كەشە تاڭەرتەڭ ەلوردانىڭ تەمىرجول ۆوكزالىندا جۇزدەگەن بالانىڭ قۋانىشىن كوردىك.
ارىس قالاسىنان 200-گە جۋىق بالا نۇر-سۇلتان قالاسىنا كەلدى. ولار ەندى 10 كۇن بويى باس قالامىزدا دەمالاتىن بولادى.
بەس ۆاگوننان جۇزدەرى بال-بۇل جانىپ, كوڭىلدەنىپ ءتۇسىپ جاتقان بالالاردى نۇر-سۇلتان قالاسىنىڭ اكىمى التاي كولگىنوۆ سالتاناتتى جاعدايدا قارسى الدى.
– نۇر-سۇلتان قالاسىنا قوش كەلدىڭىزدەر, بالالار! امان-ەسەن جەتكەندەرىڭە قۋانىشتىمىز. ەندى سىزدەر وسىندا ون كۇندەي دەمالاتىن بولاسىڭدار. ەلوردامىزدىڭ كورىكتى جەرلەرىن ارالاپ, كونتسەرتتىك-سپورتتىق شارالارعا قاتىساسىزدار. سىزدەردەن كەيىن وزدەرىڭمەن وقيتىن باسقا بالالار دا كەلەتىن بولادى. نۇر-سۇلتان قالاسى ارىسپەن بىرگەمىز! – دەدى ەلوردا اكىمى وزىمەن بىرگە قارسى الۋ راسىمىنە كەلگەن ەرجان ماكسيمدى دە تانىستىرىپ.
ارىستان كەلگەن وقۋشىلار «بالالار ءۇيى» مەن گۋمانيتارلىق كوللەدجدە تۇراتىن بولادى. بالالارمەن ءبىز دە ەرىپ باردىق. «بالالار ءۇيىنىڭ» كوتتەدج ۇيىنە ورنالاسقان جاسوسپىرىمدەردىڭ كوڭىل-كۇيىنە قاراپ شىن قۋانعاندارىن سەزىندىك.
ءبىر ايتارلىعى, ارىستىڭ بالالارى ەلوردا كۇنى مەرەكەسىنە ارنالعان شارالاردىڭ دا كۋاسى بولماق. ياعني, ەلوردا تويىنداعى قىزىقتاردى دا تاماشالاپ قايتاتىن بولادى.
ەلوردا اكىمى التاي كولگىنوۆ اپاتتان زارداپ شەككەن ارىس قالاسىنىڭ 500 مەكتەپ وقۋشىسىنا دەمالىس ۇيىمداستىرۋ الدىن الا جوسپارلانعانىمەن, بۇل ساندى ءبىر مىڭعا دەيىن جەتكىزۋدى ويلاستىرىپ جاتىرمىز دەپ ايتتى. دەمەك, ەل جۇرەگىنە اينالعان نۇر-سۇلتان قالاسىن كورەتىن بالالار قاتارى كوبەيە بەرمەك.
