72-ءشى بەرلين حالىقارالىق كينوفەستيۆالىندە قازاقستاندىق قوس كينوتۋىندى توپ جاردى. كينورەجيسسەر فارحات ءشارىپوۆتىڭ «سحەما» ءفيلمى بالالار مەن جاسوسپىرىمدەرگە ارنالعان فيلمدەر سەكتسياسىندا باس جۇلدەنى يەلەنسە, اسقار ۇزاباەۆ پەن پروديۋسەر بايان ماقساتقىزىنىڭ «باقىت» ءفيلمى «پانوراما» سەكتسياسىنىڭ «كورەرمەندەر كوزايىمى» اتالىمىندا ۇزدىك اتاندى.
«سحەما» ءفيلمى مادەنيەت جانە سپورت مينيسترلىگىنىڭ تاپسىرىسىمەن الماتى قالاسىندا ءتۇسىرىلدى. تۋىندىدا بالالار مەن جاسوسپىرىمدەر وزدەرىنىڭ سىرلارىمەن بولىسەدى. بۇل – باس كەيىپكەرلەردى سومداعان جاس اكتەرلەر ۆيكتوريا رومانوۆا مەن تايىر ءسۆينتسوۆتىڭ كينو ونەرىندەگى دەبيۋتى بولدى. ءفيلمنىڭ پروديۋسەرى – دينا جۇمابەك, قويۋشى وپەراتورى – الەكساندر پلوتنيكوۆ, قويۋشى سۋرەتشىسى الەكسەي شيندين.
ال «باقىت» ءفيلمى تۇرمىستىق زورلىق-زومبىلىق ماسەلەلەرىن قوزعايدى. قازاقستاننىڭ ءبىر قالاسىندا ءومىر ءسۇرىپ جاتقان وتباسى پروبلەماسىن قوزعايدى. وقيعا ءۇش كەيىپكەر ەرلى-زايىپتىلار مەن ولاردىڭ بويجەتكەن قىزى اراسىندا ءوربيدى. فيلم شىنايى وقيعالارعا نەگىزدەلگەن. ستسەناري اۆتورلارى – اسەم جاپىشەۆا مەن اسقار ۇزاباەۆ. باس كەيىپكەردى اكتريسا لاۋرا مىرزاحمەتوۆا وينادى.
بەرلينالەدەگى «پانوراما» سەكتسياسى نەگىزگى كونكۋرستان كەيىنگى ەڭ بەدەلدىسى بولىپ سانالادى. بۇل سەكتسيادا بايقاۋدىڭ قازىلار القاسى كينويندۋستريا ماماندارىنان ەمەس, كورەرمەندەردەن تۇرادى. ولار فيلمدەرگە تىكەلەي داۋىس بەرەدى. بيىل سەكتسياعا 33 ەلدەن 29 كارتينا قاتىسقان.
ءاسيا نۇربەكقىزى
