بۇگىن بارلىق مەكتەپتە سوڭعى قوڭىراۋ سوعىلادى. ەلوردادا قانشا تۇلەك بار, جازعى دەمالىستى مەكتەپ وقۋشىلارى قايدا وتكىزەدى, 1 قىركۇيەكتە استانادا قانشا مەكتەپ پايدالانۋعا بەرىلەدى, قالا كوللەدجدەرىندە قانداي ماماندىقتار تاپشى جانە باسقا دا وزەكتى ماسەلەلەر تۋرالى استانا قالاسى ءبىلىم باسقارماسىنىڭ باسشىسى قاسىمحان سەنعازىەۆ تىلشىلەرىمىزگە بەرگەن ەكسكليۋزيۆتى سۇحبات بارىسىندا اڭگىمەلەدى.
مەكتەپ قۇرىلىسى
– قاسىمحان سەنعازىۇلى, بيىل ەلوردادا قانشا جاڭا مەكتەپ سالىندى جانە جاڭا وقۋ جىلىنىڭ باسىندا قانشا مەكتەپ پايدالانۋعا بەرىلەدى؟
– استانادا 263 مىڭنان استام وقۋشىنى قامتيتىن 175 ورتا ءبىلىم بەرۋ ۇيىمى, سونىڭ ىشىندە 102 – مەملەكەتتىك مەكتەپتەر, 66 – جەكە, 7 رەسپۋبليكالىق مەكتەپ جۇمىس ىستەيدى. جىل سايىن باس شاھار حالقىنىڭ سانى ارتىپ كەلەدى, سايكەسىنشە مەكتەپ جاسىنا دەيىنگى جانە مەكتەپ جاسىنداعى بالالار سانى دا كوبەيۋدە. وسىعان وراي استانالىق اكىمدىك تۇراقتى نەگىزدە مەكتەپتەر سالىپ جاتىر. ورىن تاپشىلىعىنا بايلانىستى قالادا 8 ءۇش اۋىسىمدى جانە 16 تىعىزدالعان مەكتەپتەر جۇمىس ىستەيدى. وقۋشى ورىندارىنىڭ تاپشىلىعىن جويۋ ماقساتىندا وتكەن جىلى 12 مەكتەپ سالىندى.
قازىرگى ۋاقىتتا ەكى اۋىسىمدا 102 مىڭ وقۋشىنىڭ ءدارىس الۋىنا ارنالعان 34 مەكتەپتە قۇرىلىس جۇمىستارى جۇرگىزىلۋدە. ونىڭ 23-ءى (شامامەن ەكى اۋىسىمدا 64 مىڭ ورىنعا ارنالعان) جىل سوڭىنا دەيىن پايدالانۋعا بەرىلەتىن بولادى. بۇل مەكتەپتەر بارلىق اۋدانداردى قامتيدى. وسىلايشا, ەسىل اۋدانىندا – 8 , نۇرا اۋدانىندا – 6, بايقوڭىر اۋدانىندا – 2, سارىارقا اۋدانىندا – 2 جانە الماتى اۋدانىندا 5 مەكتەپ سالىنادى.
جوسپار بويىنشا 23 مەكتەپتىڭ 18-ءى قىركۇيەك ايىندا جۇمىسىن باستايدى. ولاردىڭ ىشىندە ۇلتتىق «جايلى مەكتەپ» جوباسى اياسىندا سالىنىپ جاتقان ءبىلىم بەرۋ وبەكتىلەرى دە بار. جالپى, ۇلتتىق جوبا بويىنشا 2024-2025 جىلدارى 90 مىڭ ورىندىق 24 جايلى مەكتەپ سالىنادى. ولاردىڭ 15-ءى ەلورداداعى قارقىندى دامىپ كەلە جاتقان ەسىل جانە نۇرا اۋداندارىندا ورنالاسادى. 2028 جىلعا قاراي ەكى اۋىسىمداعى 200 مىڭ وقۋشىعا ەسەپتەلگەن بارلىعى 80-نەن استام مەكتەپ سالۋ جوسپارلانىپ وتىر.
