«ەكسپو-2017» حالىقارالىق كورمەسىنە 5 ميلليون ادام كەلەدى دەپ بولجانۋدا. ونىڭ 85 پايىزى قازاقستاندىقتار بولسا, 15 پايىزى – شەتەلدىك قوناقتار. بۇل دەرەكتەر كەشە ەلوردادا ەكسپو كورمەسىنە دايىندىق شارالارىن پىسىقتاۋ ماقساتىندا ۇيىمداستىرىلعان دوڭگەلەك ۇستەل ماجىلىسىندە بەلگىلى بولدى.
جيىن بارىسىندا «استانا ەكسپو-2017» ۇلتتىق كومپانياسى باسقارما توراعاسىنىڭ ورىنباسارى ەربول شورمانوۆ ءسوز سويلەپ, حالىقارالىق شارا بيلەتتەرىنىڭ ساتىلۋ كورسەتكىشىنە توقتالدى.
– 10 ماۋسىم كۇنى كورمەنىڭ بيلەتتەرىن ونلاين-ساتىلىمعا شىعاردىق. بۇگىندە 5204 بيلەت ساتىلدى, ونىڭ 10 پايىزى – شەتەلدىكتەر تاراپىنان. تۋريستىك سالاداعى سۋبەكتىلەردىڭ ەكسپو كورمەسىنە دەگەن قىزىعۋشىلىعى قۋانتادى. ولار 10 شىلدەدەن, ياعني, رەسەللەرلەر مەن تۋروپەراتورلارعا ارنالعان پرومو-كەزەڭنىڭ اشىلۋىنان باستاپ 200 مىڭنان اسا بيلەتتى ساتىپ الۋعا نيەتتى, – دەدى توراعا ورىنباسارى.
سونىمەن قوسا, اتالمىش كومپانيا وكىلى ءىرى شەتەلدىك تۋروپەراتورلارمەن بىرگە ماڭىزدى جۇمىستار اتقارىلىپ جاتقاندىعىن مالىمدەدى. قازىرگى ۋاقىتتا ءتۇرلى مەملەكەتتەگى تۋروپەراتورلارمەن 30 شاقتى كەلىسىمشارتقا قول قويىلعان. بۇدان بولەك, ەكسپو كورمەسىنىڭ تۋرپاكەتتەرىن ناسيحاتتاۋعا 50-گە جۋىق وتاندىق تۋريستىك اگەنتتىك تە تارتىلىپتى.
ەستەرىڭىزگە سالساق, ەكسپو بيلەتتەرى ساتىلىمعا بىرتىندەپ شىعارىلادى. بيىلعى 10 ماۋسىم مەن 10 شىلدە ارالىعىنداعى پرومو-كەزەڭدە بيلەتتەردى ەڭ تومەن باعادا ساتىپ الۋعا مۇمكىندىك بار. ماسەلەن, 10-20 ماۋسىم ارالىعىندا 50 پايىز, 21-30 ماۋسىم ارالىعىندا 30 پايىز, 1-10 شىلدە ارالىعىندا 20 پايىز جەڭىلدىكپەن بيلەت ساتىپ الۋعا بولادى. 10 شىلدەدەن 10 تامىزعا دەيىن تۋروپەراتورلار مەن رەسەللەرلەر ءۇشىن پرومو-كەزەڭ وتەدى. ال 1 قىركۇيەكتە بۇكىل قازاقستان بويىنشا وفلاين-كاسسالار اشىلادى. جالپى, بيلەتتەر وسى جىل بويى جانە 2017 جىلدىڭ 9 ماۋسىمىنا دەيىن ساتىلادى.
ايتپاقشى, ەكسپو تاريحىندا العاش رەت بيلەتتەر باعاسى ەداۋىر تومەندەگەن. استاناداعى كورمەگە كىرۋ قۇنى جەڭىلدىكسىز ەسەپتەگەننىڭ وزىندە 4 مىڭ تەڭگە مەن 8 مىڭ تەڭگەنىڭ ارالىعىندا بولسا, كەزىندە ميلاندا 39 ەۋرودان, شانحايدا 21 ەۋرودان باستالىپتى. ءتىپتى, ءدال وسى ساتتە انتاليادا ءوتىپ جاتقان تاقىرىپتىق كورمەگە باس سۇعۋ 21 دوللار تۇرادى. سوندىقتان, مۇنداي ءتيىمدى ۇسىنىستى قۇر جىبەرۋگە استە بولماس. مۇنىمەن قاتار, 6 جاسقا دەيىنگى بالالار, جەتىم نەمەسە اتا-انا قامقورلىعىنسىز قالعان بۇلدىرشىندەر, مۇمكىندىگى شەكتەۋلى جاندار جانە ۇلى وتان سوعىسىنىڭ مايدانگەرلەرى «ەكسپو-2017» شاراسىن تەگىن تاماشالايدى. وقۋشىلار مەن ستۋدەنتتەرگە, زەينەتكەرلەرگە, كوپ بالالى انالارعا جەڭىلدىكتەر قاراستىرىلعان.
بوتاگوز ماراتقىزى
