رەسمي دەرەكتەرگە سۇيەنسەك, ەلدەگى بەنزين تاپشىلىعى سوڭعى 2 اپتادان بەرى تىركەلگەن ەكەن. سول سياقتى كولىك جۇرگىزۋشىلەرىنىڭ ءمالىمەتىنشە, جانارمايدىڭ تاپشىلىعى استانادا دا بايقالىپ وتىرعان ءتارىزدى. ءجۇرگىزۋشىلەر كۇن ۇزاققا بەكەتتەردە كەزەككە تۇرۋعا ءماجبۇر بولعان. ونداعى بەنزين باعاسى 153 تەڭگەدەن باستالىپ, 170 تەڭگەگە دەيىن كوتەرىلدى.
– وتكەندە كەيبىر بەكەتتەردە بەنزين تاپشىلىعى سەزىلدى. قاتارىنان ءتورت-بەسەۋىنە كىرىپ, اي-92 بەنزينىن الاتىن جەردى ارەڭ تاپتىم. كوبىندە تەك تالونمەن عانا ساتىلىپ جاتىر ەكەن. سەبەبىن سۇراعان ەدىم, جانار-جاعارماي بەكەتىنىڭ ماماندارى بەنزيننىڭ قىمباتتايتىنىن ايتتى, – دەيدى استانالىق كولىك تىزگىنشىلەرىنىڭ ءبىرى قايرات تۇرعانبەكوۆ.
قر ەنەرگەتيكا مينيسترلىگى ءباسپاسوز قىزمەتىنىڭ مالىمەتىنە سۇيەنسەك, ەل ىشىندەگى بەنزين تاپشىلىعىن جويۋ ءۇشىن يمپورت كولەمى ارتتىرىلا تۇسپەك. قر ەنەرگەتيكا جانە ۇلتتىق ەكونوميكا مينيسترلىگى بىرلەسىپ, جانارماي قورىن ەسەلەۋ ماقساتىندا وسىنداي ورتاق كەلىسىمگە كەلگەن. وندا قوس ۆەدومستۆو باسشىسى شەشىمىمەن تابيعي مونوپوليالاردى رەتتەۋ, باسەكەلەستىكتى جانە تۇتىنۋشىلاردىڭ قۇقىقتارىن قورعاۋ كوميتەتىنىڭ دە كەلىسكەنى ايتىلعان. تۇزىلگەن جوسپارعا سايكەس, ەندى قازان ايىندا رەسەيدەن جەتكىزىلەتىن جانارماي كولەمى 120-150 مىڭ تونناعا ارتۋى ءتيىس. ونىڭ 100 مىڭ تونناسى جەكە قۇيۋ بەكەتتەرىنە ۇلەستىرىلمەك. قازىرگى تاڭدا كورشى ەلدىڭ ەنەرگەتيكا مينيسترلىگىمەن كەلىسىم جاسالىپ جاتىر.
نۇرداۋلەت كاكىشەۆ