سوڭعى قوڭىراۋ
– بيىل سوڭعى قوڭىراۋ سالتاناتى مەن تۇلەكتەردىڭ مەكتەپ ءبىتىرۋ كەشتەرى قالاي وتەدى؟
– 2023-2024 وقۋ جىلى بيىل 25 مامىردا اياقتالادى. مەكتەپتىڭ 1-10 سىنىپ وقۋشىلارىنا ارنالعان «ءبىلىم – وتانىما» تاقىرىبىنداعى بىرىڭعاي سىنىپ ساعاتتارى 24 مامىردا وتەدى. «ءبىرتۇتاس تاربيە» باعدارلاماسى اياسىندا بىرىڭعاي سىنىپ ساعاتى ۇيىمداستىرىلادى. مامىر ايىندا «ىنتىماق ايى» ايلىعى باستالدى. ونىڭ اياسىندا ءبىلىم بەرۋ ۇيىمدارىندا «تازا قازاقستان», «يگى ىستەر», «كانيكۋلدا كىتاپ وقيىق» جانە باسقا اكتسيالار وتۋدە. 11 230 مەكتەپ تۇلەگى ءۇشىن 25 مامىردا سوڭعى قوڭىراۋ سوعىلادى. بۇل رەتتە انيماتورلاردى, اگەنتتىكتەردى, جەكە ستۋديالاردى تارتۋعا, مەرەكەلىك وتىرىستار ۇيىمداستىرۋعا, جالعا بەرىلەتىن اۆتوكولىكتەرمەن قالا ىشىندە كوشپەلى ەكسكۋرسيالار وتكىزۋگە تىيىم سالىنادى. سونداي-اق, اكىمشىلىكتەر مەن پەداگوگ قىزمەتكەرلەرگە اقشا جيناۋعا جانە سىيلىقتار الۋعا تىيىم سالىنادى.
9 (10) سىنىپقا ارنالعان قورىتىندى ەمتيحاندار 29 مامىردان 10 ماۋسىمعا دەيىن 4 ءپان بويىنشا وتەدى. بۇل سىنىپتارداعى وقۋشىلار سانى – 19 952. 11 (12) سىنىپتارعا ارنالعان مەملەكەتتىك قورىتىندى ەمتيحاندار 28 مامىردان 11 ماۋسىمعا دەيىن 5 ءپان بويىنشا بولادى. مۇنداعى وقۋشىلار سانى – 11 230. ەلوردا تۇلەكتەرىنە اتتەستاتتاردى سالتاناتتى تۇردە تاپسىرۋ 14 ماۋسىمدا وتەدى.
قاۋىپسىزدىكتى قامتاماسىز ەتۋ
– استاناداعى ءبىلىم بەرۋ مەكەمەلەرىندە قاۋىپسىزدىك قالاي قامتاماسىز ەتىلەدى؟
– وقۋ ورىندارىندا بالالاردىڭ قاۋىپسىزدىگىن قامتاماسىز ەتۋ ماسەلەسى باسىم باعىتتاردىڭ ءبىرى بولىپ تابىلادى. بۇگىنگى تاڭدا قالانىڭ بارلىق ءبىلىم بەرۋ ۇيىمدارى اۆتوماتتى ءورت دابىلى جۇيەسىنە قوسىلعان, سونداي-اق ساندىق بەينەباقىلاۋمەن قامتاماسىز ەتىلگەن. بارلىق كامەرالار مەن دابىل تۇيمەلەرى ەلورداداعى پوليتسيا دەپارتامەنتىنىڭ جەدەل باسقارۋ ورتالىعىنا قوسىلعان. مەكتەپتەردى تسيفرلىق بەينەباقىلاۋمەن قامتاماسىز ەتۋ 100%-دى قۇرايدى. ورناتىلعان كامەرالار قازاقستان رەسپۋبليكاسى ۇلتتىق قاۋىپسىزدىك كوميتەتى توراعاسىنىڭ 2020 جىلعى 27 قازانداعى №69 «ۇلتتىق بەينەمونيتورينگ جۇيەسىنىڭ جۇمىس ىستەۋ قاعيدالارىن بەكىتۋ تۋرالى» بۇيرىعىنىڭ تالاپتارىنا سايكەس كەلەدى. سونداي-اق, بارلىق ءبىلىم بەرۋ مەكەمەلەرىندە كۇزەتتى 1-ساناتتى ليتسەنزياسى بار فيرمالار قامتاماسىز ەتەتىنىن اتاپ وتكىم كەلەدى. سونىمەن قاتار, بارلىق مەكتەپتەردە, كوللەدجدەردە, قوسىمشا ءبىلىم بەرۋ نىساندارىندا تۋرنيكەتتەر بار. 2023-2024 جىلدارى بولىنگەن بيۋدجەت قاراجاتى شەڭبەرىندە بارلىق ءبىلىم بەرۋ ۇيىمدارى ءورت سوندىرگىشتەرمەن قامتاماسىز ەتىلدى.
