نۇر-سۇلتان قالالىق مەملەكەتتىك ارحيۆىندە قر پرەزيدەنتى ءارحيۆىنىڭ 25 جىلدىعىنا وراي «رۋحاني جاڭعىرۋ: اشىق قوعامعا – اشىق ارحيۆتەر» اتتى دوڭگەلەك ۇستەل ءماجىلىسى ءوتتى.
وسى شارا اياسىندا الماتىداعى پرەزيدەنت ءارحيۆىنىڭ اسا قۇندى قۇجاتتار كوللەكتسياسىنان تاريحي-قۇجاتتىق كورمە ۇيىمداستىرىلدى. كورمەگە 53 قۇندى قۇجات قويىلدى. ونىڭ ىشىندە حالقىمىزدىڭ ارداقتى ازاماتتارى – مىرجاقىپ دۋلاتوۆ, ساكەن سەيفۋللين, ءىلياس جانسۇگىروۆ, تۇرار رىسقۇلوۆ جانە ءسابيت مۇقانوۆتاردىڭ ءوز قولدارىمەن تولتىرىلعان جەكە پاراقشالارى ۇسىنىلدى. سونداي-اق 1925-33 جىلدارى قازاقستان ولكەلىك پارتيا كوميتەتىنىڭ ءبىرىنشى حاتشىسى گولوششەكينگە ەلدە جاپپاي اشارشىلىق بەلەڭ العان تۇستا تاريحتا «بەسەۋدىڭ حاتى», «التاۋدىڭ حاتى» دەگەن اتپەن قالعان قازاق زيالىلارىنىڭ حاتتارى دا كورسەتىلدى. بۇل حاتتى جازعان ازاماتتاردىڭ دەنى قۋعىن-سۇرگىنگە ۇشىراعان.
قر پرەزيدەنتى ءارحيۆىنىڭ ارحيۆ قورلارىن ساقتاۋ جانە مەملەكەتتىك ەسەپتى قامتاماسىز ەتۋ باسقارماسىنىڭ باسشىسى گاۋحار بەكىشوۆانىڭ ايتۋىنا قاراعاندا, بۇگىندە اتالعان ارحيۆتە 25 مىڭنان اسا قۇجات ساقتالعان. قازىر كوپشىلىكە قولجەتىمدى بولۋ ءۇشىن 160-تان اسا قۇجاتتى ارحيۆ سايتىنا شىعارعان. 
«پرەزيدەنتتىك ارحيۆتە 1917 جىلدان, ياعني كەڭەس وكىمەتى ورناعاننان باستاپ, بۇگىنگە دەيىنگى قۇجاتتار ساقتالادى. سونىمەن بىرگە مۇراعاتتا رەۆوليۋتسياعا دەيىنگى سيرەك كەزدەسەتىن فوتوسۋرەتتەر دە بار. وتكەن عاسىردىڭ 20-شى جىلدارىنىڭ اياعىندا لاتىنعا كوشۋ كەزىندە عالىمدار اراسىندا ءتۇرلى پىكىرلەر ايتىلعان. سول ۋاقىتتا جاڭا ءالىپبي قوعامى قۇرىلىپ, ونى وراز جاندوسوۆ باسقارعان. سوعان بايلانىستى ءبىراز قۇجاتتار بار» دەدى ول.
سونداي-اق كەلۋشىلەر ەكىنشى دۇنيەجۇزىلىك سوعىس كەزىندە الماتىعا ۋاقىتشا قونىس اۋدارعان, ورىستىڭ ۇلكەن جازۋشىلارى – ميحايل زوششەنكو مەن كونستانتين پاۋستوۆسكيدىڭ ءوز قولىمەن جازعان جەكە ومىرباياندىق پاراقشالارىن كوردى.
