پرەزيدەنتتىڭ تاپسىرماسىمەن جاڭادان قۇرىلاتىن «low-cost» ساناتىنداعى, ياعني ارزان باعاعا ىشكى رەيستەر ۇسىناتىن «ەير قازاقستان» اۋە كومپانياسى «Bombardier Aerospace» كومپانياسىنان Q400 NextGen ماركالى ون ۇشاق ساتىپ الماقشى.
وتكەن اپتادا استانادا كانادالىق ۇشاقتىڭ تانىستىرىلىمى ءوتتى. شەتەلدىك ۇشاق قۇراستىرۋشى كومپانيانىڭ بيزنەستى دامىتۋ جانە ساتۋ بويىنشا ديرەكتورى مارك گيلبەرتتىڭ ايتۋىنشا, قاۋىپسىزدىكتىڭ بارلىق تالاپتارىنا ساي ءتۋربوۆينتتى ۇشاق ورتا ازيا ەلدەرىنە وتە قولايلى, ىستىق اۋا رايىندا دا, تومەنگى ەكسترەمالدى تەمپەراتۋرادا دا مۇلتىكسىز جۇمىس ىستەيدى. ءارى ەكسپلۋاتاتسيالىق شىعىنى 70 ورىندىق باسقا ۇشاقتارمەن سالىستىرعاندا الدەقايدا تومەن. سوندىقتان دا تۇتىنۋشىلاردىڭ قالتاسىنا ايتارلىقتاي سالماق سالمايتىن اۋە لاينەرلەرى «ەير قازاقستان» برەندىمەن كەلەسى جىلدان باستاپ ۇشا باستايدى.
«ەير قازاقستان» كومپانياسىنىڭ ديرەكتورى نۇرجان شاكىروۆ: «بۇل ۇشاقتاردىڭ ارقايسىسىن 23 ميلليون دوللاردان ساتىپ الامىز. بىراق «Bombardier Aerospace» تەك ۇشاقتارىن ساتىپ قانا قويمايدى, سونىمەن قاتار كونسۋلتاتسيالىق قولداۋ كورسەتەدى. ماماندار دايىنداۋعا قارجى بولىنەدى. ۇشقىشتار كانادادا شىڭدالادى. دەي تۇرعانمەن, باستاپقى كەزەڭدە شەتەلدىك ۇشقىشتاردى تارتامىز, ويتكەنى بىزدە مامان جەتىسپەيدى. ءبىر جىلدان كەيىن ەكيپاج مۇشەلەرى تۇگەلدەي وتاندىق مامانداردان جاساقتالادى» دەيدى.
ەدىل بوكەەۆ