2023-2024 وقۋ جىلىنا ارنالعان ءورت قاۋىپسىزدىگى جانە ازاماتتىق قورعاۋ سالاسىنداعى وقۋلار مەن جاتتىعۋلاردى وتكىزۋ جوسپارىنا سايكەس بارلىق ءبىلىم بەرۋ ۇيىمدارىندا قالالىق تجد ماماندارىمەن بىرلەسىپ تابيعي جانە تەحنوگەندىك سيپاتتاعى توتەنشە جاعدايلار, سونداي-اق اپاتتى جاعدايلار تۋىنداعان كەزدە قىزمەتكەرلەر مەن وقۋشىلار قالاي ارەكەت ەتۋى كەرەكتىگى جونىندە ۋاقىتىلى جاتتىعۋلار وتكىزىلەدى.
ۇيىرمەلەر مەن سەكتسيالار
– قوسىمشا ءبىلىم بەرۋ جاعدايى قالاي؟
– ەلوردادا 12 قوسىمشا ءبىلىم بەرۋ ۇيىمى, 135 فيليال, مەكتەپ بازاسىندا (№20, 24, 42, 68, 69, 80, 90) 8 كوميۋنيتي-ورتالىق, «شۋاق» قوو بار. ۇلتتىق ءبىلىم بەرۋ دەرەكتەر بازاسىنا سايكەس وقۋشىلاردىڭ 81,5%-ى (213 556 بالا) قوسىمشا بىلىممەن قامتىلعان, ال 41,8%-ى (84 377) سپورت سەكتسيالارىنا قاتىسادى. وسى ماقساتتا ءبىلىم بەرۋ ۇيىمدارىندا 875 سپورت سەكتسياسى جۇمىس ىستەيدى.
مەملەكەت باسشىسى وتكەن جىلدىڭ شىلدە ايىندا قوسىمشا ءبىلىم بەرۋ نىساندارىنىڭ قولجەتىمدىلىگىن قامتاماسىز ەتۋ جونىندە تاپسىرما بەردى. وسى تاپسىرمانى ورىنداۋ ماقساتىندا اكىمدىكپەن 2029 جىلعا دەيىن 15 وقۋشىلار سارايىن سالۋ, ونىڭ 4-ءىنىڭ قۇرىلىسىن اعىمداعى جىلى باستاۋ جوسپارلانعان. جەكە ينۆەستيتسيالار ەسەبىنەن قازىردىڭ وزىندە ەكى وقۋشىلار سارايى – تۇران داڭعىلىنداعى Sana جانە قاجىمۇقان كوشەسىندەگى «Santa sport» سپورت جانە شىعارماشىلىق ورتالىعى اشىلدى. جەرگىلىكتى بيۋدجەت ەسەبىنەن تاعى ەكى ساراي – سارىارقا اۋدانىنداعى زەمليانيچنايا كوشەسى جانە الماتى اۋدانىنداعى تولەباەۆ كوشەسىندە وقۋشىلار سارايى سالىنىپ جاتىر.
مەكتەپكە دەيىنگى بىلىم بەرۋ
– بالاباقشا تاپشىلىعى ماسەلەسى قالاي شەشىلەدى؟
– استانادا 66 953 بالانى قامتيتىن 546 مەكتەپكە دەيىنگى مەكەمە, ونىڭ ىشىندە جوبالىق قۋاتى 29 617 بالا بولاتىن 32 808 تاربيەلەنۋشى كونتينگەنتىمەن 100 مەملەكەتتىك ۇيىم, 33 439 بالا كونتينگەنتىمەن 443 جەكە مەنشىك, 3 ۆەدومستۆولىق بالاباقشا (706 بالا كونتينگەنتىمەن) بار. مەكتەپكە دەيىنگى ءبىلىم بەرۋ سالاسىنداعى مەملەكەتتىك قىزمەتتەردى اۆتوماتتاندىرۋ ماقساتىندا 2019 جىلدان باستاپ ەلوردادا «ينديگو» اقپاراتتىق جۇيەسى جۇمىس ىستەيدى.
