ۇلىستىڭ ۇلى كۇنىندە ۇلى دالا ەلىنىڭ تۇس-تۇسىندا ۇلان-اسىر توي. وسىناۋ مەرەكەنى استانا حالقى دا دۋمانداتىپ قارسى الىپ جاتىر. قازىر قالانىڭ كورىكتى ورىندارىندا كورىسكەن, قاۋىشقان اعايىننىڭ قاراسى قالىڭ. سونداي ورتاسى تولعان مەكەننىڭ ءبىرى – ەلوردا اكىمدىگىنىڭ الدىنداعى قالالىق الاڭ.
ايشىقتى اقشاڭقان كيىز ۇيلەر
بۇرىنعى ورتالىق الاڭدا بۇقاراعا بەت بۇرعىزارلىق قىزىق كوپ. بۇل جاقتان وتكەن جۇرتتىڭ كوزىنە بىردەن اقشاڭقان كيىز ۇيلەر تۇسەدى. مۇنداي قازاقى شاتىردىڭ التاۋى قۇرىلعان. ولاردىڭ ارقايسىسىنىڭ ءىشى ۇلتتىق بۇيىمدارمەن بەدەرلەنىپ, داستارقانى ءتۇرلى دامگە تولتىرىلعان.
الاڭنىڭ مەرەكەلىك اجارىن ايشىقتاپ تۇرعان بۇرىشسىز ۇيلەردىڭ سالتانات قۇرۋىنا ەلوردالىق باسقارمالار مۇرىندىق بولدى. اتاپ ايتساق, جاستار ساياساتى ماسەلەلەرى باسقارماسى, ءدىن ىستەرى باسقارماسى, ەنەرگەتيكا باسقارماسى, جۇمىسپەن قامتۋ, ەڭبەك جانە الەۋمەتتىك قامتۋ باسقارماسى جانە كولىك جانە كوممۋنيكاتسيا كوللەدجى, استانا مەديتسينالىق ۋنيۆەرسيتەتى, «كروسسفيت» سپورت كلۋبى ءوز كيىز ۇيلەرىن ورنالاستىرعان. وعان قوسا, تاعى ءبىر شاڭىراق اسحانا رەتىندە كوتەرىلىپ, جۇرتتى ناۋرىز كوجەگە تويدىرۋدا.
– جىلىنا اينالىپ ءبىر-اق رەت كەلەتىن ناۋرىز مەيرامى – ول شات-شادىمان حالىق پەن استا-توك داستارقان. سوندىقتان دا ناۋرىز – بەرەكە مەن مەرەكەنىڭ بەلگىسى. وسىناۋ كۇنى كوپشىلىكتىڭ كوڭىلىنەن شىعۋ ءۇشىن داستارقانىمىزدى بارىنشا جايناتىپ, بار ءتاتتىمىزدى ۇسىنامىز. بۇل كۇندەرى استىڭ ۇلكەنى – ناۋرىز كوجە. وسى تاعامدى ىنتا-ىقىلاسىمىزبەن ءدامدى ەتىپ دايىنداۋعا تىرىسامىز. بۇگىن, مىنە, ادامدار ءدامىن تاتىپ, العىسىن جاۋدىرۋدا. باستىسى, قارىننىڭ توق بولۋى ەمەس, كوڭىلدىڭ تويۋى عوي, – دەدى جەتى ءتۇرلى دامنەن كوجە ازىرلەگەن اسپاز ءازيزا بەردەباەۆا.
قالالىق الاڭنىڭ كىرەبەرىسىندە الىپ سايالى «بايتەرەك» ورنالاسقان. بۇل وسى ماڭايعا قونعان «اۋىلدىڭ» تابالدىرىعى ىسپەتتى. وسى جەردەن تابىلعان تۇرعىندار «ماۋەلى» اعاشتىڭ تۇبىندە ەستەلىك سۋرەتكە ءتۇسىپ ءماز-مەيرام.
بۇل تۇستا كيىز ۇيلەرمەن قوسا, ءتۇرلى ۇلتتىق بۇيىمداردى ساتاتىن ورىندار مەن تاماقتاناتىن شاتىرلار قۇرىلعان. ال «اۋىلدىڭ» تورىندە حالايىققا مەرەكەلىك كوڭىل-كۇي سىيلايتىن ساحنا جاساقتالعان. وندا ونەرپازدار ءان اۋەلەتىپ, بي بيلەپ, اينالانى دۋمانعا بولەپ جاتىر.
