ەسىل اۋدانىندا جاستارعا قىزمەت كورسەتۋ ورتالىعى اشىلدى. بيىل باس شاھاردىڭ ءۇش اۋدانىندا ءدال وسىنداي ءۇش ورتالىق اشىلادى.
– وتكەن جىلى قالانىڭ 4 اۋدانىنا 5 جاستارعا قىزمەت كورسەتۋ ورتالىعى اشىلدى. ءبىر جىلدىڭ ىشىندە 10000-عا جۋىق ازامات ورتالىق قىزمەتىنە جۇگىندى. جاستارعا قىزمەت كورسەتۋ ورتالىعىنىڭ ارقاسىندا 3500-گە جۋىق جاس جۇمىسقا ورنالاسسا, سوڭعى ەكى جىلدا 13 مىڭ ادام تۇراقتى جۇمىسقا ورنالاستى, – دەپ اتادى ق.قامباروۆ.
بۇل ورتالىق جاستارعا قىزمەت كورسەتۋمەن عانا شەكتەلمەيدى. ورتالىق جاستاردىڭ ءارى دەمالاتىن, ءارى ءبىلىمىن جەتىلدىرەتىن, ءارى پىكىر الىساتىن, ولاردى جان-جاقتى قولداۋعا بارلىق مۇمكىندىك جاسايتىن ورتاق شاڭىراق بولادى. ياعني جاستاردىڭ جاڭا يدەيالارى مەن جوبالارىنا باعىت بەرىپ, كۇش-جىگەرىن بىرىكتىرەتىن الاڭعا اينالادى.
ورتالىقتىڭ باستى ماقساتى – مەملەكەتتىك جاستار ساياساتىن جۇزەگە اسىرۋ, جاستاردى قولداۋعا باعىتتالعان مەملەكەتتىك باعدارلامالار جانە جاستار اراسىنداعى وزەكتى ماسەلەلەر – اۋلا كلۋبتارى, ەرىكتىلىك, كاسىپكەرلىك, جەڭىلدىكپەن نەسيەلەندىرۋ, سونىمەن قاتار كاسىپتىك باعدار بەرۋ, جۇمىسقا ورنالاستىرۋ جانە تۇرعىن ءۇي ماسەلەلەرى جانە تاعى باسقا باعىتتار بويىنشا اقپاراتتىق-كونسۋلتاتيۆتىك كومەك كورسەتۋ. جاستار ءوزىن مازالاعان سۇراقتار بويىنشا تەگىن كەڭەس الادى.
جاستارعا قىزمەت كورسەتۋ ورتالىقتارىندا استانا قالاسى اكىمدىگىنىڭ «استانا جاستارى» كمم-ءنىڭ قىزمەتكەرلەرى جاستاردىڭ بوس ۋاقىتىن ءتيىمدى وتكىزۋ ماسەلەلەرى بويىنشا, حالىقتى جۇمىسپەن قامتۋ ورتالىعى جۇمىسقا ورنالاستىرۋ ماسەلەلەرى بويىنشا جانە «وتباسى بانك» اق تۇرعىن ءۇي ماسەلەلەرىنە قاتىستى كونسۋلتاتسيالىق كومەك كورسەتەدى. ورتالىق ءبىر ۋاقىتتا 10-12-گە جۋىق ادامدى قابىلداي الادى.
ورتالىقتىڭ اشىلۋ سالتاناتىنا قالالىق جاستار ساياساتى ماسەلەلەرى باسقارماسىنىڭ باسشىسى قايرات قامباروۆ قاتىستى. ءوز سوزىندە باسقارما باسشىسى قالا جاستارىنىڭ جۇمىسسىزدىق ماسەلەسىن شەشۋدە «جاستار تاجىريبەسى», «قوعامدىق جۇمىستار», «العاشقى جۇمىس ورنى», «ۇرپاقتار كەلىسىمشارتى» جانە باسپانالى بولۋدا 2021 جىلدان باستاپ جۇزەگە اسىرىلىپ كەلە جاتقان «ەلوردا جاستارى» باعدارلاماسىنىڭ ماڭىزىنا توقتالدى. ونىڭ ايتۋىنشا, قالا بويىنشا 8500-گە جۋىق بوس جۇمىس ورنى بار. ال جۇمىسسىز جۇرگەن جاستاردىڭ سانى – 6,8-6,9 پايىز, ياعني 19000 مىڭ ادام.
ەلوردا جاستارىنىڭ جۇمىسپەن قامتۋدا جاستارعا ارنالعان بوس جۇمىس ورىندارى جارمەڭكەسى تۇراقتى نەگىزدە وتكىزىلەدى. بىلتىردىڭ وزىندە استانادا 10 بوس جۇمىس ورنى جارمەڭكەسى ءوتتى. جارمەڭكە جاستار سارايى, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى, م.نارىكباەۆ اتىنداعى قازاق گۋمانيتارلىق-زاڭ ۋنيۆەرسيتەتىنىڭ قابىرعاسىندا ۇيىمداستىرىلدى. بيىل دا اتالعان مەكەمەلەردە جارمەڭكەلەر جالعاسادى.
2022 جىلدىڭ قىركۇيەك ايىنا دەيىن قالادا 14-29 جاس ارالىعىنداعى جاستاردىڭ جالپى سانى 268 مىڭ ادامدى قۇرادى. مەملەكەت باسشىسى قاسىم-جومارت توقاەۆتىڭ ۇسىنىسىمەن «جاستار» ۇعىمىنىڭ جاس شەگى 35 جاسقا دەيىن ۇلعايدى. سايكەسىنشە, استانالىق جاستاردىڭ سانى ارتىپ, بۇگىندە جالپى سانى 425 مىڭ ادامدى قۇراپ وتىر. سوندىقتان ەلوردا جاستارىنا لايىقتى قولداۋ كورسەتۋ, سول ارقىلى مەملەكەتتىك جاستار ساياساتىن جۇزەگە اسىرۋ نەگىزگى باسىمدىق بولۋى ءتيىس.
جاستارعا قىزمەت كورسەتۋ ورتالىعى قابانباي باتىر داڭعىلى, 58 ب مەكەنجايى بويىنشا ورنالاسقان. مەكەمە اپتانىڭ بەس كۇنى (دۇيسەنبى-جۇما) تاڭەرتەڭگى ساعات 9:00-دەن كەشكى ساعات 18:00-گە دەيىن جۇمىس ىستەيدى.