بالاباقشالارعا ورىن ءبولۋ 12 ماۋسىمنان باستالادى دەپ بولجانۋدا. ول ءۇشىن گرافيكتىڭ جوباسى جانە جيناقتاۋ الگوريتمى جاسالدى. مونيتورينگ بويىنشا مەكتەپ جاسىنداعى بالالاردى ەسكەرە وتىرىپ, 28 مىڭنان استام بوس ورىن انىقتالدى. كەستە ءبىلىم باسقارماسىنىڭ رەسمي ينتەرنەت-رەسۋرستارىندا ورنالاستىرىلاتىن بولادى. تۋىنداعان ماسەلەلەر بويىنشا اتا-انالار باسقارمانىڭ مەكتەپكە دەيىنگى بولىمىنە: 55-68-92, 55-68-64, 55-68-74 تەلەفوندارى بويىنشا جانە مەملەكەتتىك بالاباقشالاردىڭ كونسۋلتاتيۆتىك پۋنكتتەرىنە حابارلاسا الادى.
مەكتەپ جاسىنا دەيىنگى بالالار كونتينگەنتى جىل سايىن بالا تۋ مەن كوشى-قون پروتسەستەرىنىڭ وسۋىنە بايلانىستى ارتىپ كەلەدى. بۇگىنگى كۇنى «ينديگو» ەلەكتروندى پورتالىندا كەزەكتە 0 جاستان 6 جاسقا دەيىنگى 47899 بالا, 2 جاستان 6 جاسقا دەيىنگى 37596 بالا تىركەلگەن. الداعى 5-6 جىلدا 60 مەملەكەتتىك بالاباقشا سالۋ كوزدەلۋدە. اتاپ ايتقاندا, 2024 جىلى 3000 مىڭ ورىندىق 10 مەملەكەتتىك بالاباقشانىڭ قۇرىلىسىن باستاۋ جوسپارلانىپ وتىر.
كوللەدج جەلىسى
– ەلوردادا ارناۋلى ورتا ءبىلىم قالاي دامۋدا؟
– قازىرگى ۋاقىتتا استانادا 32 كوللەدج, ونىڭ ىشىندە 9 مەملەكەتتىك, 23 جەكەمەنشىك كوللەدج جۇمىس ىستەيدى. ولاردا 35923 وقۋشى (مەملەكەتتىك – 10 446, جەكە – 25 477), ونىڭ ىشىندە مەملەكەتتىك ءبىلىم بەرۋ تاپسىرىسى بويىنشا – 20 289 (56%) وقۋشى ءدارىس الۋدا. كادرلاردى دايارلاۋ 73 ماماندىق جانە 121 بىلىكتىلىك بويىنشا ء(بىلىم بەرۋ – 14,8%, مەديتسينا – 20,7%, ونەر جانە گۋمانيتارلىق عىلىمدار – 7,1%, بيزنەس, باسقارۋ جانە قۇقىق – 6,7%, اقپاراتتىق-كوممۋنيكاتسيالىق تەحنولوگيالار – 14,8%, ينجەنەرلىك, وڭدەۋ جانە قۇرىلىس سالالارى – 22,3%, قىزمەتتەر – 13,3%) جۇرگىزىلەدى.
جاڭا كاسىپتەر كارتاسىنا سايكەس, الداعى 3-7 جىلدا ەڭبەك نارىعىنا كىرەتىن بىرقاتار جاڭا كاسىپتەردىڭ: ونلاين وقىتۋ بويىنشا تيۋتور, ينكليۋزيۆتى ءبىلىم بەرۋ بويىنشا مامان, كوممۋنالدىق جىلجىمايتىن مۇلىكتى باسقارۋشى, قۇرىلىستاعى ساپانى باسقارۋ جونىندەگى مامان, قۇرىلىس تەحنولوگ-يننوۆاتور, BIM-تەحنولوگيالاردى ەسكەرە وتىرىپ, جىلجىمايتىن مۇلىكتى پايدالانۋ جونىندەگى مامان, تسيفرلىق كوممەرتسيا جانە تولىقتىرۋ ورتالىقتارىنىڭ لوگيستيكا مامانى, اۆتوموبيل ديزاينەرى-جوندەۋشىنىڭ پايدا بولۋى بولجانۋدا. جىل سايىن ەرەكشە ءبىلىم بەرۋ قاجەتتىلىكتەرى بار مەكتەپ تۇلەكتەرىنىڭ سانى ارتىپ كەلەدى, وسىعان بايلانىستى ارنايى (ينكليۋزيۆتى) توپتاردا كادرلار دايارلاۋعا مەملەكەتتىك تاپسىرىس ءوسىپ, 4 كوللەدجە ءۇش ماماندىق بويىنشا 74 ورىن ءبولىندى.