اسىق اتىپ اسىر سالدى
قالالىق الاڭداعى مەرەكەنىڭ كورىگىن قىزدىرعان ويىن-ساۋىقتىڭ ءبىرى – ۇلتتىق ويىندار. وسىنداي قۇندىلىقتارىمىزدىڭ ءداستۇرلى دۋمانداردا قادىرى ارتا تۇسەتىنى بارشاعا ايان. سونىڭ ىشىندە اسىق سەكىلدى اسىلىمىزدى ەرەكشە اتاۋعا بولادى. قايناعان تىرشىلىكتىڭ ورتاسى دالادان قالاعا اۋعان زاماندا اسىق وينايتىندار نەكەن-ساياق. بىراق ناۋرىزدا جينالعان جۇرتتىڭ كىشىسى دە, ۇلكەنى دە اسىق اتۋعا ەپتى ەكەنىن بايقادىق.
اسىق اتۋ سايىسىندا بالالار ءبىر جاق, ۇلكەندەر بولەك جەكە-جەكە باق سىنادى. سونىمەن, ساقالارىن سايلاپ شىققان بالالاردىڭ ىشىندە ەڭ سۇرمەرگەندەرى بەلگىلى بولدى. ابجىلدىگىمەن ءبارىنەن ۇزدىك بولعانى – ادىلەت ءداكەنوۆ ەسىمدى ءبۇلدىرشىن. ودان كەيىنگى ورىندى كۇنار باقىتنۇر الدى. ال ءۇشىنشى ورىن سانجار سايلاۋبەككە بۇيىردى.
ۇلكەندەر جاعىنان دا اسىعى الشىسىنان تۇسكەن جەڭىمپازدار انىقتالدى. بۇل سىندا مارات يسلامبەك جەڭىسكە جەتتى. ەكىنشى ورىندى ديدار كيباتۋللوۆ السا, ءۇشىنشى ورىندى ەرماحان ەرگەشباەۆ يەلەندى.
كۇشى تاسىعاندار قول كۇرەستىردى
كوپتى كورسە ارقالاناتىن جاۋىرىنى قاقپاقتاي, جۇدىرىعى توقپاقتاي جىگىتتەردىڭ تابىلاتىنى دا ءسوزسىز. كۇشتەرى تاسىعان وندايلارعا ارنايى قول كۇرەس, ارقان تارتىس, كىر تاسىن كوتەرۋ سەكىلدى سايىستار ۇيىمداستىرىلدى.
سايدىڭ ساقپان تاسىنداي جىگىتتەر الدىمەن ارمرەستلينگتە كۇش سىناستى. بۇل دودادا قاتىسۋشىلار سالماعىنا قاراي 70 كەلىگە دەيىن جانە 70 كەلىدەن جوعارى دەپ ەكىگە ءبولىندى. ءبىرىنشى ساناتتا بارىنەن مىقتىسى رىسبەك مەيرامبەكۇلى بولدى. ودان كەيىن – رۋسلان ءداۋىتوۆ, ءۇشىنشىسى – ىقىلاس ءالىمجول. ال ەكىنشى بولىمدە ارسەن ءالىم جەڭىسكە جەتتى. كۇمىس – اسىلجان الينگە, قولا رۋسلان اتتى جىگىتكە بۇيىردى.
بۇعان قاناعاتتانباعان مىقتىلار كىر تاسىن كوتەرۋدەن سايىسقا ءتۇستى. سالماعى 16 كەلىنى تارتاتىن تاستى كوتەرۋدەن ەرنۇر بەگاليەۆ ۇزدىك بولدى. ەكىنشى ورىنعا – دياس جاۋقاتوۆ, ءۇشىنشى ورىنعا يۆان دەميچەۆ قول جەتكىزدى. ال 24 كەلىلىك تاستى ەڭسەرۋدەن سايان ساقىپوۆ جەڭىمپاز اتاندى. ودان كەيىن تابىسبەك شابدارباي مەن ديدار قيباتۋللوۆ ەرەكشەلەندى.
بىرىكسە, الىنباس قامال بولمايتىنىن بىلدىرەتىن سايىستىڭ ءبىرى – ارقان تارتىس. بۇل سايىستا «تيگر» كومانداسىنىڭ مەرەيى تاسىدى. ەكىنشى «بارىس», ءۇشىنشى «استانا» كوماندالارىنىڭ اتى شىقتى. ال بالالار اراسىندا «ايدار» كومانداسى جەڭدى. ەكىنشى ورىن – «ۆوستوك» كومانداسى, ءۇشىنشى ورىن – «سۇڭقار» كومانداسى.
ورىنبەك وتەمۇرات