2023 جىلدىڭ قورىتىندىسى بويىنشا ەلوردالىق كوللەدجدەردى 7 677 تۇلەك ءبىتىردى, ولاردىڭ 6 602-ءى (86%), ونىڭ ىشىندە 3 499-ى (53%) ماماندىعى بويىنشا جۇمىسقا ورنالاستىرىلدى نەمەسە ءارتۇرلى قىزمەتپەن اينالىسىپ ءجۇر.
2024 جىلى 9 983 بالا كوللەدج بىتىرەدى دەپ كۇتىلۋدە, ولاردىڭ 6,8 مىڭى مەملەكەتتىك تاپسىرىس بويىنشا وقىدى. ەكونوميكا سالالارى بويىنشا تەحنيكالىق جانە كاسىپتىك ءبىلىم بەرۋ كادرلارىن دايارلاۋدى جۇيەلەۋ, سونداي-اق ەلوردالىق كوللەدجدەردى زاماناۋي ءبىلىم بەرۋ ينفراقۇرىلىمىنا اينالدىرۋ ماقساتىندا ولاردى جوسپارلى بەيىندەۋ جۇرگىزىلۋدە.
كادر ساپاسى قانداي؟
– پەداگوگيكالىق كادرلاردىڭ جەتىسپەۋشىلىگى ساقتالا ما؟
– ۇلتتىق ءبىلىم بەرۋ دەرەكتەر بازاسىنىڭ مالىمەتتەرى بويىنشا, 2023-2024 وقۋ جىلىندا ەلوردانىڭ ورتا ءبىلىم بەرۋ ۇيىمدارىندا 17 049 ادام, ونىڭ ىشىندە مەملەكەتتىك ءبىلىم بەرۋ مەكەمەلەرىندە 12 457 ادام جۇمىس ىستەيدى. بۇل رەتتە مۇعالىمدەردىڭ 60%-ى (10 214) جاڭا فورماتتاعى بىلىكتىلىك ساناتتارى بار, ونىڭ ىشىندە پەداگوگ-مودەراتور – 3 558, پەداگوگ-ساراپشى – 2 755, پەداگوگ-زەرتتەۋشى – 3 505, پەداگوگ-شەبەر – 396. مامانداردىڭ 94,4%-ى, ياعني 16 103 پەداگوگ جوعارى (جوعارى وقۋ ورنىنان كەيىنگى) ءبىلىمى بار. بيىلعى وقۋ جىلىنىڭ 3-توقسانىنداعى ءبىلىم بەرۋ ساپاسىنىڭ دەڭگەيى 58,77%-دى قۇرادى, بۇل وتكەن جىلدىڭ سايكەس كەزەڭىمەن سالىستىرعاندا 2,08%-عا ارتىق (56,69%). وقۋشىلاردىڭ ۇلگەرىمىن تالداۋعا سايكەس, ەلوردالىق مەكتەپتەردىڭ جارتىسىندا ءبىلىم بەرۋ ساپاسىنىڭ كورسەتكىشى 58%-دان جوعارى.
ءبىلىم بەرۋ ساپاسىن ارتتىرۋ ماقساتىندا استانا قالاسى ءبىلىم باسقارماسىنىڭ كەشەندى جوسپارى بەكىتىلدى. ونى ىسكە اسىرۋ ماقساتىندا ادىستەمەلىك ورتالىقپەن مۇعالىمدەردىڭ كاسىبي دەڭگەيىن جەتىلدىرۋ بويىنشا كەشەندى, مازمۇندى ءىس-شارالار, اتاپ ايتساق, سەمينارلار, شەبەرلىك سىنىپتارى, كوۋچينگ, پراكتيكالىق الاڭدار, ءتۇرلى جوبالار («پروفەسسور ساباعى», «8 مينۋتتىق وقۋ», «شەبەردەن ءتالىم», «كاسىبي مۇعالىم», «وقۋTIME» جانە باسقالار) وتكىزىلەدى, ادىستەمەلىك كومەك ۇيىمداستىرىلادى.
سونىمەن قاتار, پەداگوگتەردىڭ كاسىبي بىلىكتىلىگىن ارتتىرۋ ماقساتىندا مەرزىمدى تۇردە تاقىرىپتىق كۋرستار وتكىزىلەدى. 2023 جىلى 7 597 پەداگوگ (مەكتەپكە دەيىنگى ءبىلىم بەرۋ ۇيىمدارىنان 1 182, جالپى ءبىلىم بەرۋ ۇيىمدارىنان 5 619, ونىڭ ىشىندە 57 مەكتەپ ديرەكتورلارى, 111 ورىنباسارلار, 257 سىنىپ جەتەكشىلەرى, 210 پسيحولوگ, 84 الەۋمەتتىك پەداگوگ جانە ت. ب.), كاسىپتىك جانە تەحنيكالىق ءبىلىم بەرۋ مەكەمەلەرىنەن 447, قوسىمشا ءبىلىم بەرۋ ۇيىمدارىنان 195 ادام مەملەكەتتىك تاپسىرىس نەگىزىندە وقىپ شىقتى (2024 جىلى 154-ارنايى ءبىلىم بەرۋ مەكەمەلەرىنەن). 2024 جىلى مەملەكەتتىك تاپسىرىس نەگىزىندە 5 539 پەداگوگتى بىلىكتىلىكتى ارتتىرۋ كۋرستارىن وتكىزۋ جوسپارلانعان. قازىرگى ۋاقىتتا 1 199 پەداگوگ كۋرستاردان ءوتتى.
مەكتەپتەر مەن بالالار سانىنىڭ ارتۋىنا بايلانىستى الداعى جىلدارى قالادا 5 000-عا جۋىق پەداگوگ تاپشىلىعى تۋىنداۋى مۇمكىن. كادرلاردىڭ جەتىسپەۋشىلىگى ماسەلەسىن شەشۋ ماقساتىندا اكىمدىك جوعارى وقۋ ورىندارى ءۇشىن ماماندار دايارلاۋعا 1 000-نان استام مەملەكەتتىك تاپسىرىس ءبولدى. سونىڭ ارقاسىندا 360 جاس مامان جۇمىسقا ورنالاستىرىلدى. الداعى جىلدارى مەملەكەتتىك تاپسىرىس ارقىلى جاستاردى جۇمىسقا ورنالاستىرۋ جەرگىلىكتى بيۋدجەت قاراجاتى ەسەبىنەن جالعاسادى.
پەداگوگيكالىق كادرلارعا دەگەن قاجەتتىلىكتى ەلوردانىڭ ءۇش جوعارى وقۋ ورنىندا: ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە, «استانا» حالىقارالىق ۋنيۆەرسيتەتى, ەۋرازيا گۋمانيتارلىق ينستيتۋتىندا ماماندار دايارلاۋ ەسەبىنەن قاناعاتتاندىرۋ جوسپارلانۋدا. ولاردىڭ بارلىعىنىڭ «پەداگوگيكالىق عىلىمدار» باعىتى بويىنشا كادرلار دايارلاۋعا مەملەكەتتىك ليتسەنزياسى بار, اككرەديتتەۋدەن وتكەن, جوعارى جانە (نەمەسە) جوعارى وقۋ ورنىنان كەيىنگى ءبىلىم بەرەتىن ۇيىمداردىڭ ءبىلىم بەرۋ قىزمەتىنە قويىلاتىن قر عىلىم جانە جوعارى ءبىلىم مينيسترلىگىنىڭ بىلىكتىلىك تالاپتارىنا سايكەس جۇمىس ىستەيدى.
قازىرگى ۋاقىتتا استانا اكىمدىگىنىڭ گرانتى بويىنشا 2 262 ستۋدەنت وقيدى, ونىڭ ىشىندە اتالعان جوعارى وقۋ ورىندارىندا پەداگوگيكالىق باعىت بويىنشا 1 923 ادام ءدارىس الۋدا.
پەداگوگيكالىق كادرلارعا دەگەن قاجەتتىلىك جىل سايىن جوعارى وقۋ ورنىن بىتىرگەن تۇلەكتەر ەسەبىنەن جابىلادى. 2023 جىلى بارلىعى 363 جاس, ونىڭ ىشىندە پەداگوگيكالىق ماماندىقتار بويىنشا 114 ادام, ياعني بىتىرۋشىلەردىڭ 80%-دان استامى جۇمىسقا ورنالاستىرىلدى, قالعاندارى ماگيستراتۋرادا وقۋىن جالعاستىردى نەمەسە بالا كۇتىمى بويىنشا دەمالىسقا شىقتى.
مانسيا ساكەنوۆا
